真人真事改篇﹕師生戀﹕《最接近的陌生距離》: 第二十五章之四
「你以為離婚有咩！阿盈唔會鍾意你架！你條狗公就係想呃閪屌！為咗屌閪，你咩都做得出！你陷害阿盈係第三者都在所不惜呀！」我被佢再用力扭手腕，我叫咗一聲，再大叫：「你以為自己好有型咩？呢度冇人鍾意你呀！去到你三十幾歲人仲要靠食女攞威！你講出黎唔醜架咩！我鄙視你呀！」
然後我將視線望返去一眾老師，冤屈嘅心情令我再忍唔住啲淚水，大叫：「你地都一樣呀！所有老師都一樣！你任由隻狗公橫行霸道，眼白白睇住我點樣比隻狗公迫害都唔幫我！你地狼狽為奸！！枉！為！人！師！」
我聽到啲掌聲同歡呼聲喺身邊四周而黎。應該係圍觀嘅同學聽到之後覺得我實在講得太啱。
我繼續向老師控訴：「佢搞啲傳聞出黎中傷Miss，你地冇人幫Miss Wong 不特止，你地竟然全部都信！你地冇腦架咩？你地冇是非觀念架咩？寧願圍埋一齊中傷Miss，都冇人幫佢講公道說話！！你地好卑鄙！為人師表？好噁心啊！！」
喺我眼中呢班老師每一個都有份蝦Miss！此時，我回望旁邊嘅Miss，佢已經雙眼通紅。
「仲有啊！狗公周！上星期三晚我睇住你去咗時鐘酒店架！」
你有訓導光環呀嘛，我就幫你拆左佢！
我今日就係要你收皮呀狗公周！！
「你唔好再亂講啊！」周Sir嬲到想一下扭斷我隻手：「你試下再講多次！」
「你同人3p啊！我講十次都仲得呀！夠膽同而家對住咁多老師、家長講你冇做過！驚呀！我咩都知！我要話比所有人知！你係個人渣！人渣！人渣————！！」
周Sir嬲到好想似一拳打暈我！
呢個時候有個人介入左，好用力咁捉實周Sir想打落黎嘅拳頭。
「周Sir! 學生唔係犯人，你咁樣用左過份嘅武力！家長已經喺度，而家好難睇呀！快啲收手啦！」
講嘢咁鬼死長氣嘅，一聽就知係黎Sir啦！
「你唔可以再咁樣壓住個學生。立即你放開佢！」
「佢情緒失控！仲打傷左同學！我要制服佢！」周Sir好嬲，實際上我焗咗佢上賊船。佢一放走我，我就打肥B！將件事搞到極度難睇！
「唔需要！我已經通知左社工！而家由輔導組處理！」黎Sir兼住輔導組主任，佢有呢個權力：「再咁落去我會報警！唔想呢件事難睇就收手！」
「呢個學生嚴重違規！訓導有權首先處理！」周Sir好飲獅子咆哮:「唔好好教訓佢，佢連老師都打埋呀！我都比佢打咗呀！」
「而家係學生情緒問題可能會引發危險！必需首先安撫學生情緒！」黎SIR繼續同佢據理力爭：「我同樣以訓導老師身份，我要協助處理呢個學生！」
「唔得！佢係我嘅！我要好好咁招呼佢！」
周Sir再力扭我手腕，我不斷痛叫！
「佢隻手就斷啦！你停手啊！」Miss吶喊。
「周Sir!你立即停止使用武力！周Sir,學校最唔想見報？你咁做係好危險架！」
黎Sir嘅說話令周Sir遲疑起黎。
旁觀嘅人都議論紛紛。就係呢個時候——
「發生咩事！周Sir,你點解要咁樣撳住個學生？」
然後我見到有一個衣著端莊嘅男人喺人群中穿出，我望見呢個男人我不禁笑大笑——
「哈⋯⋯哈⋯⋯⋯⋯我贏咗啦。狗公！」
呢個衣著端莊嘅男人，就係校長！1
周Sir本來想放開我，但被我挑釁之下，佢又嬲又唔想放手。我嫌畫面唔夠難睇，於是我再講多句：「我最多被人記過咋。你呢？你保唔保得住份工呀？死狗公！」
講完之後，我即刻望住校長谷返啲眼淚出黎慘叫：「阿Sir!唔好啊！我隻手就斷啦！！斷啦！！我知錯啦⋯⋯我知錯啦⋯⋯」
「周Sir！你仲唔放開佢？！」校長上前，壓低把聲同佢講：「成班家長睇住架！你點解要咁做呀？！」
「呢個學生頭先打人啊！仲打埋我呀！」周Sir慢慢放開我後，向我怒目而視，對校長講：「佢失晒控當眾毆打同學呀！我唔制服佢點得呀！！」
校長瞪大對眼，強忍怒意，就回頭向一眾老師問：「其他老師冇幫手咩？」
「黎Sir一直想幫手。」Miss上前急忙咁向校長話：「但周Sir拒絕！佢一心想整死我班個學生呀！」
校長聽完之後，兩手揸實咗，深呼吸一下再壓住怒意。
我望住周Sir好滿足咁微笑，呢招苦肉計一定可以整死你！見到佢而家慘過食屎嘅樣，我有說不出嘅痛快啊！
「周Sir, 你知唔知。嗰邊啲家長有幾多係我哋黎緊新生嘅家長呀！你將個學生當係犯咁罰，家長會點諗呀？」校長盡量冷靜咁講：「你EQ咁差，你點做訓導？呢度係學校，唔係差館啊！一陣你要比個交代我！」
噢⋯⋯一聽就知呢粒係核彈黎。
我見到校長慢慢走開，好尷尬咁同一眾家長打圓場，就急急腳帶佢地離開操場。就咁聽啲氣氛，就知班家長又驚又嬲，好驚訝我地學校竟然出咗個咁暴力嘅老師。
周Sir成個人呆咗企喺烈日之下，好似接受唔到現實。佢應該都估唔到佢教咗書咁耐，喺呢間學校一直橫行霸道，竟然今日就比個學生過咗一幢！連日嘅冤屈終於可以完全地發洩，心中有說不出嘅痛快！當Miss扶返我起身時，我更以一個勝利者嘅姿態望實佢。
「你諗定份CV點寫啦！」
被個細路搞到隨時工都冇埋，周Sir個樣真係好想即刻殺咗我咁。周Sir口中念念有詞，十成九問候緊我阿媽。
「仲有！你傳過Miss啲謠言，你要向Miss道歉！幫佢澄清！！你要還返佢清白！！」
「算啦！唔好再理佢。」Miss扶住我離開：「周Sir嘅事交比學校處理。」
「咁你呢？成級中三學生都話你係啲唔正經嘅女人！咁你點算呀？」講講下我自己都心痛起黎。
「唔洗擔心我。」Miss的一句又想推開我同佢之間嘅距離。
= = = =
ar_hong_91