真人真事改篇﹕師生戀﹕《最接近的陌生距離》: 第二十九章之三

今日最大嘅難關嚟啦。

「Miss Wong 食飯。」全班男仔。

冇錯，係Lunch。

Miss嚴肅咁望住全班，最後嘅眼神落咗喺我身上。

我笑。





佢微微甜笑。

「各位同學食飯。」

阿波借去廁所時間去咗『空中花園』會一會佢嘅Apple。阿偉就用一個凌厲嘅眼神望住我後，示意我一定要喺阿波返嚟之前食晒盒飯。呢個時候我望去教師位嘅Miss，Miss佢扮改簿之後對我托頭微笑。

收⋯⋯收到晒⋯⋯快啲食。

我心情就好似受死之前咁，慢慢咁解便當布，再打開個飯盒⋯





⋯
⋯⋯
⋯⋯⋯⋯
⋯⋯⋯⋯⋯

杰少好驚訝。

向來冷靜嘅阿偉都好驚訝。

而我⋯⋯我⋯⋯⋯感動到想喊啊！





蛋唔老，茄唔硬，湯汁濃稠比例亦非常完美，香氣四溢！！係一盒好正常⋯⋯唔係！係當今世上最好嘅蕃茄炒蛋呀！

色香齊全！咁味道會係點呢？

我好感激咁望住Miss, Miss好羞澀咁低頭繼續改薄。佢已經知道我心意，我都好愉快咁準備食第一啖由Miss親手整嘅蕃茄炒蛋。

我微微張口，Miss放低紅筆暫時唔改簿，佢想見證呢一刻。

當湯匙貼近我嘴邊時，我大腦回憶起蕃茄炒蛋嘅香甜美味。呢份味道同愛，我要好好咁品嚐。唔𡁻夠一百下我都唔會吞落肚！

湯匙放咗入口。

「嗯？」Miss眨一眨眼，我好似聽到佢好期待咁「嗯」咗聲。





我對住佢笑，一路嘴嚼，一路笑，一路嘴嚼，一路⋯⋯

忍住！唔好⋯⋯唔好苦笑啊！！

「嘻！」Miss好開心咁笑，佢為咗掩飾佢甜入心嘅喜悅，佢離開咗教師位，行去窗邊嘅同學R水吹！

趁呢個時候——！我夾硬吞咗佢！眼水都標埋！

「水⋯⋯水⋯⋯」我一邊觀察Miss喺邊，一邊叫阿偉比水我！

阿偉都知呢次閪 冧，即時比咗張紙我抹眼水。

「喂！Miss Wong望咗過嚟！」阿偉。

我比咗個手指公Miss, 再扮抹嘴。 Miss幸福咁笑，再同其他同學吹水。





「水⋯⋯水呀⋯⋯」我輕聲咁講。

「呢次咩事呀？」阿偉比咗支水我。

「好⋯⋯⋯好⋯⋯」

.

「好撚咸呀！」

.

Miss應該唔識分糖同鹽！但陰差陽錯地，佢知道蕃茄炒蛋係要有甜味提鮮！所以⋯⋯所以成件事又錯撚晒啦！





「食嘢！快！Miss喺你後面嚟緊！」

我心驚一下，即刻𢳂第二啖飯。好彩有阿偉睇住，佢話Miss喺兩步之後會經過我身邊。

為咗唔好穿煲，我又食一啖⋯⋯。

「今日午餐好唔好食呀？」Miss行埋我地度！佢竟然咁樣突擊我？佢表面問阿偉同杰少，實際係問緊我佢個驚世傑作好唔好食！

我仲𡁻緊咸到死嘅蕃茄炒蛋，好開心咁食，唔得閒理佢。

「好食！！」阿偉。

「最鍾意食牛呀！」杰少。

「嘻⋯⋯阿匡？」Miss一招回馬槍，甜蜜嘅笑容中隱藏著恐怖嘅殺意：「今次好食嘛？嘻⋯⋯」





點算？

我一吞就標眼水！咁就穿煲！

但係⋯⋯冇計！惟有死頂——吞！！

「呢種味道簡直天上有呀！！」我笑到瞇起眼！我要好好感謝戲劇老師呀！

「嘻——！扮晒嘢啦你！」Miss笑住咁行去黑板！

我好似如釋重負咁，長長地嘆口氣。阿偉眼神叫我唔好鬆懈，示意我快啲𢳂第二啖飯，仲要大啖啲！

果然，Miss又行返埋嚟啦！佢表面上係扮巡視同學，但其實佢隻眼係望緊我呢邊架！

即係⋯⋯冇得避！

食，一啖，一啖，接一啖，再一啖⋯⋯唔知點解，我覺得個腎開始熱緊，好似被火燒緊！大鑊⋯⋯我係咪會食到急性腎炎呀？

我愈食，Miss嘅幸福感愈高，我條生命線就愈短⋯⋯有冇人可以救我？

「Brother! 」阿波又滿面春風咁返嚟。佢埋嚟我度，兩眼發光：「咦咦？蕃茄炒蛋！我鍾意喎！」

仆街波你唔好啊⋯⋯

「整啖試下先啦！」佢快如閃電咁𢳂咗啖黎食。

唔好啊！！

.

「哇！屌 你咸 撚到 閪咁喎！！」

.

波哥又team kill咗我⋯⋯

「😊」Miss。
= = = = 

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師