真人真事改篇﹕師生戀﹕《最接近的陌生距離》: 第二十二章之二

「因為阿匡最幫得手，所以我搵佢囉。」Miss，理由簡單直接合理。

副校長都知其實再問都查唔到啲咩，所以冇再追問。

我內心叫左一聲，好彩，暫時都仲守到。

過左一陣，副校長又問：「咁上星期六呢。你地兩個去左邊？」

感覺場波打法唔同左。





偉神啊，求你比指引我呀。

= = = =

「如果周Sir報串，佢應該會同人講佢見到嘅嘢。包括你朋友同女友當時做緊啲咩。小心問問題嘅人，佢一定設左啲陷阱引你去答佢地想聽嘅答案。但有一個不變嘅原則係如果冇實質證據，佢地都係拋你浪頭唧。你小心答就唔洗射佢啦！」1

= = = =

「咁上星期六呢。你地兩個去左邊？」





魔鬼在細節，「你地」呢兩個字擺明想引導我去諗拍拖啲嘢，然後引我講錯左嘢。

但係要點回答呢？

呢一條係唔可以諗咁耐，愈諗得耐就愈被人懷疑！

所以⋯⋯

「我去左拍拖。」





Miss隻手好不安咁搣倒刺。我感受副校長有一下「係呢個啦！」咁嘅神情。

「你指你同Miss Wong兩個去拍拖？」

鎮定！鎮定！

「鍾副校，有冇聽到架？係我去拍拖呀。Miss Wong係咪拍拖我就唔知喇。」

「你同邊個拍拖？去邊度拍？」副校長連環出招。

我鬆一鬆肩，我話：「星期六私人時間，唔需要同學校交代架喎。我女朋友係邊個，你地都冇權知。」

「謝子匡你應該都知自己琴日記左兩個小過架嘛？」周Sir好唔耐煩，好囂張咁講：「我係你就合作啲。」

= = = =





「問到咁上下佢地就用權力嚇你。唔使驚，老師點都有道德包袱，佢唔會夾硬黎。不過隻假狗就例外。但點都好，據理力爭就得！」

= = = =

阿偉啊——！來生我地一定要再做兄弟呀！

「答嘢啦！你星期六同邊個拍拖，去邊度拍拖呀。」周Sir。

「答呢條問題之前，我想望下校規。我指大家要一齊睇睇校規。」我不慌不忙咁講：「而家你地用權力迫我公開自己私隱。我想睇下係邊條校規係一定要配合老師嘅要求。」

「唔好扮嘢！你係咪不聽從師長指示！」周Sir一味嚇：「嗱！校規呀！送多你一個小過添呀。」

「周Sir⋯⋯」諗返佢琴日點對我，我條氣就好唔順，我忍唔住點都要揪佢一句：「要做警察就返警局啦。唔好偷雞摸狗喺學校扮差人。呢度唔係幼稚園，唔會玩扮演遊戲架。」





周Sir激到咬一咬牙，應該想爆粗。

我再同副校長講：「答冇問題呀，但老師唔係警察，唔洗靠嚇架嘛。咁不如睇左校規先。啊⋯⋯係啦！我咁啱有一本手冊喺身。」

就咁嘅，呢個係小學嘅創傷，當年又係比變態老師蝦。佢會突擊我背校規。所以當時真係要溫校規。係，你哋冇聽錯，係「溫」書個「溫」呀！所以去到中學我都會帶住本手冊喺身⋯⋯唉都唔知我係咪比佢搞到有病。

我揭開手冊，話：「不如由第一條講起先啦，我認為要每一隻字都要細心研究同斟酌，第一條：學生⋯⋯」

呢個時候，我又聽到偉神嘅金句。

.

「拉布，浪費佢地時間！」

.





老師忙到癲，每秒鐘都好寶貴，佢一定驚我咁玩。

果然——

「得得得！你唔透露都得嘅！」副校長好無奈咁講，佢轉頭就好嚴肅咁同Miss講：「咁你呢？Miss Wong. 星期六你去左邊？」

我就暫時踢完，又睇你啦Miss。 因為係我難以控制嘅部份，所以我都有啲緊張起黎。

= = = = =

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師