真人真事改篇﹕師生戀﹕《最接近的陌生距離》: 第七章之三

剛剛嘅惡作劇唔知點解好似令我諗通咗啲嘢。我好似冇咗單戀Miss的失落感。但我好肯定自己仲係好鍾意Miss。 只係覺得呢個惡作劇令我有一種做返衰仔嘅感覺。哈，有趣嘅係，我做衰仔得嚟又唔會比人罰喎！簡直係完美嘅平衡！

更重要係咩？我諗通咗啦！係！我點都冇可能追到Miss架啦！但我可以做佢隻兵架嘛！當我愈明白我同Miss嘅差距時，我就愈清楚自己應該要喺咩位置上。佢對我溫柔咁笑，傾多一兩句計都已經夠我開心一日。做佢隻兵仔氹佢開心夠做有特啦！

不過做兵還做兵，我自問自己絕對唔會好似啲戇鳩鳩中年阿sir做炮灰。 要做就做偵測兵、做間諜、我只對自己忠誠。當我諗通咗之後，我就豁然開朗！

= = = =

「⋯⋯今日就教到呢度。各位同學有冇問題要問？」





「有！」我舉起手。

Miss好驚訝咁望住我，所有同學都大吃一驚。佢地應該心諗：「匡哥會問書！？」

Miss對住我點一點頭，示意我企起身問。

「《六國論》最尾一段唔多明，Miss可唔可以解多一次？」

此時我聽到後面啲同學起哄。咁梗係啦差唔多小息先問咁大段嘢，實比人小老母啦！好彩Miss都識做，微微一笑就話：「差唔多小息啦。你唔好搞到成班遲放啦。有問題午息或者放學再嚟問我啦。」Miss對我露出我從未見過嘅笑容，應該因為我主動問書令佢覺得欣慰。





我就係要呢啲！！

呢個時候打小息鐘，Miss就話：「科長，幫手派埋今日嘅功課。」

「等我嚟！」我又成個人彈起。

Miss個神情又變得更驚訝，佢應該諗緊我今日係咪食錯咗藥。只見Miss一時間反應唔嚟咁講：「咁⋯⋯班長你同科長一齊派啦。」

Miss吩咐完之後就走咗。我同阿偉兩兄弟就派埋今日嘅功課。期間我同佢邊派邊傾計，佢話：「匡哥你轉死性呀？」





佢又做一個「看透世事嘅樣」加一個「好撚想打柒佢嘅奸笑」。我話：「偉哥，我得罪咗Miss冇運行呀。梗係做乖仔啦。點敢得罪佢同埋佢後面啲仔sssss呀。」

阿偉冷冷一笑就話：「下話？我都收唔唔少風喎。洗唔洗過啲比你？等你快啲重建返個好印象比Miss睇嘛。」

「咁好死？」

「咁梗係要啲甜頭啦。」

「請你飲啡！」

「就咁話！」

然後我使出一招借花獻佛，將黎Sir送比Miss嘅咖啡轉贈比阿偉！於是我獲得非常珍貴嘅情報！

數學科主任陳Sir突然對文學好有興趣，問Miss借咗D書嚟睇。




圖書館主任張Sir最近Lunch成日落嚟教員室搵Miss，似乎想同Miss熟啲。聽講佢地好似有活動要夾。
周Sir想箍煲，但同一時間佢繼續針對緊Matthew師兄⋯⋯唉！聽講佢呢排成日開訓導會議，特登搞到Miss要好遲先走得。
黎Sir想追Miss，但極度淆底，威脅程度好低。
有好多九唔搭八嘅阿sir都想埋Miss身。

咦？阿偉比啲料都係同Miss啲狂風浪蝶有關嘅？阿偉呢條友仔⋯⋯唔係知道咗我鍾意Miss呀？

= = = = 

IG: ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #青春 #成長 #初戀 #戀愛 #中學