真人真事改篇﹕師生戀﹕《最接近的陌生距離》: 第九章之一

第二日，早上，男廁。

兩個尿兜前分別企咗兩個男仔痾緊尿，一高一矮。

「發仔，聽講你爭落幾份數學科功課喎。」

「嘩⋯⋯匡哥，揸緊水唔好講呢啲啦。你搞到我開晒叉啦！」

「拍硬檔，呢兩日交咗佢啦。」





「我有咩著數先？」

「屌。交功課你應份架嘛。」我打咗個尿震：「著數唔係冇嘅。廁格水箱上面收埋咗你想要嘅嘢。」

「屌⋯⋯未得嗰幾飛煙！」

「成盒呀柒頭！全新架！『人渣添』賣緊五蚊一飛。而家成盒比你呀！你鍾意拎去食 或者賣四蚊一飛比啲煙剷頂爛個市囉！」

「咁著數？」





「交唔交功課先？叫埋你啲老友幫幫手啦！」我：「我仲有貨呀。總之你冧得掂其他手足交功課嘅，我比晒你啦！」

「就咁話啦！」

拳撞拳！

= = = =

根據本偵測兵連日嚟收集到嘅情報得知，打第一堂鐘前五分鐘嘅教員室係幾乎屬「真空」狀態。Miss慣咗一早喺課室改簿，所以我先幫佢拎疊簿落佢位，借啲意潛入教員室。





「你兩個柒頭真係呢⋯⋯咁樣點媾女呀？」我望住Miss枱上面嘅禮物嘅苦笑又恥笑咁講。

一罐熱啡，兩張戲飛⋯⋯唔洗睇上面啲便條都知，呢兩份禮物係黎Sir同「中毒陳」送架啦！

我嘴角揚笑，使出一招「順手牽羊」，拎走呢兩份禮物。

= = = =

小息，課室。

「又一罐咖啡咋？」阿偉個樣唔多滿意。

「係咪咁計呀？幫下Miss追其他手足功課啦！」

「見係你咋。」阿偉擺個拳頭出嚟。





「Brother!」

撞拳！

= = = =

操場，小賣部前啲座位。

「杰少，條女媾成點呀？」我坐喺杰少對面，睇佢好愁咁吸緊維他奶。

「拎咗電話，傾咗一兩句。想同佢去玩，但呢排冇錢呀。唉⋯⋯唔通約出嚟數腳趾咩？」

「咁⋯⋯睇戲啱唔啱呀？」我喺佢面前Show咗兩張戲飛，係一套剛剛上映嘅愛情片。





杰少瞪大眼成隻狗公咁叫：「啱啊！啱啊！」

佢想一手搶戲飛，我就即刻縮手，一面自豪咁講：「咁你幫我做啲嘢先啦！」我心諗：「係幫我鍾意嘅人做啲嘢先！」

杰少有女媾就咩都得，拎咗張戲飛就答應我幫手。我行去露天操場，懷住愉快心情望去教員室嗰層，見到剛剛下課嘅Miss好匆忙咁返去教員室。

喺Miss返入去前，佢望咗去操場一眼。我同佢之間好似有一種連繫，彼此知道大家留意緊對方。

佢對我微笑。

我對佢揮手。

Miss表情變得好愉快，帶住笑容返去教員室。我被佢呢下微笑衝擊咗心靈，真係差少少就即場同佢表白。

總之，Miss Wong ! 我喺你唔開心時候，我一定有方法令你笑!令你開心返！





信匡哥，一定得！

= = = = = = 

IG: ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學