真人真事改篇﹕師生戀﹕《最接近的陌生距離》: 第十四章之二

我嚇左一跳：「咩呀？」偉哥身為我地四兄弟中嘅大哥，佢一咁講就真係唔講得笑！

「哦！你媾左Miss?!」阿波好真心咁講。

「細聲啲啦喂！」我真心驚左，反應都真心埋！

「挑！你hea鬼我地都唔洗搵Miss扮係你條女架嘛！」

聽到阿偉呢句我就放心晒。大哥質疑得嘅，阿波同杰少都唔會出聲。然後我苦笑咁講：「咁⋯⋯我女友唔比我講嘛。你地又要聽。咁我未⋯⋯」





「玩嘢咩！Miss點會睇得上學生呀！你睇下。」阿波指去Miss度：「輪都輪到黎Sir先啦。」

我聽完阿波咁講就遠望過去。發現一個身材高大，但傻頭傻腦而且好薯氣嘅阿Sir已經接近左Miss。

「全校都知黎Sir鍾意Miss Wong架啦。」阿波好真心咁講：「佢地都幾襯呀！」

我兜野拍佢個頭：「收聲啦肥波！」然後盡量保持冷靜咁行埋去Miss到。

= = = = =





「 Miss! 」 我喺Miss面前出現：「洗唔洗去拎野？我幫你呀。」

「我又幫手。」阿波攝埋黎。

「我都得唧！」杰少後來居上，將本身身材圓矮嘅肥波禁低左。

「Bonjour。」阿偉向Miss送左個飛吻。

Miss見我地煎釀四寶出場，都忍唔住笑左出聲:「你地又黎搞事呀？哈哈⋯⋯」





黎Sir仲係好唔識趣咁繼續緊佢原本同Miss講緊嘅話題：「⋯⋯電腦黎講呢，我覺得有個牌子係幾好⋯⋯」

「黎Sir!」我舉起手。

「係，同學有咩幫到你？」黎Sir戇戇居居咁講

「就打鐘，你要準備上堂啦。」我。

黎Sir瞪一瞪眼吃左一驚，醒悟自己要上堂教書：「Miss Wong 我地傾到呢度先。關於電腦問題可以放學再傾。」

黎Sir行開左走唔夠幾步，又補多句：「Miss Wong, 今日Lunch我幫你叫埋外賣。想食住飯同你夾埋下星期中文週活動細節。」

Miss好有禮貌咁揮手：「今日我帶左沙律。各自食完再傾啦。」

黎Sir戇居居咁點下頭，笑容好滿足咁走左。





呢個時候我回望Miss， Miss向我偷笑，眼神充滿謝意。我應該救佢救得非常合時！

「上堂啦喎！你地快啲返課室啦！」Miss扮惡，實際對我地好寬容。

「唔緊要啦！都係你嘅堂唧！」我語氣輕浮咁講。

Miss聽完有一下不滿，話：「想持熟賣熟？」聽落似係有另一層意思。

「唔係呀Miss！」阿波真係好似個波咁喺Miss面前彈下彈下咁講：「我地真係想幫你搬下野架！」

Miss望到阿波彈到震晒嘅肥肉就笑到收唔到聲。

「女王陛下，騎士聽候差遣！」杰少。





「你咪亂講呀！」Miss笑罵住杰少。

阿偉緊接住扮晒識法文咁再黎一個紳士式嘅鞠躬禮。

「好啦好啦。怕左你地四個啦！」

然後我地一齊去教員室。呢個時候我又諗到啲屎橋，有班兄弟掩護住，咁我痴住Miss都唔會咁覺眼呀！

於是我特登行慢啲，同阿偉佢地三個拉開少少距離。Miss都好有默契咁行慢啲啲，同我步速一致。

呢個時候我終於忍唔住，想喺冇咩人留意之下，拖住Miss隻手。

當我掂到佢手背時，Miss輕輕咁叫左聲：「喂！」

我望埋去，Miss一面抱怨，佢細聲話：「而家喺學校呀！」





我扮到好似腹語咁，將聲音壓低，嘴巴盡量唔做口形，話：「我成日冇見你呀嘛。」

「我夠係囉！」

Miss講完之後我地互相對望而笑。

呢一笑我放心晒。老實講，我真係好怕因為一日見唔到Miss而令到感情掉淡左。但好彩Miss同我一樣都係咁掛住對方。

「一唔一齊Lunch?」

「玩嘢咩？我有邊一日唔係要管住你班馬騮食Lunch呀？」

「又係喎！」





「低B仔！嘻！」

我同Miss好有默契咁利用四圍嘅噪音掩護之下打情罵俏。我留意到Miss笑得好開心，呢刻嘅佢變返做我女朋友。

「頭先我黎救你。快啲多謝我啦。」

「你呷醋咋？」

「係架。」

「嘻⋯⋯！低B仔，賠返罐咖啡比黎Sir未？」

「得閒先啦！」

「作死你呀？」

「放學一齊走？」

「要Pick中文週活動啲禮物包呀。」

「我黎幫手，快手搞掂！」

「你咪搞亂檔添呀！」

我地又對望一下，笑左一下。唉，最衰而家喺學校。如果唔係、我一定好好咁Kiss Miss。

「Miss! 講個秘密你知！」前面嘅阿波突然回頭望住我地。

「有咩秘密咁想比我知呢？」Miss滿心期待

本來個氣氛係好sweet 好開心嘅，但我有不祥預感——

因為呢條肥仔想——爆料呀！

= = = = 

ig: ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學