真人真事改篇﹕師生戀﹕《最接近的陌生距離》: 第十九章之六

狗公危機仍未解除，Miss仍然好危險。
 
周Sir打算離婚件事應該仲未成事，但唔排除有一日佢真係離左婚。咁Miss就一定比人話係狐狸精。不過我暫時處理唔到，所以只好擺埋一邊，處理眼前嘅危機先。
 
其實放學嘅危機係最大，因為Miss同周Sir同埋成個訓導組一齊開會。我估佢都係想借啲意開到夜一夜，咁周Sir就可以送Miss返去。女人一上狗公車基本上渣都冇。雖然Miss一定唔會上佢車，但係我都唔可以咁老定。
 
所以放學我幫手搞埋中文週活動嘅嘢，就留低溫下書。反正我有一個遠大嘅破處計劃！溫書打發一下時間都算係一舉兩得呀！
 
為左唔好咁顯眼比人覺得我等Miss， 我拉埋阿偉落水。終於，喺晚上七半，Miss開完會。
 




佢一面疲態咁喺會議室行出黎，黎Sir仲好有精力咁喺Miss隔離R水吹。Miss個樣真係萬念俱灰咁。
 
「Hi Miss。」我走上前。
 
「你做咩仲喺度架？」
 
我都未應Miss，周Sir又殺出，話：「Miss Wong想同你夾埋聽日早會嘅PPT。」
 
「唔需要架啦。我知自己嗰part講咩。」Miss好有禮貌咁對住周Sir咁笑：「你理掂自己先啦。」
 




周Sir好似仲想搵機會咁，佢企左旁邊，同其他老師吹水。
 
「你同阿偉仲唔走？成七點啦！」Miss。
 
「個傻佬話溫書喎。」阿偉就黎瞓著
 
「係呀！你知點解架？」我輕輕咁望左周Sir一眼。
 
Miss微笑左一下，話：「咁你溫左啲咩？有冇溫英文？」
 




「有⋯⋯有啊！」我覺得Miss咁樣問係有佢原因，所以點都答左有先。
 
「咁你有冇唔明嘅地方？」Miss.
 
「有呀！都⋯⋯好多唔明呀！」
 
「嗯，不如我地順手坐Miss Lau車一齊走。你又可以一次過問中文同英文嘅嘢囉！」Miss
 
我明白左Miss用意！如果我扮問佢功課，最終都係同Miss各自返去，周sir就有機可乘。但問埋英文就唔同！可以順手坐Miss Lau車呀！Miss Lau同Miss個關係唔錯，可以幫上忙！
 
然後我、Miss同阿偉一齊搵Miss Lau。 期間，我好似感受到周Sir勁不忿咁望住我地一齊走。
 
終於我地成功上到Miss Lau車，一齊離開學校。
 
大戰狗公嘅第一日，大獲全勝！！




 
 
= = = =
 
 
打贏第一場，以後仲有第二場。
 
第二日早上。
 
我剛剛踏入校門冇耐，有一個碩大嘅身影擋住左我。
 
「早晨呀！同學。」
 
成身體育裝嘅周Sir好友善咁同我打招呼。但佢嘅友善總係令人覺得恐怖同作嘔。
 




「阿Sir早晨。」為左唔想比佢為難，我好有禮貌咁講。
 
「有啲嘢想同你傾。你而家同我去一去訓導室。」
 
一大清早就要入「臭格」？死⋯⋯我有不祥嘅預感。
 
當周Sir圍住我打量一番時，就話：「⋯⋯今日你著PE衫，難怪⋯⋯」
 
周Sir故弄玄虛咁講，更令我感到不安。
 
「去到訓導室後，我要你答到我呢條問題。」
 
到底咩問題呀？
 
佢埋黎我耳邊講左一句，我即刻全身冒出冷汗！




 
.
.
.
 
「剛剛嘅星期六你去左邊？」
 
聽罷，我瞳孔立即收縮！
 
= = = =
 
ig: ar_hong_91
 
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學