真人真事改篇﹕師生戀﹕《最接近的陌生距離》: 第三章之一

嗶……嗶……

嗶……嗶……嗶…

嗶……嗶……嗶……嗶……

當我被電話聲嘈醒時候，已經係日上三竿。琴日放學就即刻去7-11返工，再踩埋個通宵更。最後瞓得嗰五個鐘就被電話嘈醒咗！本來我仲好迷糊，但當我見到一大串嘅未接來電之後，我成個人就醒晒。

「未接來電﹕10 次。」





唔洗問都知，係Miss打黎啦。頂佢個肺，「廢超」執政時代係核爆都唔理架嘛！佢算老幾呀！

睇吓鐘數，已經到咗學校Lunch時間，換言之⋯⋯

嗶⋯⋯嗶⋯⋯

嗶⋯⋯嗶⋯⋯電話又響！Miss又追魂call我！呢個女人有冇咁痴線呀？

最後我扮睇唔到將電話掟埋一二邊算。我都讀唔成書，返學都係浪費時間，呢個星期我索性拎晒嚟返兼職，賺多少少錢仲好啦！





但係點估到Miss嘅耐性真係唔可以講笑，喺我返工期間⋯⋯唔係！佢每日係咁追魂call！煩到乜咁，我最後索性電話都唔開，睇佢點搵到我！

= = = =

幾日後嘅星期四，下午四點半。

「先生多謝你$18.5。」我好似機械人咁逐個掃下貨品上嘅條碼

「朱古力條做緊優惠，要唔要加$5試下？」





「好。多謝下次光臨。」

「多謝你$58.5。」

「你好，歡迎光臨。」

「小姐，抓返你呢度20$」

「welcome sir⋯⋯thank you sir⋯⋯bye bye⋯⋯」

我就係好似輸入咗程式嘅機器，呢五個鐘以嚟不斷重複咁做收錢抓錢嘅動作。

唉，好悶呀。幾時先收工呀？

喺我放緊長長嘅喊露時，我見到有個女人將本時裝雜誌放咗喺收銀枱上面。我好自然地掃下雜誌上嘅條碼。





嘟——！

「小姐，多謝你盛惠$55。易極做緊『鋪毛』, 要唔要加$5要一盒？」

「係promote， 你發音唔係好準喎。」

我皺咗下眉，邊有客會咁樣執人口音架？最多都係話唔要唧！但係呢一把聲⋯⋯令我從沈悶嘅工作中回神過嚟。當我將目光由枱上嘅雜誌移去面前嘅女人時——

「咁啱嘅，班長！」

竟然係——

「Miss⋯⋯Miss Wong?」我瞪大雙眼。





「你咁多日冇返學，原來係、返工。」佢翹起雙手，露出招牌女王式嘅睥睨眼神。

點⋯⋯點會咁架？呢度離學校好遠架！照計唔會撞到學校老師架喎！呢個世界有冇咁細呀！定係命運安排要我呢一刻要比Miss捉逃學呀？

Miss冷漠嘅面貌下嘅嘴角微微揚起笑意。

一個充滿惡作劇嘅微笑。

「小⋯⋯小姐盛惠$55蚊。」

「Promote。」Miss講出一口正綜又純正嘅英文：「你做服務行業唔可以hea架。」佢竟然喺呢個時候將老師角色發揮得淋漓盡致！

「Mi⋯⋯Miss，$55，快啲比錢先啦。我會被人鬧架！」我瞄一瞄Miss身後⋯⋯仆街開始有人龍！

Miss聽到我求佢，反而更顯得寸進尺，佢微微一笑，好似好享受呢刻我嘅難受，佢就話：「跟Miss讀一次先。係Promote!」





「鋪⋯⋯」為咗唔好比啲客鬧，我嗱嗱聲應咗MISS嘅要求就算！

「係Pro⋯⋯」Miss好似特登將個R音講得大聲啲。

呢個時候條人龍塞到愈嚟愈長，啲人都鼓噪起嚟。頂，我好似比佢撳住嚟打咁，我唔耐煩咁講：「Pro⋯⋯」我對眼有咁大碌咁大地瞪實佢。

　「⋯⋯mote.」Miss邊笑邊講。

「Pro⋯⋯Promote! 」

「嘻。啱啦﹗」Miss好似因為成功教訓到我而滿足咁笑。

嘟——！八達通嘅聲音。Miss比咗錢後就拎走本雜誌轉身走人，但係佢走唔夠幾步，就轉身同我講：「班長，聽日記得準時返學呀！」





Miss微微一笑後就離開，總覺得佢呢下微笑好唔簡單。

果然，晚上九點鐘，距離收工仲有一個鐘嘅時候⋯⋯

「你個衰仔呃我返咗學！！原來走嚟返兼職！」

老母突然殺我一個措手不及！佢放工後走咗嚟我返工嗰度屌鳩我。老豆老母一向掛住搵食，我話乜佢地都信，點解穿咗煲架？

「你班主任頭先打嚟同我投訴呀！你開學第二日開始就唔返學！逃學逃足三日！冇鬼用架你！」

老母繼續當住咁多客面前屌我！令我勁嬲，但冇理由開阿媽拖架嘛，只係連忙咁講：「阿媽！我開緊工架！有咩返屋企再講啦！我要做嘢呀！」

「唔讀書！冇鬼用架你！一啲都唔似你家姐！」

阿媽佢邊走邊屌，聽到我好想爆粗搵人屌。頂你⋯⋯一日最衰係Miss! 阻我搵食！唉……都仲未夠，當我收工返到屋企時，老豆原來已經返咗屋企。然後老豆老母雙劍合壁咁對我進行一小時嘅精神轟炸，最後我仲差啲同老豆打交添。

心情差到爆，第二日繼續想逃學以表達我對呢個痴撚線Miss不滿。點知老母聽晒Miss話，調一調返工時間，等佢可以捉我起身返學！

頂你個肺！ 新學年對我嚟講真係地獄嚟喎！我唔止冇咗課室主導權！Miss仲可以迫到我返學呀！有冇輸得咁徹底呀？！

= = = =

IG: ar_hong_91

#小說 #文字 #文學 #愛情 #故事 #師生戀 #講故佬#小甜 #Miss故