真人真事改篇﹕師生戀﹕《最接近的陌生距離》: 第十二章之二

「真係得？」我喺試身室走出黎，一面懷疑咁講。我真係睇唔慣自己唔係著波衫同校服嘅樣。

Miss由頭望我落腳，好細心咁諗左一諗。然後又拎一件tee喺我身上面度一度。

「你生得高，膀頭又寬。要著得好睇唔難嘅。」Miss轉一轉頭同sales講：「要呢件。」

「fasion 呢啲我真係唔識。」

Miss又拎左件tee喺我身上左度右度，話：「唔得咁架。如果唔係點識女仔呀。」佢轉個頭又同sale講：「呢件唔要」





「哈哈⋯⋯我識左你都夠啦！」

「低B仔!」Miss敲一敲我個頭：「我點同呀。我係你Miss呀。」佢將條牛仔褲塞比我，又話：「入去試。」

我刪埋試身室度門，思考Miss頭先講嗰句，心入面有個疑問好想講出口。正因為隔左度門，我可能大膽左，我就話：「其實⋯⋯我地真係唔得？」

門外Miss冇出聲。佢可能聽唔到，我就清晰啲講多一次：「阿盈，我地有冇可能可以一齊？我指⋯⋯我地兩個拍拖。」

Miss都係冇認我⋯⋯死啦！係咪嚇親佢？ 估唔到我一匿埋就咁大膽，講完的又有啲慌又後悔添！





於是我開返度門，發現Miss原來行開左傾緊電話。見到佢個樣好煩躁，十成又係學校啲野。 Miss見到我出黎，佢就笑返，仲拿拿聲cut線。

「喂！好靚仔喎！轉個圈睇下！」

我聽Miss話轉左個圈。

「好fit呀！就呢條褲啦。」

我入去試身室換衫前，不忘咁問Miss一句：「 係呢,Miss頭先我講嘅野你有冇聽到？」





「sorry, 剛才學校打比我。你有野想同我講？」

好彩冇聽到咋。

我靈機一轉，就話：「啊冇嘢，我想講我學生哥呢咋，呢度啲衫唔平⋯⋯」

Miss溫柔咁笑：「得啦。唔好同我客氣。」

「唔係咁好嘅。」

「活動物資呢架！低B仔!」Miss好嬲又好笑咁講。

= = = =

買下野試下衫，已經用左兩粒鐘。 Miss唔止要我換左新衫同新鞋，仲去左買啲Gel， 即場幫我Gel頭。





「搞店晒！」Miss好滿意咁講。

我照下鏡，又真係靚仔左。 我好驚訝望住Miss。

「你地男仔扮靚比女仔易。特別你高大黑實，比心機執下就得啦。」

我當下唔知講咩好。 但我可肯定係Miss對同佢出街嘅人好有要求。都正常嘅，佢咁靚當然想泊埋嘅人都一樣咁靚啦。我又諗多一層，點解佢要花時間執我外表呢？明明今日佢可以hea應我一兩個鐘都得架喎？

「有啲口渴添。不如去飲野？」

「好呀！去七仔買。」

「七你個頭！」





「啊！我仲唔比我等到你講粗口啦！」

「咩呀！」

「你講你個柒頭呀嘛！」

「哎呀！係咪要我記你小過！記你大過！」

Miss一路打一路笑，同我一齊去到台式飲品店。

「奶蓋系列呀⋯⋯」Miss已經完全少女化咁望住餐牌，兩隻手指頭點一點咁：「好想飲。」

「嗌囉。」

Miss指住自己條蛇腰：「Keep緊fit.」 做咗個無辜樣，點緊手指。





「咁無糖烏龍茶囉。」

「都好嘅。」Miss轉頭同店員講：「唔該一杯無糖烏龍茶。一杯奶蓋紅茶，要多甜。」

「吓？Miss我唔係飲呢款喎。」

「信我，好好飲。」Miss比左個Ok手勢。

唉，佢又港女病發作。

等左陣，兩杯野飲已經到左手

「我唔客氣啦。」Miss將杯野飲貼一貼面龐，微笑。





我試吓Miss推介嘅奶蓋紅茶到底有幾好飲。

「點呀，係咪好好飲？」Miss吸左啖茶問我。

「啲芝士好香。好好飲。」

「真係？」

說時遲 那時快，Miss唔客氣咁拎左我杯野。飲管都冇換就飲左我杯野飲。

「唔！真係真係好好飲呀！」Miss好滿足咁講。

呢個時候我都未意識到當下發生嘅事，Miss將佢杯茶交比我，話：「你飲呢杯啦。」

原來Miss根本想飲奶蓋紅茶，最終搵我過橋。 我拎住佢杯野真係唔識反應。 望住飲管上一抹淡淡嘅紅唇印，我心裡有一種感覺湧緊上黎。

「我地黎緊去邊呀？」我笑住講，已經飲左啖茶。

唔知點解，明明係無糖嘅烏龍茶，但我飲出甜味。

係幸福嘅味道。

= = = = 

ig: ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學