執屍執到女殭屍: 八．異變

經過幾日嘅訓練，Marco同Jimmy對收集精液同注入武器已經好熟練。至於chok嘢，唔需要訓練，佢哋本身已經非常熟手。Sin發明嘅第一樣武器個名好精簡，就叫做「精彈」。其實就係將佢哋嘅精液，混合穩定劑，裝入一個波子大細嘅彈殼，用嚟掟向殭屍。為咗分到係邊個嘅精液，Marco用紅色彈殼，Jimmy就用籃色彈殼。要發揮最大效果，要將兩種顏色嘅波仔都打中殭屍。
 
R小隊一行人嚟到一個廢村村口。根據目擊者嘅情報，呢個廢村由幾個星期前開始有鬼怪出沒，而且已經有幾個獨自嚟行山嘅男人遇害。四個戰鬥員先行落車整理裝備，而Marco同Jimmy就拉好車窗簾，喺車上準備精彈。Helena首先等到唔耐煩，敲咗幾下車窗，對車入面嗌：「得未呀？」車入面Jimmy嘅聲音答佢：「得喇得喇，有無渴精渴得咁緊要呀？」激到Helena連鬧幾句粗口，跟住同其他隊員講：「憑我哋幾個，駛鬼用啲咁嘅核突嘢咩！」其他人其實都有同感，不過既然係Sin嘅要求，就隨便帶埋去睇吓有無機會試到效果。
 
終於Macro同Jimmy打開車門，交貨俾車外嘅人。當Jimmy將Helena果份交俾佢，同佢講咗一句：「幫你特別包裝嘅。」Helena一攞上手，發現外面包住一層黏液，搞到佢一手都係。Helena嬲到七孔生煙，大鬧一聲「死仆街！」跟住想郁手打人，但係俾Jennifer喝停咗，同佢講：「時間無多，快啲出發。」
 
今日由Suki留低保護Marco同Jimmy，佢哋唔需要同其他人一齊入村，但係為防萬一精彈過咗時要再整，佢哋都留定喺村口隨時支援。當Suki一入返車廂，就開始聞到精液嘅氣味仲喺入面瀰漫，前面嘅司機位都不能幸免。Marco透過倒後鏡見到Suki厲咗自己一眼，然後皺起眉頭，繼續留意耳機中有無隊員傳嚟嘅動靜。
 
Jennifer，Helena同Bella行入廢村，呢處空無一人，佢哋早就解除咗視覺換裝，變返一身白色緊身衣喺村內搜索。三個人喺村入面行咗一陣，都仲未見到任何彊屍嘅踨跡，突然旁邊嘅一間石屋傳嚟一陣撞擊聲。佢哋破門而入，眼前一隻女殭屍正騎喺一個男人身上，睇嚟今日又多咗一個受害者。啱啱吸收完精氣嘅殭屍，活屍指數會短暫急升，更難應付。不過呢度有三個精英戰鬥員，對付區區一隻殭屍，佢哋絕對係游刃有餘。
 


Jennifer依然係負責突進嘅位置，長槍突剌攻向女殭屍。對方無向後退，而係左右閃身避開槍尖，動作非常快。Bella嘅武器係一把大鐮刀，好似死神用嘅一樣。佢見敵人左閃右避，衝前將鐮刀向橫一掃，要將佢攔腰斬成兩半。女殭屍喺刀鋒斬到之前，跳起避開咗鐮刀。Helena就係等緊呢個機會，斧頭劈向半空之中無處可避嘅敵人，直取佢心臟。
 
女殭屍無束手待斃，用左手擋住Helena嘅斧頭，四隻手指都被砍斷，但係力保心臟不失。Jennifer嘅長槍又刺向敵人頭部，但係女殭屍嘅動作真係快，居然可以用右手握住長槍。Jennifer笑一笑，握槍嘅手突然放開。女殭屍呆咗一呆，正奇怪點解Jennifer會放棄自己嘅武器，已經避唔開Bella由下而上嘅一擊，將女殭屍隻右手齊臂斬斷。長槍同鐮刀碰擊之後發出鏗一聲，喺空中旋轉幾圈之後，又返到Jennifer手中。慢條斯理從來唔係Jennifer嘅方式，佢一握好長槍，就要進行致命一擊，刺穿女殭屍嘅心臟。
 
無咗Marco同Jimmy呢兩個人要保護，又可以直接擊殺敵人，作戰真係輕鬆好多。Jennifer有『神槍』呢個稱號，絕對唔係偶然。除咗本身實力驕人，亦因為佢有最適合消滅殭屍嘅戰鬥方式。試問要破壞心臟，有乜方法好得過刺穿佢？比起斬擊要斬得夠深、劈得夠入，或者錘擊要力量強大到足以粉碎內臟，從正面刺擊只要命中幾乎就必然得手。Jennifer剌擊嘅力量同速度，喺戰鬥者之中無出其右。但係今次，長槍無剌穿女彊屍嘅心臟，而係俾佢斷咗四指嘅左手掌擋住咗。本來Jennifer嘅長槍要連手掌刺穿應該毫無難度，但係而家呢隻手，由膊頭開始都俾一層好似樹皮咁嘅嘢包住，而槍尖就俾呢層樹皮擋住咗。Helena同Bella見狀一齊攻向心臟，但係武器都無辦法破壞到女殭屍左手。轉眼之間，女殭屍身體不同嘅地方，包括雙腳同再生出嚟嘅右手都生出樹皮，直至佢全身都俾樹皮包住，只露出關節郁動嘅位置。
 
Jennifer佢哋從來未見過殭屍有咁嘅變化，正當束手無策嘅時候，女殭屍已經反守為攻，向Bella襲擊。Bella舉起鐮刀斬向迫近嘅女彊屍，但俾佢堅硬嘅右手擋住。Bella嘅攻擊動作大開大合，一擊不成反而露出破綻。女殭屍揮左拳打向中門大開嘅Bella，喺佢身邊嘅Helena即刻架起斧頭擋喺Bella身前。估唔到女殭屍除咗身體變硬，力量亦變強咗，一下將Helena打飛，連埋身後嘅Bella一齊撞埋牆邊跌低，Bella更連武器都跌埋。
 
面對呢個從未預料嘅情況，Jennifer仍然睇準女殭屍忙於攻擊嘅時機，長槍刺中敵人側腰無樹皮保謢嘅地方。雖然無辦法對女殭屍造成致命傷，至少將佢嘅注意力轉移離開Helena同Bella。轉向Jennifer嘅女殭屍一手橫掃過嚟，Jennifer用雙手持槍防禦，擋完手都麻咗一麻。當女殭屍嘅另一隻手抓過嚟，閃避唔切嘅Jennifer俾佢直接打中右肩，連緊身衣都俾佢撕爛咗一塊，露出底下白滑嘅手臂同埋幾條紅色嘅血痕。
 


另一邊起返身嘅Helena見到Jennifer情況不妙，將手上嘅斧頭飛向女彊屍。女殭屍防守心臟嘅意識非常強，回過半身用手擋開斧頭。同時，有兩粒不痛不癢嘅嘢打中女殭屍背脊。原來手上無武器嘅Bella把心一橫，喺Helena飛出斧頭嘅同時掟出兩粒精彈。中彈之後女殭屍嘅動作慢咗一下，就係呢一下，Jennifer嘅長槍又剌向女殭屍心口，原來佢已經將長槍交到無受傷嘅左手。呢一擊仍然俾女殭屍嘅樹皮甲彈開，但係唔再係絲毫無損。女殭屍被擊中嘅地方，有一塊樹皮跌咗落嚟。精彈的確已經發揮緊作用。
 
見到精彈居然有效，Helena同Bella趁Jennifer繼續向女殭屍攻擊，一邊執返自己嘅武器，一邊將剩低嘅精彈不斷掟向女殭屍。滿身白色液體嘅女殭屍變成慢動作，身上嘅樹皮甲亦開始不停脫落。三個戰鬥員毫不留情，猛烈咁向雙手護住心口嘅女殭屍進攻，樹皮甲亦被打到散晒落地下。最後Helena向女殭屍作出致命一擊，斧頭劈穿女殭屍心臟，幫戰鬥劃上句號。