真人真事改篇﹕師生戀﹕《最接近的陌生距離》: 第二十五章之八

「阿匡⋯⋯」

「同我講做咩？搵唔到未搵到為止囉！」我忍受唔到心底嘅憤怒，向Miss好嬲咁講：「搵唔到阿媽又同我講。搵唔到老豆又同我講！」

我抖咁啖氣，再鬧：「我點知佢地點解會咁忙嘅唧！由細到大佢地剩係識搵食架啦！我幾耐冇同佢地食過一餐晚飯啊！！我被人蝦咗成個星期，佢地仲喺度搵緊食呀！！」

鬧鬧下，我竟然鬧埋對父母嘅不滿出黎。

然後我將呢個怒意遷怒落去Miss度：「你洗唔洗不斷咁話比我聽我有老豆老母都成個孤兒咁呀？」





「我冇呢個意思，呢個係我責任呢架。」Miss。

「我知呀！叫佢地嚟，你可以收工嘛！」我嬲到唔知自己講咩：「我呢個麻煩學生而家搞到你OT呀 !黎Sir講架嘛，我父母黎唔到，你就要一直陪住我！你走啦！收工啦！我唔驗傷喇！」

「你慢慢聽Miss講先啦⋯⋯」

「你走啊！！我唔阻你收工呀！！」

我一氣之下就走。我聽到Miss喺背後叫住我，叫我返黎。





當我走出外面，喺急症室大門前，Miss喺我背後好惡咗叫咗聲：「謝子匡你同我企喺度！」

就好似點咗穴咁，我企咗喺度。Miss追返上黎我面前，嬲到想喊咁話：「你可唔可以聽下我講先架！？」

佢見我唔出聲，繼續講：「我冇覺得係你令我OT! 我好願意去陪住你架！！」

「呢一星期我被人蝦被人打嘅時候，你唔喺度啊！！我搵唔到你啊！我好想知你點諗啊！」

佢點咗一下頭，用一個好明白我嘅眼神同我講：「你受好多委屈，父母一直唔理你！Miss明白點解你咁嬲架！」





「你唔明呀！你一啲都唔明呀！！」

呢次到我不知所措，Miss用老師身份先可以咁唔受我影響之下講得出呢句說話。去到呢個時候，佢仲可以企到咁遠？企喺老師嘅角度關心我？！

「我真係明架！」Miss快忍唔住。

我就黎受唔住呢種自以為企得好遠就可以保護我嘅態度！呢啲垃圾嘅分手原因！我好大聲話：「你明啲乜嘢呀？！」

我吸一口氣再講：「如果你係明白我嘅，你應該知道呢一刻我需要嘅唔係Miss Wong呀！呢一刻———」

.
.
「我最需要嘅係黃梓盈啊！！」
.
.





我流淚，我吶喊，希望可以喚醒佢一啲感覺。

只聽見佢微微低頭，雙眼就江河決堤咁流淚，就上前——

「低B仔！！」Miss叫咗一聲，緊緊抱住咗我！

「嗚⋯⋯！我⋯⋯⋯我唔係冇感覺架⋯⋯！」Miss喺我耳邊喊住講：「你感受到嘅嘢，我一直都感受到！你有幾傷，我就有幾傷！」

「咁點解⋯⋯點解⋯⋯你要企到咁遠呀？」我再忍唔住啲情緒：「我寧願你憎我！唔理我！但你做返Miss咁對我，我仲慘過死啊！我愛你，但我愛唔到你啊！」

「即使分開咗，但我仲想做返你Miss! 我仲想見你！」Miss抽泣緊：「但我愈想去做返你嘅Miss, 我發覺愈做唔到！」佢雙手喺我髮頂上面好溫柔咁撫摸。

「我望住你受緊苦⋯⋯但係我只可以用Miss身分對你。」我聽得出Miss呢句充滿濃濃嘅歉意：「我愈想行近你，我就愈怕會傷害到你，我只可做返你Miss。但係咁樣我就愈痛苦，因為⋯⋯因為我仲好愛你啊！」





「咁點解仲要分手？點解呀！我真係好痛呀！」

「因為⋯⋯我地只係一齊咗短短兩星期咋！你承受緊嘅傷害已經係超乎你想像！」Miss邊喊邊講:「你⋯⋯你冇可能承受到大人嘅壓力！大人嘅事情！大人嘅煩惱！」

「你有冇問過我承唔承受到啊？」我緊緊抱住Miss，喺佢耳邊喊：「我冇介意過！我亦都唔怕啊！」

「如果我地嘅事揚開咗，你點面對我同事嘅閒言閒語？你點面對周Sir?你點面對你啲同學？你點面對父母！？」Miss摸住我面咁講:「呢啲委屈，我一個人受晒就得！我⋯⋯我係唔可以同你一齊架！」

「你唔可以幫我做決定呀！」我大喊：「你唔需要咁做！你唔需要一個人受晒！我揀得呢條路，我知道要承受全世界嘅攻擊！」

「你忍受唔到架！嗚⋯⋯信我⋯⋯」Miss激動起來：「我試過架⋯⋯我愛過比我大嘅人！一個成年人！當時我真係忍受唔到！你都一樣承受唔到！」

「我⋯⋯我唔想分手啊！」

「我都係呀！」Miss好激動咁錫咗我嘴唇一下：「低B仔！我愛你！但係⋯⋯」





.
.

「但係⋯⋯我唔可以咁自私，將你留喺我身邊啊！」

.
.

「阿盈啊！」

「所以⋯⋯」

「唔好講！唔好再講呀！」





「我離開你，對你係最好架！」

好似判咗死刑咁，我再冇翻身嘅機會。我地兩個抱住咁喊，都唔知喊咗幾耐我地先識得慢慢冷靜落嚟。我同佢互相幫大家擦眼淚，從來我地好珍惜呢段感情，亦都唔捨得呢段感情會咁樣終結。

至少呢刻嘅我，係唔會亦都唔想放棄Miss Wong!

我知道Miss都一樣！

既然我同Miss都係咁愛對方，點解仲要分手？現實就係咁殘酷同無奈？


= = =  =

ar_hong_91