真人真事改篇﹕師生戀﹕《最接近的陌生距離》: 第二十七章之七

如是這，我就孭住個仇人一步一步咁行返去禮堂。

哇，佢嗰招爆袋kick撞搞到我而家仲赤赤痛。所以我每一步都行得好慢。然後喺五六樓嘅梯間拎返佢嘅外套。佢喺外套度拎咗珍寶珠食，我感覺到佢成個人就定晒落嚟。

本來成個過程我同佢都冇嘢講，但我揹住佢又唔講嘢，成個感覺就好老尷。所以我就做打開話題嗰個。

「喂，痴線妹。」

「嗯？」





「今日坐車我係眼瞓唔小心挨咗落你度咋！」

「嗯。」

「我唔係搏你懵呀！」

「嗯。」

「我阿媽都冇咁樣摑我架！你今日仲要打咁多次！」





喺我行咗幾步後，就輪到佢講：「你塊面仲痛唔痛呀？」

咁好死突然關心我？

「痛呀。就痛死我啦！」

「嗯⋯⋯」

此時，佢慢慢咁挨咁落嚟，我先感受到佢嘅胸部壓咗落我背脊，然後再感受到少女嘅氣息慢假撲到我鼻前。原來佢而家將塊面輕輕咁貼咗落我塊⋯⋯貼咗落我塊面度？！





佢⋯⋯佢咩事呀？我好似捉摸唔到呢個女仔諗緊咩咁！今朝佢仲惡死咁星巴我，而家⋯⋯竟然同我面貼面？佢嘅意思係當係道歉？當係令我塊面冇咁痛？當係安慰我？

佢⋯⋯無可能可以一下子跳到呢步架喎！

愈諗就愈覺得唔對路！當我行返去禮堂時，隻痴線妹就喺我背上跳落嚟！一柺又一柺咁行去禮堂！

呢一刻⋯⋯我好似明白咗啲嘢！

「滅蟲小隊最遲到！我地再計埋兩組搵返嚟嘅寶物，就可以計算到呢一回合嘅勝出組別！」巴治奧：「兩組代表請交出你地搵到嘅寶物！」

我小組嘅組員陸逐交寶物出去。而我就喺衫袋度摷⋯⋯咦？明明我搵並好多寶物，而且美術室嘅寶物都文喺衫袋度架喎！

「我地搵齊晒啦！」蟲蟲向巴治奧咁講。然後佢好奸⋯⋯好撚奸咁對住我笑！！

「喂！匡哥！交嘢啦。」阿偉頂我臂叫：「你搵齊啲寶物我地唔洗包尾架啦！」





但係當阿偉望到我一面蒼白咁，佢就知道最差嘅事情已經發生咗！

我再望返蟲蟲，佢而家個表情就好似話我聽：「你又中計啦戇 鳩仔！」

即係話，頭先揹緊佢時，佢突然挨晒成個身同我面貼面嗰刻，佢暗中偷晒我衫袋嘅寶物！！

當我發現佢嘅詭計時，我啲小組成員已經用好怨毒嘅眼神望住我。唔洗講都知，我累到成個小組包尾！

仲唔夠，因為蟲蟲嗰組拎得最多寶物，佢一下子就做咗冠軍！

「『滅蟲小隊』好不幸你地包尾！」巴治奧講到好遺憾，但好期待：「接住嚟係大懲罰時間！」

「阿Sir等一等！」蟲蟲舉手話：「我諗到一個仲好玩嘅玩法！」





八⋯⋯八婆！你又想點呀？

「係啲咩好玩嘅方法呢？」巴治奧。

「總冠軍決定要點樣罰！」蟲蟲不懷好意咁望住我：「阿Sir, 你上次帶Camp嗰件衫有冇拎埋嚟呀？」

巴治奧諗一諗，就好興奮咁「Tak!」咗一下手指：「梗係有啦！咁我交比你負責啦！」

「好呀。」蟲蟲翹埋雙手，對住我揚起惡作劇嘅笑意！

= = = =

「哈⋯⋯哈⋯⋯哈⋯⋯」

我未試過受咁大嘅侮辱⋯⋯佢個禮堂嘅人都嘲笑我！





「哈⋯⋯哈⋯⋯哈⋯⋯」

連Miss都忍唔住要笑。

我⋯⋯我⋯⋯呢次我真係輸得好徹底呀！

「喂！擺好啲pose啦！」蟲蟲拎住相機命令我！

嗰個咁嘅巴治奧個樣似詹瑞文都算！佢竟然同詹瑞文一樣有易服癖！估唔到佢可以隨時變件少女水手裝出嚟！喺一輪強迫之下，我被迫接受呢份恥辱，著咗呢件水手裝！因為係我一個人累全組，所以我決定幫兄弟孭晒！

我忍住泡淚水，望住我一班兄弟，佢地⋯⋯仆你個街笑得好撚開心！

Miss⋯⋯我好可憐咁望去Miss⋯⋯佢已經拍緊片！





全世界都將我遺棄咗呀！！

「聽唔聽到呀！」蟲蟲親自操刀：「性感啲呀！露腳！再擺得咁差我要你剃埋腳毛架！」

我深呼吸一下，強迫自己微笑，露出我嘅飛毛腿。

卡嚓——！一張。

「扮托Bra! 爽手啲啦！」蟲蟲粗聲粗氣咁講。

我感覺就好似被人強姦完都仲未夠，仲要大聲嗌好爽咁樣！

卡嚓——！又一張。

「個Pat Pat翹啲。小腿向後提起！」

蟲蟲呢個人真係好難捉摸！頭先美術室佢應該係真驚，但轉個頭佢又變返我個仇人！佢簡直就係欺騙我嘅同情心！

卡嚓——！再一張、接一張、一張接一張⋯⋯⋯

.

「蟲蟲係你剋星喎！咪同佢搏拳啦！」

今日我明白咗智者偉嘅說話一定要聽，如果唔係⋯⋯

= = = = = =  =

「嘻⋯⋯嘻⋯⋯好搞笑呀⋯⋯」Miss睇住我被蟲蟲罰嘅畫面，好黑心咁笑。

「喂你睇咗好多次啦喎！」

活動結束，啲同學陸逐走晒，我就喺教員室等埋Miss一齊走。

我坐咗喺佢個位度，睇住佢不斷來回咁欣賞我啲狼狽片，我個心就嬲嬲地。

「走啦！仲睇。好夜架啦！」

「哈哈⋯⋯呢次我交到貨啦！」Miss:「你條片證明今次活動成功呀！我唔洗怕比副校長鬧Lu！」

Miss終於肯收埋手機，慢慢走埋嚟。我抱怨咁講：「啊！原來要犧牲我嘅！」

我即時起身，一嘢抱住佢腰！正想對佢上下其手一番。

「喂！教員室嚟架！」Miss捉實我手，鬧左我一聲。

「怕咩喎！得返我同你之嘛！你估犧牲我唔洗代價架咩！」話口未完，我忍唔住同Miss熱吻一番。愈錫Miss, 我個心就愈熱，喺我地嘴唇分開時，我笑住講：「不如試吓喺教員室搞呀！」

「你就想呀！」Miss笑一笑就捏我個鼻一下：「唔得！」

「喺學校搞一定好正架！」

「你個腦剩係諗呢啲嘢！唔可以呀！我接受唔到喺學校度搞呀！」

「唉⋯⋯冇癮。」

Miss輕輕捉我雙手鬆開時，發現我右前臂上有一個好深又紅嘅牙印，就問：「咩事呀？點解有牙印嘅？」

我回憶起美術室件事，於是同Miss講：「蟲蟲咬架。」

「吓？！」Miss有啲驚訝。

「佢傻架！佢比我困咗喺美術室。佢當時驚到抖唔到氣、又標汗、又自言自語。我驚佢出事我就仆街，咁我未返去美術室接返佢囉。跟住佢就咬我咬到咁。」

「哦。」Miss望落好平淡咁講，但我聽得出係有其他意思。

「佢咬我之前話想食糖，咁冇呀嘛！冇糖食佢就咬我囉！」我望住個牙印：「痛鬼死我啦！不過佢咬完又好似好咗啲咁。」

「嗯。」Miss似有意思咁「嗯」咗聲。

「你做咩呀？」

「冇⋯⋯聽你咁講，蟲蟲應該似係有啲情緒問題。要同吳姑娘講聲先。」

「呢啲你又識？」

「我大學副修心理學同輔導架！」Miss好自豪咁講，然後一面懷疑咁對住我講：「咁點解你願意比佢咬嘅？」

佢慢慢展示出「死亡微笑」，我知道呢條係一條點答都死嘅問題！所以——

「係！阿盈，對唔住！我應該推開佢！哎⋯⋯！」我額頭痛咗一下。係Miss好用力彈咗我一下額頭。

「傻架你？我先唔會呷呢啲醋呀！」Miss笑一笑。

聽Miss咁講我就放心晒。

然後我幫Miss執埋嘢，就正式完結今日又痛苦又漫長嘅折磨！

我同Miss慢慢由教員室離開，趁全校冇晒人時，我地嘗試喺校內拖手咁行。但行到去操場至閘口段路時，我同Miss就放開手。因為我地見到閘口外有人。望真啲，係⋯⋯蟲蟲？

我同Miss行咗出學校閘口。

「蟲蟲？」Miss溫柔咁講，聽佢語氣似係假設咗蟲蟲好似有啲事發生。Miss繼續問：「活動散咗好耐啦喎！你仲未返屋企嘅？」

即係蟲蟲一直喺門口等緊⋯⋯我？

蟲蟲望一望Miss後，佢面無表情亦都冇打算禮貌回應Miss，然後踏前一步，攝咗落我同Miss之間。

蟲蟲凝視注我，佢表情仍然係好似今朝咁又串又反叛。我見佢低一低頭，伸手喺PE褸袋入面摷緊啲嘢。

「嗱！」蟲蟲向我遞咗枝珍寶珠。

「吓？！」我太捉摸唔到呢個女仔諗咩。

.
.

「請你食。頭先⋯⋯好黑嗰時⋯⋯你陪住我。」

蟲蟲個串樣喺彈指之間閃過一下羞澀，臉龐慢慢熾熱起嚟，變成紅色。

Miss好似做咗個恍然大悟嘅表情就慢慢對住我微笑。

我望一望佢地兩個⋯我⋯⋯我⋯⋯我而家要點做好呀？！

= = = = =  =

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師