真人真事改篇﹕師生戀﹕《最接近的陌生距離》: 第二十九章之五
午息過咗一半，後來Miss話要準備下午嘅課堂就先行離開咗「秘密基地」。而我就爭取時間溫書所以去咗「空中花園」。當我一去到「空中花園」時，我先醒起要覆返蟲蟲星期六一唔一齊去食早餐呢件事。
「唔見人嘅？」我喺欄杆前遠望對面女校，露天花園上面一個人都冇。可能蟲蟲最後都等唔到，自己走咗去？
唔知點解呢一刻我心底有少少擔心驚因為咁而激嬲咗佢。點都好，同佢做朋友好過做敵人嘅。如果同蟲蟲交惡咗的話，之後嘅活動一定好難捱。既然蟲蟲都唔喺度，我就溫下書，應付下午嘅小測。
頂，一接觸戶外嘅冷空氣，我鼻敏感又發作！
「哈啾-！哈啾！⋯⋯⋯⋯哈啾！」
屌，破咗紀錄，一次過十二個乞嚏！搞到我唔係好專心到。
喺呢個時候⋯⋯
「哈⋯⋯哈哈⋯⋯哈⋯⋯」一把可愛嘅嘲笑聲喺對面傳嚟，我應聲一睇，見到對面花園上面有個女仔笑到彎晒腰。
「痴線妹！」我揮住手叫佢。
蟲蟲拎起咗個棒球，叫我退後少少。我照佢說話去做之後，佢就將粒波掟咗過嚟。
我急不及待咁攤開張紙，見到佢咁樣寫：「你啲乞嚏聲好誇張呀！你冷親？」
「我鼻敏感嘛！我件校服保唔到暖。係呢，你做咩又咁遲嘅？」寫完之後我惡又掟返過去。
「唉！唔好提，啲老師好煩！今次捉我裙短囉！⋯⋯所以⋯⋯遲左嚟陪你。你份人都幾守諾言架喎，我以為你唔會等我添。」我翻一翻張紙，見到佢仲有寫住：「係呢，星期六嗰度我約實你架啦！你都想幫你朋友架嘛？」
我回覆佢：「約唔實住呀，等我問埋阿偉先啦。我都想佢有女朋友嘅！我地四兄弟入面就爭佢之嘛！」事實係我想惋拒蟲蟲，嗰日我真係想同Miss返學多啲。
當蟲蟲接到粒波時，佢滿心期待咁攤開張紙，然後當佢見到入面嘅內容時，唔知點解佢原本期待嘅笑容，忽然有一下凍結咗？定係我錯覺呢？然後我見到佢搵咗張紙寫嘢，又係改嚟改去寫咗好多次，佢表現得有啲煩躁起嚟。
喺我等緊佢嘅時候，我鼻敏感又發作。
「哈啾——！哈啾—！」
又破紀錄，今次十三個乞嚏。
「哈⋯⋯⋯哈⋯⋯」蟲蟲又笑到彎腰，總覺得佢呢下笑容唔單係嘲笑緊我，而係釋懷緊佢嘅不安。
過咗一陣，佢終於寫到佢想問嘅問題，仲掟返粒波比我。
「你冇頸巾保暖嘅咩？」
我對住佢擰晒頭，示意我冇頸巾。之後我將棒球定返比佢。
佢接到粒波後就「嘻！」一聲微笑。我望住佢寫紙仔，唔知點解我感受到佢一種講唔出嘅奇怪感覺。搞到我好奇佢寫緊啲咩。
良久，佢又掟返粒波比我。
我一手接住，連忙將張紙拆咗落嚟，當我要攤開一睇——正正喺呢個時候，我眼前一黑！有人從後用手將我對眼矇住。耳邊傳嚟一把好溫柔嘅聲——
.
「哎吔！睇少你一陣就唔專心啦？」
.
係⋯⋯係⋯⋯
我被矇住嘅雙眼被放開，一個俏麗嘅面容出現喺我眼前。
「係咪要MissWong 罰你留堂溫書？」
係⋯⋯係⋯⋯係Miss!!
「咦！你唔係要準備下午課堂架咩？點解⋯⋯？！」
我拿拿聲將蟲蟲比我嘅紙仔收入褲袋。因為Miss前晚曾經坦白過擔心我同蟲蟲之間發生嘅事，所以如果比佢知道我而家唔溫書同蟲蟲傾計的話，佢一定會唔開心！
但⋯⋯碌柒，我見到Miss皺一下眉，佢一定見到我而家個樣係好唔自然！
「你個樣做咩咁古怪呀？」
「啊⋯⋯！呢度近女校嘛！頭先嗰下矇眼我驚比對面見到！」呢個藉口應該過到骨⋯⋯掛？
「啊！係喎！」Miss吃咗一驚，笑說：「我自己都忘咗形添！」
然後佢同我拉返開個距離，慌張咁望去對面女校。但又好快咁望返我，放輕把聲，面紅咁講：「你囉，你呢排喺學校搞到我⋯⋯搞到我開始分唔到係你老師定係你女朋友啦！」
雖然我聽到會好開心⋯⋯但唔知係咪因為咁，令佢可以睇清楚我成個唔自然嘅上半身！當佢見到我隻手之後，雙眼都狐疑起嚟：「你揸住啲咩呀？」
仆街，係棒球！
呢個時候我唔可以縮，一縮Miss就覺得我身有屎！惟有坦白咁將粒波交比Miss。
Miss接過粒波之後，好仔細咁望，原本喺佢面上嘅笑容漸漸換成嚴肅嘅表情。
「咦？呢個英文簡稱係⋯⋯對面女校嘅？」Miss疑惑咁望住我，然後佢望返去女校嗰度，仲慢慢咁行去欄杆前面。
我隨Miss所凝望嘅方向望過去時，我見到蟲蟲都係行到去欄杆前面。呢兩個女人默不作聲互相凝望住對方。
剎那間，我感受到四圍嘅氣溫開始急降。
空氣好似停止流動，時間都凝結起嚟。
我實在思考唔到呢個究竟係一個乜嘢局面 。
只係聽到一聲⋯⋯
「嘻—！」
Miss對住蟲蟲微微一笑，點一點頭。
蟲蟲亦對Miss有禮貌咁躹躬，微笑。
呢一個畫面太唔簡單，女人嘅微笑總係隱藏住好多秘密。
包括呢一刻⋯⋯
Miss回過頭嚟望住我⋯⋯
.
.
「又話溫書嘅？」
佢仍然保持住溫柔嘅微笑。但我感覺同平時唔一樣。
呢個時候，午息完結嘅鐘聲響起，將時間凝結喺令人不安的一瞬間。
= = = = =
ar_hong_91
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師