簡介

命中注定嘅勇者意外變成魔王手下





「自古以嚟人類當中出現過唔少變異者,就算佢哋有比一般人優秀嘅地方,喺保守嘅舊社會佢哋只可以做其他人眼中嘅怪物。為咗生存,大部分變異者都會選擇避開人群生活,所以歷史裡面有關變異者嘅記載只有好少。

歷史當中最出名嘅變異者就係2000年前嘅耶穌,神嘅獨生子,創造咗唔少奇蹟,但最後都被人類殺死。

而其次就係,人類嘅惡夢,人稱魔王嘅Louis Noah Frank ( 路易斯.諾亞.法蘭克 ) 。佢活躍喺18世紀,團結大量嘅變異者去反抗,甚至想創造一個變異者主導嘅世界。

喺魔王嘅帶領下,大部分憎恨人類嘅變異者殘殺咗數以萬計嘅平民百姓,都創造咗唔少嘅魔物四圍去搞破壞,所以人類叫佢哋做魔人。普通人類跟本反抗唔到,做唔到啲乜。佢哋無論喺體質、能力同智慧上都好難比得上變異者,於是去祈求女神大人幫佢哋。

善良嘅女神大人希望變異者同普通人類之間幾千年嘅仇恨可以和解,所以集合咗幾位變異者一齊去保護人類,幫手殺魔物同魔王,屬於變異者嘅職業都開始堀起。





當中包括體質強大嘅人型坦克、戰鬥力高嘅戰士、啱遠程攻擊嘅射手、輔助佢哋嘅魔法師同幫手治療嘅吟遊詩人......」

「月月都識魔法,我將來都要做魔法師保護人類!哥哥就做勇者啊!」坐喺爺爺隔離嘅細路女突然打斷佢講嘅故事,興奮噉舉起手指展示自己嘅新技能。

抬頭就見到屋企人對自己嘅眼神無想像中嘅驚喜,而係恐懼......

噗咚......噗咚.....

我喺夢裡面扎醒,手摸向自己嘅心口,令有啲急促嘅心跳慢慢平復。頭先夢裡面嘅內容喺思緒嘅清醒下已經慢慢消失,想記都記唔起。





同平時一樣起身返工,做一個普通嘅上班族。早咗返公司,就喺位碌吓連登等夠鐘。

「兩名懷疑變異者男子昨晚十點於旺角地鐵站外高舉18世紀魔王路易斯.法蘭克時期旗幟,抗議社會對異變者歧視,並且與現場市民發生爭執。擾攘接近兩小時,於十點被警方制服......」

相對18世紀,自從魔王被勇者刺殺之後,變異者對人類已經冇曬利用價值,社會嘅地位都瞬間下降返。而家恐怕只係比18世紀前好少少,起碼人類已經知道佢哋嘅存在,唔洗話完全唔見得光。

但呢啲都唔關我事,我當笑話睇完就算。

「滴滴......滴滴.....」





拎電話嘅手唔小心撞到枱面嘅Mouse,Mouse閃住紅光。

「嗯?」我覺得有啲奇怪,Mouse頭先好似唔係喺呢個位,而且自己部電腦唔知幾時開咗。

不過夠鐘開工,自己就唔得閒諗太多。苦悶嘅生活,每日重複又海量嘅圖要畫,明明已經一早習慣咗,但有時又會覺得迷惘,自己嘅人生到底做緊啲乜。

同平時一樣準時六點就放工閃人,偏偏今日心血來潮想四圍行下。

「滴滴......滴滴.....」

自從出咗公司開始都keep住聽到撳Mouse嘅聲,我頭痛噉拍吓額頭,懷疑自己返工返到幻聽。

行過警署嘅時候,警署裡面突然「碰!」一聲發生大爆炸。碎石飛到我面前嘅一刻,一個黑影即刻喺我嘅背囊飛出嚟,快速喺我眼前閃過,畫出一條紅色嘅光線。

紅色光線畫過嘅地方出現咗一幅綠色嘅半透明牆,幫我擋住飛向我嘅碎石,所有碎石一掂到綠色牆都靜止咗喺半空。





「滴滴......滴滴.....」

我呆滯噉望住眼前嘅超自然現象,完全無視咗腳邊一直發出「滴滴」聲嘅提醒。

「哎呀!哎呀!」5秒後綠色牆瞬間消失,幾塊碎石都照樣飛向我,打中我額頭。

我痛苦噉摸住額頭踎低,眼尾注意到腳邊一直「滴滴」聲嘅細粒嘢。

居然係我喺公司嘅紅外線Mouse啊!鬼節仲未到喎!

我嚇到身體向後跌,一嘢坐落地下。

「滴滴......滴滴.....」Mouse唔肯放棄,一直向我嘅方向移動。





「呀!」

現場實在太混亂,細細隻嘅Mouse被逃跑嘅人一腳踢到卡正喺警署鐵欄,不停掙扎同閃紅光都出唔返嚟。我突然覺得佢有啲可憐,而且佢頭先仲好似想救我。

「大家好,我係Louis Noah Frank。」低沉平穩嘅男聲喺警署頂傳嚟。

「魔王大人!」

「我哋終於等到你喇,魔王大人!」

「世界各地嘅變異者一直都相信你會返嚟,魔王大人。」

警署底下百幾個魔人同魔物喺裡面行出嚟,多毛嘅狼人,兩頭蛇,高大又生曬鏽嘅機械人......

而Mouse就啱啱好畀人踢到去魔王企緊嘅位置底下,令我想救佢都救唔到,但見佢無助噉閃住紅光我又唔忍心......





我深呼吸,鼓起唔知邊度嚟嘅勇氣,小心謹慎噉縮埋個身,嚟到Mouse面前。

「嗯......啊......點解咁實㗎?快啲出嚟喇......」我只係想快啲救完Mouse就走啫,點解都咁難㗎......我用盡力,但Mouse都係卡到實一實。Mouse好似都感應到我緊張嘅心情,閃吓閃吓嘅紅光配合噉閃得更加急速。

「人類!你喺度做咩啊!」隔離嘅熊人終於留意到我, 兇狠噉舉起熊掌準備一掌打碎我天靈蓋。

「對唔字......嗯......」我唔敢睇血腥嘅畫面,雙眼合到實一實等死。

「等等!」魔王唔知幾時嚟到我哋面前,阻止熊人嘅動作。氣場強大嘅魔王戴住小丑面具,兩者感覺好唔協調。加上背住光,竟然令我有種神聖嘅感覺。

「終Boss......」我內心忍唔住崇拜對方。

「係魔物......同埋變異者?」魔王留意到我雖然驚,但雙手都一直捉住Mouse唔放。佢拍一拍隔離嘅熊人叫佢幫手,一嘢拉彎鐵欄成功救返Mouse。





「唔該啊。」我抱住Mouse,真誠噉向佢哋點頭表示感謝。而Mouse就好似受驚嘅寵物,閃住紅光,用冰涼嘅機械身體磨擦我條頸,令人唔太舒服但又唔算太反感。

「唔洗客氣,頭先嚇親你好對唔住啊。」熊人居然由原本兇殘嘅外表轉身變成隻Teddy Bear公仔。

「估唔到妹妹仔你都係變異者,能力係咩啊?」隔離嘅變異者都熱情噉同我打招呼,氣氛即刻唔同曬,佢哋都完全唔似人類所講嘅魔人。

「夠喇,夠鐘返去喇,下次見到再傾都未遲。」魔王叫停咗手下,然後轉身同我講:「終Boss呢個稱呼都幾新鮮啊,希望下次見到你會同大家做到朋友,而唔係敵人。」

我仲反應得切,魔王已經重新返到警署頂,向所有人大聲講:「所有人類都聽到嗎?呢個只係個開頭,呢幾百年嚟變異者嘅屈辱,我一定慢慢還返畀你哋。」

然後佢哋後面突然出現一個大黑洞,魔王就同一班手下穿過黑洞消失喺所有人嘅視線。我望住佢哋離開嘅位置,好耐都未回神。

我一直心不在焉,連自己都唔知自己係點返到屋企。Mouse全程乖乖噉匿喺我嘅衫袋,間中閃住興奮嘅紅光,伸個頭出嚟睇風景,但好快畀我撳返落去。

「滴滴......滴滴.....」

返到自己房就唔再介意佢跳出嚟,起碼目前睇落Mouse唔會傷害自己。

「你係咩嚟?」我伸手一掌捉住Mouse,好奇噉反轉他個身研究。

真係普通一隻紅外線Mouse,紅黑色嘅外型仲一啲都唔好睇......

「Mouse?」我嘗試叫吓佢個名。

「滴滴」Mouse都乖乖地應,興奮噉喺枱面轉圈圈。

「哈哈,其實望耐咗你都幾得意啊。」好彩我接受能力夠高,好快接受到自己多咗隻紅外線Mouse做寵物。

我臨瞓前喺電話碌連登熱門,好快了解到世界發生緊咩事。

18世紀嘅魔王路易斯.法蘭克復活,人類再度面臨被變異者統治同殘殺嘅恐懼。教會公開招募變異者加入佢哋對抗魔王,同時聖女將會喺今晚12點用魔法陣召喚命中注定嘅勇者,一齊去保護人類。

碌一碌下面啲留言,聖女、勇者、魔法陣之類只係一個笑話。而家已經係21世紀,咩飛機大炮一早就發明咗出嚟。唔洗驚打唔贏魔王,都冇必要去驚佢。

魔王啊......

諗起今日見到戴住小丑面具嘅魔王,我並唔覺得佢係壞人,都唔係會盲目殘殺嘅人。佢之所以喺警署出現,恐怕係為咗救前一日被人拉咗嘅變異者。佢畀人嘅感覺係一個值得跟隨嘅領導者,都好珍惜自己嘅手下。

我突然諗起佢哋嘅說話,Mouse應該係魔物嚟,但我真係一個變異者?能力又係咩嚟?

算喇,就快12點,我唔想諗太多,聽日仲要返工。

不過喺我合埋眼就快瞓著嗰陣,地下突然出現咗一度強光包圍成間房。

我被強光嚇到彈起身,發現地下出現咗一個大型魔法陣,忍唔住尖叫:「啊!」
已有 0 人追稿