真人真事改篇﹕師生戀﹕《最接近的陌生距離》: 第三十一章之一

從霧中穿出而嚟嘅惡犬喺我地身前約六七米處停低咗！然後胡胡幾聲，又有兩隻村狗喺霧中跑出。

「啊——！」蟲蟲尖叫一聲，我即刻掩住咗佢個嘴！

「唔好叫！」我喺佢耳邊講：「一出聲會好危險架！」

三隻惡犬來意不善，佢地慢慢行緊埋黎，時刻發出令人心寒嘅低吟。特別係中間嗰一隻狗，佢面上有一條深刻嘅傷疤，簡直係經典嘅兇悍型癲狗！睇佢壯大嘅身形，明顯佢係三隻當中嘅老大！。

「胡——！」大狗叫咗一聲，佢旁邊兩隻細狗就慢慢迫埋嚟！





「唔——！」蟲蟲即使被我掩住個嘴，但佢驚慌嘅尖叫聲好似衝破咗一切嘅障礙，仍然顯得特別響亮！令到埋緊嚟嘅狗更具侵略性！

「你一驚啲狗就追你架啦！」我喺佢耳邊輕聲咁講：「唔使驚，我地慢慢退後，慢慢離開佢嘅視線範圍就冇事架啦。」

「唔⋯⋯唔⋯⋯」蟲蟲已經驚到控制唔到自己想叫出聲。佢全身手腳震晒，好驚下一秒佢就嚇到腳軟跌低。

我未見過有人會驚狗驚成咁！佢以前到底受過啲咩傷害呢？！

「慢慢嚟，我地一步一步咁向後。」我輕聲喺蟲蟲耳邊講：「唔使驚，聽我說話去做就得啦。」





我一步一步向後退，一方面唔刻意望住啲狗，另一方面又要睇住啲狗唔好發難！更難嘅係我要照顧已經受驚嘅蟲蟲！因為佢一驚就會咬人啊！！

「喂！唔好咬我！」

「哇——！」

我即刻縮開手！好彩冇比佢咬到！但係因為咁佢嘅尖叫亦令到三隻惡狗又行快咗少少！

「殊——！」我即刻殊蟲蟲：「喂！你一叫就大家都死架啦！」





「⋯⋯好⋯⋯驚⋯⋯好驚⋯⋯！」蟲蟲好想拔腿就跑，但被我攬住腰，一時間都走唔到。佢不斷咁講：「⋯⋯對唔住啊！⋯⋯我唔敢啦⋯⋯唔好⋯⋯困住我⋯⋯對唔住啊！」

蟲蟲驚到流晒眼淚，不斷咗掙扎，想掙開我然後拔足狂奔！但我唔可以隨便放開佢！如果唔係啲狗就即刻追埋嚟！。

啊——！我記得吳姑娘曾經喺講座教過一啲精神健康急救法，睇情況蟲蟲呢一刻可能係驚恐突襲。佢嘅精神完全聚焦喺啲狗同埋恐懼上面。

吳姑娘話呢啲情況要幫佢將焦點由佢最驚嘅嘢慢慢轉移到其他事情上。例如留意自己呼吸，再幫佢調節呼吸。同時要幫佢將視線由啲狗身上轉移到其他嘢度。

唉⋯⋯希望work啦！
= = = = 

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師