真人真事改篇﹕師生戀﹕《最接近的陌生距離》: 第二十七章之四

蟲蟲白咗我一眼，就嘴郁郁咁，應該講粗口鬧緊我。

佢抱膝坐咗喺度，如果我蹲低問佢咩事，實一定比佢屈我𥄫嘢！所以我決定店行店過，話之佢死算。反正仆街又唔會死人嘅。

「喂！賤人匡！」當我行經佢身邊時，佢好大聲咁講：「你真係咁樣就走咗去呀？」

聽得出呢下有情緒，可惜而家燈光暗，如果唔係好想仔細咁研究下佢係咪真係有撲克臉之外嘅表情。

「死Cheap佬！掉低人！」





我聽完之後就行埋佢身邊，眼定定咁望住佢。

蟲蟲抬頭望咁我一眼後，好下意識咁遮一遮個胸⋯⋯喂，小姐呀你件PE褸將拉鏈拉到去頸啦！仲點走光呀？

呢個時候，我咩都唔做，咩都唔講 只係企喺度望住佢。 終於蟲蟲表情尷尬咁避開我眼神，佢嬲嬲地咁講：「做咩望住人呀！扶起我先啦。」

「唔得！唔得！得罪我邊有咁便宜你呀？」我翹埋雙手，嘲笑佢咁講。

「咁你想點呀！」





「欣賞你而家有幾狼狽囉！」

「死變態佬！！」蟲蟲開始哽咽。

「你喊呀？好呀好呀！喊出嚟呀！我想睇吓呀！哇哈⋯⋯」

「男仔之中你係最cheap架！」

「係啊！我好cheap架！咁我走先啦！」我笑住咁走時，梯間嘅燈突然熄咗。





「呀——！」蟲蟲嚇到尖叫！佢塊面埋咗落兩手之間。

我嫌唔夠佢驚，慢慢行返去佢度，講返頭先嘅「鬼故」出黎。我將食指放喺嘴前，輕聲講：「殊！唔好嘈⋯⋯你聽下。」

蟲蟲一面慌張咁望返我，耳仔留心聽住來自各樓層嘅腳步聲。

「佢地出晒嚟啦。」我扮到好緊張咁周圍望，話：「七樓橋自殺嗰個師兄、吊頸自殺嘅Miss、仲有埋喺學校下面嘅⋯⋯bye, 我走先！」

呢次我真係掉低佢。但行唔夠幾步⋯⋯

「Sorry呀！」

終於⋯⋯俾我等到！

「咩話？」我轉頭望返佢：「大聲啲，我聽唔再喎！





「對唔住囉！」蟲蟲向我望嚟，本來一面不忿，但喺驚慌之下，佢再掘強嘅樣都難掩謊張神情：「今朝摑你一巴⋯⋯對唔住囉！咁滿意未呀？」

「我未見過有人求人求到好似你咁惡！」我行返蟲蟲面前，話：「整親邊度呀？」

「我都唔知呀！你做嘢咁慢架！你幫我睇下啦！」蟲蟲求人求到好似命令人咁：「腳眼嗰度囉！」

「喂啊小姐，唔該你搵嘢遮遮條裙先。我真係驚你屈我𥄫嘢呀！」呢啲女人好古惑架，小心啲好。

「嘖，麻煩。」蟲蟲拉開外套拉鏈，慢慢咁將PE外套除咗落嚟。

呢一刻我終於都明點解咁多女仔之中，惟獨佢要著PE褸，因為佢要遮一遮個胸。以佢嘅size 唔遮的話實比其他女仔笑、講閒話，因為真係⋯⋯港女來港算大！

蟲蟲外套遮好之後，我蹲咗佢面前，話：「不如你指比我睇你隻腳而家邊度唔舒服啦！」





呢條女古古惑惑，唔掂佢就最安全。

蟲蟲好可憐咗望一望我，好似想我照顧佢咁。然後佢挨一挨近個身，指住右腳。

「呢度呀。」但係佢就指到唔清唔楚。

「指清楚啲啦！」

「都話咗呢度囉！」蟲蟲唔耐煩咁講。

「我睇唔到冇咩傷喎！扭親定點呀！」而家環境幽暗，我試下挨近少少睇清楚。點知⋯⋯

.

「哈⋯⋯傻仔——！！」





.

佢笑咗一聲，就見佢手一翻，拎起件外套用迅雷不及掩耳嘅速度包實我個頭！

「你終於都中計啦咩！」
= = = = = 

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師