真人真事改篇﹕師生戀﹕《最接近的陌生距離》: 第二十一章之五
喺一陣議論嘅聲音之後，應該支持同反對嘅老師都各半。喺議論最激烈時，我聽到副校長話：「唔需要再討論，周Sir請你繼續聯絡受傷同學嘅家長，我地散會。」
然後我聽到隔離議會室嘅人慢慢散去。不久之後，訓導室嘅門打開左，Miss好走左入黎，抱左我一下。
「Miss,度門仲開住架！」呢次到我仲驚過佢。
Miss好快咁放開我，我而家先見到佢隻眼已經腫晒。佢呢個樣好似一把刀插落我個心度。佢當眾被周Sir侮辱，佢受左好大委屈。
我突然諗起，如果我忍得住唔打偷拍裙底嘅肥B，而係喝止佢，我諗Miss唔需要為我背負咁大壓力！承受咁大嘅委屈。
「Miss， 對唔住。係我衝動。」我開始抽泣起黎：「對唔住，要你受委屈。」
Miss搖搖頭，努力唔比自己喊：「我講過，冇人可以傷害你！」
我同Miss都用各自嘅方法保護緊對方。任世界再點樣打擊我地，我同Miss應該可以捱得過吧？
呢個時候黎Sir入埋黎，我記得頭先佢為我辯護，我個心好感激佢。
「黎Sir，頭先好多謝你。」Miss心存感激。
「你地抹左啲眼淚先。」黎Sir好戇直咁比左紙巾我同Miss:「唔好客氣。我覺得要講公道，同埋要諗點教好學生。」
黎Sir一離開戰場，又變返長氣傻佬。佢繼續講：「阿匡，你要知道你情況唔樂觀。你比人記多兩個大過你就唔需要考試。變相你唔洗升班。到時升學組就建議你轉校，變相唔洗學校趕你，你都要走。」
「而家你有兩個小過。儲夠三個小過就一個大過。」Miss接住解釋：「即係話，你再比人記一個小過同一個大過，你就有兩個大過。」
「或者記你四個小過。」
「欠交功課同遲到就最易儲左啲小過返黎。」Miss愈講愈嬲：「叫左你平時交齊功課啦！而家出事啦！」
我冇反駁理由，我將個頭放得好低。
「唔洗驚嘅！我同Miss Wong一定幫你！」黎Sir :「我信阿匡你一定冇事。」
呢個傻佬講嘢又幾鼓勵。我好難得喺Miss眼中閃過一下欣賞。
「時間唔早，一齊走啦。」黎Sir。
呢頭讚完黎Sir,嗰頭佢就借頭借路痴落Miss度。
「黎Sir, 我跟開Miss Lau車。反而想你可以送阿匡返去。今日佢打傷嘅同學係有黑社會背景架。」Miss：「我擔心佢會被人尋仇。」
「唔洗擔心！包喺我身上！我去執嘢先。」黎Sir先行離開。
Miss望多我一眼，有啲擔心同不捨，話：「我去執埋今日嘅功課比你。」
當佢想走嘅時候，一個健碩男人擋住喺門口。佢嘅氣勢大到令Miss後退左幾步。呢個男人全身上下散發出令我同Miss生厭、憤怒嘅氣息——周Sir.
周Sir打量左Miss一眼，Miss不甘示弱好嬲咁望住佢。
「真係佢？」周Sir指住我：「細路黎架咋！」
好明顯佢講緊我同Miss嘅情侶關係。
「唔關你事。」Miss語氣平淡，做隱藏濃濃嘅怒意。
周Sir冷冷一笑，話：「我為左你決定離婚。你咁樣報答我？」
「呢個係你嘅選擇。唔關我事！」Miss唔再驚佢恃勢凌人，說話針鋒相對。
「當初你話過考慮我⋯⋯好啊。你好嘢。」周Sir望左我一眼，再同Miss講：「我郁親佢你會好心痛架可？」
周Sir慢慢走埋黎，我不甘示弱企起身同佢對峙！
「你地啲嘢唔見得光架。」周Sir:「睇你地Sweet得幾耐！」講完佢就慢慢離開訓導室。
咁大個仔第一次咁樣被人威脅，我冷汗都標晒出黎。我望返Miss，佢都被嚇到唔敢出聲。
= = = =
嗰晚返去，基本上都瞓唔著。我除左做一啲唔識嘅功課外，亦都諗緊我同Miss問題。
數下手指，我同Miss一齊左兩星期都唔夠。短短兩星期就發生咁多事，難道我真係唔可以同Miss一齊？我同佢嘅將來會變成點呢？
好快，又到第二日。周Sir繼續守喺門口捉人頭髮儀容。仇人見面，當然要互相怒視一番！
「準時喎。」周Sir:「驚比我記小過？」
「做門口狗就唔好咁多嗲啦。」
周Sir被我串到冇聲出，但我邊行邊回望佢時，我覺得佢嘅笑容有啲古怪。
然後我自行去「臭格」隔離⋯⋯可惡！最應該罰嘅垃圾竟然冇事！
而家唔係自曝自棄嘅時候。我唔可以衰比周Sir睇。亦都唔可以再比麻煩Miss。由今日起執返正自己應該仲救得切！
「好！開波溫書。」我打開我最弱嘅英文科。
呢個時候我好似忘記左Miss幫我訂下嘅「破處大計」。我個心唔單單係為左破處，而係望遠多少少——
「唔好衝動。要大個仔。要阿盈放心。」
係，呢個就係我被隔離停課時比自己目標。
聽落好似好熱血係咪？
鐘聲後，第一堂過去，有個校工入左黎訓導室。
「謝子匡同學，請而家去副校長室。」
副校長室？咩事呢？
我行緊去副校長時，我個心就愈來愈不安⋯⋯
副校長室門前，我敲一敲門。
「come in！」
我推開門，我見到議會桌已坐滿晒人。 主席位嘅副校長一面嚴肅，坐佢旁邊嘅周Sir露出一個好期待嘅笑容。而喺我面前嘅，係一個我熟悉、每日都牽掛嘅背影。我慢慢走近面前嘅背影，喺佢旁邊嘅座位坐低。我自然地望佢一眼⋯⋯
「Miss?」
Miss一面冷靜，對住我笑，但我感受到佢驚得好厲害！
「好！人齊，我地開始。」副校長唔知點解比我感覺好似宣布行刑咁嘅？
副校長除低佢粗框眼鏡，好似想增加嚴肅感，佢話：「謝子匡！你必須誠實咁回答我問題。」
我點左下頭。
.
.
.
.
「你同黃梓盈老師到底係咩關係？」
我全身血液凝結。
周Sir雙眼露出期待的目光。
= = = =
ar-hong_91
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師