真人真事改篇﹕師生戀﹕《最接近的陌生距離》: 第三十一章之五

今次嘅經驗令我同蟲蟲嘅關係改善咗好多，起碼喺成程車入面，我同佢好似一般朋友咁有講有笑，互相取笑一下大家。

「brother!」「brother!」

當然我地都完成咗「入會儀式」，我同蟲蟲互相撞拳，正式做咗好朋友。

「唉⋯⋯係咪好重呀？等我幫你啦！」蟲蟲到站落車後，就轉身對落緊車嘅我差腰咁講：「拎少少嘢就嘈嘈閉。」

我聽到眼都突埋，頭先係邊個救你架衰妹！





「早就應該幫我拎啦！」我邊講邊將兩袋物資交咗比佢。

蟲蟲對我做出佢嘅招牌黑面，但而家更感受到埋藏喺佢面皮之下嘅善意。

搞搞下，成個活動得返三個鐘、我地一戶長者都冇探到。如果要探晒的話咁我就會遲到，唉⋯⋯Miss今次實唔開心喇！

不過喺我擔心緊嘅時候，我個救星！阿偉出現啦！！

「樂樂！！」蟲蟲見到朋友即刻衝上去攬住佢，好似兩隻貓仔咗互相擦一擦大家嘅臉龐。然後佢地行開埋邊傾計。





我同阿偉一見如故，撞一撞拳叫咗聲「Brother!」

「大佬，呢鋪靠你啦。」我同阿偉講。

「你先係大哥呀匡哥！」阿偉鞠躬咁講。

「大佬唔好咁樣！」我再鞠得比佢低啲，話：「隻蟲蟲死都要去咁西貢探人先。但出咗意外，探唔成。而家一戶都探唔到呀。幫幫手呀大佬。」

「你想細佬點幫你呀匡哥。」阿偉再鞠得比我低。





「妖！」我即刻扶返正阿偉，話：「幫我手探一兩戶啦。今日要準時走呀，我約咗Miss呀！」

阿偉聽到我提到Miss時，佢眼神有一下認真咗。

「做咩呀⋯⋯嗱！兩兄弟，唔係唔幫呀？」

阿偉瞇一瞇眼，當佢做出呢個表情時，即係話睇發現咗啲嘢。

「乜嘢呀！」

阿偉望咗去樂樂同蟲蟲嗰邊，見到佢地兩個竊竊私語，然後兩個女仔好開心咁笑，再望咗過嚟，似乎係討論緊我地。

「啊哈⋯⋯蟲蟲⋯⋯」阿偉嘲弄咁笑，望返我咁講：「你partner好開心咁喎！」

「我話知佢啦。」我：「點唧？幫下我啦偉哥！」





阿偉翹埋手，搖頭嘆咗口氣：「幫你就梗嘅！嗱！唔爭在醒多你一句啦！」

「咩呀！」

「鳩你就得一碌，小心顧此失彼呀匡哥！」

然後佢成個古人咁揚長而去，行返去樂樂嗰度。

我頂你⋯⋯又喺度扮晒嘢？！

= = = =

人生得到好似阿偉呢啲好朋友，真係一生嘅福氣。 佢幫我頂咗兩戶探訪。即係我只需要探兩戶長者就可以收工啦！但係⋯⋯其實事情都唔係咁順利嘅。唉，點估到阿偉話幫手探埋啲長者都可以辣得著蟲蟲架？佢同阿偉爭論咗一陣，最後都係靠樂樂介入，蟲蟲先肯讓步。





喺去緊被訪者屋企時，蟲蟲都係嬲爆爆咁，一直都唔出聲。於是我就話：「我地探兩戶就得啦！可以準時走喎，唔好咩？」

蟲蟲瞪咗我一眼，就話：「做完就趕住走，咁做義工嚟有咩意思呀！」

「咁⋯⋯阿偉都想幫輕下我唧。」

「佢識關心老人家咩？睇你同佢都係一擔擔架啦！做嘢hea到死！」蟲蟲：「啲公公婆婆自己一個人住都夠慘架啦！上去擺低嘢就走算點喎！不如唔好探！」

咦？估唔到蟲蟲好想認真咁做呢次探訪喎！

蟲蟲繼續鬧：「公公婆婆可能好重視今日可以有人嚟睇佢地架！嚟一嚟就走，仲衰過係比咗希望人然後又突然拎走個希望呀！」

「唏！阿偉唔係咁架！就算係⋯⋯都仲有你姊妹樂樂嘛!佢會睇住阿偉唔可以咁Hea嘅！」

「哼！我就係睇在樂樂份上咋！」蟲蟲：「樂樂係一個好體貼人嘅女仔。佢唔會hea做義工架！」





「咁得啦！而且⋯⋯你未當比個機會樂樂囉。你知道佢對阿偉有意思架嘛！」

「哼！」

總算蟲蟲已經冇咁躁。嘩，佢啲情緒真係過山車咁，短短幾個鐘，我感受到佢嘅喜怒哀樂。咁樣做人⋯⋯我喺旁邊睇都覺得辛苦呀！

我同佢繼續探訪獨居長者，唉，今日真係唔多順利。首先比狗嚇，接住嚟就係摸門釘。咁樣搞一搞，又浪費咗一個鐘。

= = = 

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師