真人真事改篇﹕師生戀﹕《最接近的陌生距離》: 第十章之四

 
「人渣添」比周Sir 搞鳩完之後，成個人馴到好似錦羊咁。唔止親自同Miss道歉，仲交晒欠落嘅功課。查簿呢一關應該安全渡過。
 
不過Miss嘅男女緋聞呢一關未必咁易過。
 
我收到風加上我自己嘅觀察，周Sir喺「人渣添」呢件事上幫咗Miss好大忙，所以佢借啲意想同Miss搞返好啲關係。但Miss一直避開佢。不過任Miss點避都好，有啲嘢佢係已無辦法去阻止同改變——
 
「Miss Wong搞人老公。」、「Miss Wong 收學生做兵。」、「Miss Wong衣著唔檢點」⋯⋯⋯⋯
 
呢啲秘密最多都係老師之間流傳。但近日多咗喺學生之間聽到呢啲說話。




 
我見到Miss唔止好疲累，仲好似成身傷晒，個心流緊血。即使如此⋯⋯
 
「⋯⋯記得啦！小測係一定會咁問。你地一定要識睇問題，明明識做但睇錯問題。好唔抵呀⋯⋯」
 
佢依然將呢啲痛苦收埋，盡心盡力教我地班。冇被個人情緒所影響。
 
「⋯⋯唔阻呀！係咪要問功課？嚟呀，我教你呀。」
 
佢每日連食飯時間都要去教學生。有時⋯⋯我知架！我見到架！佢有時真係連飯都冇食就捱咗一日啊！




 
「⋯⋯杰少，你爸爸好返未？冇事就好啦，你一定要大個仔啦，唔好掛住玩。你讀好啲書當幫爸爸啦。」
 
有次杰少老豆做地盤時跌斷腳，杰少down到喺學校爆喊。Miss即使傷晒，但佢仍然將心比心去愛自己每一個學生。佢呢份溫柔唔係我專屬，佢都對每一個學生都係咁溫柔。
 
「⋯⋯阿添，記得唔好再打交啦。你有冇受傷呀？」
 
即使對佢差嘅學生，Miss都一樣照去關心。
 
任呢個世界點去傷害Miss， Miss仍然做好佢本分。




 
呢間學校未必個個人都了解Miss，佢未必係一個可以討全校學生喜愛嘅老師。即使好多流言將佢形象破壞晒。但至少，我地4A班喺Miss努力教導、無盡嘅愛同關心之下，我地知道黃梓盈絕對係一位好老師！絕對唔係啲流言所講嘅咁差！
 
「⋯⋯邊個再叫我做女王大人嘅，我就⋯⋯唉！你地鍾意點叫就點叫啦！」
 
Miss感受到我地班好錫佢，佢無奈咁接受「女王大人」呢個花名。
 
面對種種壓力同失敗，或者⋯⋯
 
「⋯⋯嗱！我要見到大家笑到見晒牙架！哈⋯⋯1、2、3⋯⋯」
 
卡嚓——！
 
面對流言蜚語，或者⋯⋯
 




「⋯⋯4A班！仲記唔記得我親自設計嘅4A手勢點做？下一張相我要個個都做到架！」
 
「Yes ! Your Majesty!」
 
或者⋯⋯我地4A班就係Miss堅持繼續教書嘅原因。
 
「班長，記得笑呀！仲有呢個動作呀!」Miss向我做出salior moon嘅出場動作。
 
影班相嗰日，我係班長，坐喺我心愛嘅人隔離。我所深愛嘅人佢笑嘅時候係最靚。只係呢日，佢嘅笑容之下有一種悲傷。佢面對鏡頭卻選擇微笑應對，就好似佢面對一個多月以嚟嘅種種困難咁，用微笑化解一切憂慮。
 
卡嚓——！
 
最終張班相，由於我掛住望住佢，因而成為全班最唔合群嘅一個。
 
 




= = = =
 
 
 
我同Miss關係慚慚正常返，朝早同阿偉佢地做壁報，放學就去Miss負責嘅留堂班Sit 堂。就好似發生陷害「人渣添」事件之前咁。
 
正常⋯⋯其實我又唔覺得變到好似之前咁。總覺得Miss唔多想同我傾太多學習以外嘅嘢。我又唔太想做好多越界嘅嘢。應該話⋯⋯我唔敢妄想Miss可以做我女朋友。我專心做佢兵仔就夠。
 
不過今日我收到一個好差嘅消息——Matthew因為情緒病復發而決定退學。搞到Miss全日都唔多點講嘢，中文堂用突擊測驗嚟攝時間。雖然我唔知道Miss同Matthew 有冇一齊過，但我知Miss一直都好擔心Matthew。亦都因為Matthew, Miss被部分嘅中七師兄怪責。指佢明明同周Sir拍拖，但仲Flirt  Matthew，搞到佢比周Sir迫害。 今日Matthew退學，唔只令Miss傷心，亦都會令佢背脊中箭。
 
睇住Miss孤獨咁望遠景，我真係好想幫佢。

= = = = 

ig: ar_hong_91





#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學