真人真事改篇﹕師生戀﹕《最接近的陌生距離》: 第三十章之七
叮咚——！Whatapps 傳嚟訊息
「你返到學校未呀？😖」Miss（9:00am)
「剛剛返到。你呢？到咗學校未？🙁」我 (9:00am)
「一早到咗啦！都唔知好彩定唔好彩。可以靠黎Sir過橋順利徹退。不過佢⋯⋯真係好煩☹️☹️。」Miss (9:02am)
「你返到去我就放心啦😀😀⋯⋯你有冇借啲意媾仔先😒😏」我 (9:03am)
「😒😒😒😡」Miss(9:03am)
「咁你有冇媾女呀😏😏😏」Miss (9:03am)
「你話呢😏」我 (9:04am)
「👊🏻👊🏻👊🏻😡」Miss (9:04am)
「盈盈我愛你😘😘」我 (9:04am)
「😤😤😤」Miss （9:04am)
「🤪🤪🤪」我 (9:05am)
「唔傾住啦！我要趕出卷。你要加油呀！拎個小功返嚟！😚😘」Miss (9:05am)
「知道！Miss 你都要加油！💪🏻」 我 （9:05am)
「四點半，Mega Box UA見！」 Miss (9:06am)
= = = =
禮堂，義工活動即將開始。
吳姑娘剛剛講解完活動流程同埋安全守則。每個義工小組要探訪十戶獨居長者。主要工作係派下物資同埋關心下老人家，如果發現有問題例如健康、食物唔夠等就幫手記錄低，好危急的話就call吳姑娘或者直接報警。當完成晒探訪之後，就要返嚟學校做埋少少總結就可以解散。如無意外，今日係可以準時走。
我同阿偉都係效率派，所以我同佢都提議我地小組分成兩個小隊進行探訪，咁樣時間就可以節省一半。早啲做完，早啲返學校嘛！準時收工走人就可以同Miss拍拖，正！
「⋯⋯所以，我係咪會同阿偉一組？」樂樂腼腆咁講，低頭微笑。
「係啊！你同我一齊啦！」阿偉答得爽快，成個人Man晒，而且講嘢仲好少有咁溫文有禮。
我對阿偉投下信任眼光，非常希望佢今日得米！加油呀兄弟！
「我睇地圖，你負責拎嘢。」蟲蟲一面冷漠，命令我做嘢。
佢啲態度又變返咁乞人憎，我對佢冷哼一聲，拎晒啲探訪物資就出發。
唉，喺行出學校大門唔夠幾步，我同佢因為探訪次序嘅問題而有少少爭拗。
「彩雲邨近我地啲喎！而且我地要探嗰四個長者都喺晒彩雲邨入面！不如探晒佢地先啦！散咁啲物資，唔洗咁辛苦嘛！」我左右手各拎住三至兩袋物資，雖然一袋又唔算太重⋯⋯但五袋加埋就好重啦！
「去探呢個伯伯先！」蟲蟲指住名單上第一個名，好堅決咁講：「佢住得遠，喺西貢。平時可能少出村，佢而家可能唔夠物資。所以一定要探咗伯伯先！」
我聽落都覺得有啲道理，就唔想同佢拗。我遞咗其中一袋物資比佢，話：「探邊個先你決定啦！但起碼你都拎一袋先啦。好重呀，痴線妹！」
「哼！」蟲蟲瞪咗我一眼，唔情願咁拎咗一袋物資。
我先手拎一袋物資，再將其餘三袋物資收喺背囊度。之後我同佢講：「入西貢架話要過對面搭車架。我地行快啲啦，應該就嚟有車啦！」
說時遲，那時快，我見到綠燈開始閃緊。
「喂！仲慢吞吞！行啦小姐！」
我好自然捉實蟲蟲隻手跑去對而馬路。當去到對而馬路時，蟲蟲好用力咁Fing開我隻手，我望返佢，見到蟲蟲擰埋塊面就一枝箭咁跑咗去小巴度，等都唔等我就上咗車。我跟埋去上車時，發現佢坐咗喺啲單丁位度。而我隔住個通道，坐咗喺佢旁邊。
小巴向我地嘅目的地出發，全程我同蟲蟲冇嘢好傾，因為佢全程望住風景，成個人嘅姿態明顯反映出佢已經築起咗心理城牆。不過最令我注意嘅係，佢正在不安咁搣緊手指啲倒刺。我再留意埋佢個面珠，同樣紅到好似蘋果咁。我見到佢咁，心諗難道我剛才拖佢手過馬路時嚇親佢？
= = = =
ar_hong_91
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師