真人真事改篇﹕師生戀﹕《最接近的陌生距離》: 第十九章之一

唉，今次約會又係打左個靚嘅上半場，但衰左下半場，仲要冇加時添。
 
Miss情緒低落又累，所以送到佢樓下時除左攬攬錫錫左一陣，就目送Miss返上樓。
 
而家得返我自己一個，內心因為自己嘅無能覺得好難過。呢一刻我需要兄弟。
 
「偉哥⋯⋯」我打左比阿偉。
 
「咩事呀大佬？你朋友拍拖拍成點呀？咁早打黎⋯⋯冇下文咩？」
 




「下咩文呀，奶左野啦。」
 
然後我一五一十咁將今日撞到周Sir嘅事同阿偉講左。
 
「我朋友覺得佢同女友嘅差距好大，原來段關係剩係靠鍾意去維持係唔夠。我朋友佢⋯⋯佢覺得自己好廢。」
 
「你朋友覺得自己廢係好正常架喎。」
 
「講咩呀衰佬。」
 




「你叫佢揀一個十六歲嘅女仔做女朋友，未唔覺得廢囉。」
 
「都唔知你講咩！」九唔搭八，聽到我有啲燥。
 
「你朋友同個大人比較就一定點睇都覺自己廢架啦！」佢停左一陣，又繼續：「同返同年紀嘅人一齊，你唔單只唔會覺得自己廢。你仲可以幫佢承擔添。」
 
「你想我朋友同女友分手？」
 
「傻啦！我先唔想。呢一對我真心開心，比我就做佢地婚禮MC喇！我想講嘅係，既然覺得自己廢就唔好鑽牛尖！」
 




然後佢又講一啲好懶係有智慧嘅說話。
 
「唔係諗自己冇嘅嘢。係諗自己有嘅嘢。」
 
佢收線⋯⋯頂呀，唔係好明條撚樣講咩添！
 
 
= =  = =
 
 
「唔好諗自己冇嘅嘢，要諗自己有嘅嘢。」
 
我思考緊阿偉比我嘅金句，由返歸嘅路到而家撻左喺床上面都一直諗緊。
 
咁我有啲咩可以幫到Miss呀？




 
 
然後好快又到星期一。 Miss琴日都冇咩點同我Whatapps, 我估佢又忙又心情差。所以唔想比野佢煩，今日我好乖咁準時返學。亦都因為Miss提出嘅計劃，今日一定要交齊功課，所以我好早就返到學校，趁有時間做埋啲功課佢。
 
⋯⋯當然都係問人借黎抄架啦。
 
抄到咁上下，功課都做完。同學都差唔多返晒黎，我就見到戴住眼鏡嘅Miss都入左課室。
 
 
「Good morning class .」
 
 
Miss低一低頭，然後下意識望左我一眼，我地忍唔住互相微微一笑。Miss好似想藉住呢一下笑同我講唔洗擔心。
 
 




「Good morning Miss Wong！」 我首先帶住全班講。
 
「Sit down. 」
 
 
Miss又變返以前咁，嚴肅多過笑容。但我知道佢都係心事重重。佢平時戴開con, 但今日就戴左眼鏡，應該就想遮住喊到腫晒嘅雙眼。
 
唉⋯⋯琴日佢⋯⋯唉⋯⋯
 
第一堂都係班主任搞下班務，要我地乖乖交出手機，同埋收功課。
 
以前收功課就非常精彩，冇交功課嘅人就會比Miss一字排開咁捉出黎行刑。Miss Check有冇欠交嘅效率好高，好快就知道邊個冇功課交。好快黑板前就企左一排等候打靶嘅人。
 
Miss望住冇交功課嘅人，再望返我，好似有啲驚訝我竟然交齊功課。呢個時候我終於見到佢有一下好真心嘅微笑。
 




「你地識做啦。今日留堂。」
 
Miss少有地冇鬧人，可能因為我關係哄到Miss. 哼⋯⋯你班友仔抵請食飯啦。
 
呢個時候我又望一望阿偉，見佢對住我做左敬禮嘅動作⋯⋯唔知點解，我覺得佢好似感覺到我明白左佢前晚嗰句說話嘅意思。
 
 
「唔好諗自己冇嘅嘢，要諗自己有嘅嘢。」
 
 
我好似⋯⋯明白左少少。

= = = =
 
ig: ar_hong_91




 
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學