真人真事改篇﹕師生戀﹕《最接近的陌生距離》: 第三十二章之六
距離開場仲有時間，Miss帶我去Shopping。 Miss話我手機舊電好快打柴，所以想買個差電比我。但係佢靈光一閃，又話自己電話都舊，索性買咗兩部電話！仲送咗部比我添！
「Miss，我⋯⋯」
我同Miss喺宜家餐廳食緊晚飯，唔洗講，唔只新手機，呢餐都係佢請。
「唔使唔好意思喎！」Miss拎住兩部同型號嘅機，甜甜一笑：「情侶機，唔好咩？嘻⋯⋯！」
老實講，我真係唔好意思，因為呢件係我收過MISS最奢侈嘅禮物。Miss好滿足到我物質需要，但我又心諗，我只係一個學生，我真係好難滿足到佢嘅物慾。呢一刻我好自然咁記起今朝Miss提到嘅Hermes袋⋯⋯六位數呀，我點滿足呀？
唔知點解，我個心由好開心慢慢⋯⋯慢慢⋯⋯出現有一種唔識講嘅感覺⋯⋯我好似覺得自己⋯⋯廢？
「你做咩呀」Miss應該意會到我表情有啲變化，忍唔住問。
我呢個感覺係唔可以比Miss知，佢知道咗會唔開心架。所以我笑住咁講：「冇呀，我冇諗過今日有新手機用。我有啲唔知反應唧！哈哈⋯⋯」
「唔係喎，你表情話我知唔係咁簡單架喎！」
唉⋯⋯痴線架咩！Miss真係有讀心架！
「仲有擔心架！我阿爸阿媽如果發現我突然有部新手機用。佢地可能會懷疑⋯⋯我去做鴨呀！」
「哎吔！你個衰仔又亂講嘢激Miss！」Miss望落真係似乎被我激嬲咗，但好快佢自己又忍唔住笑：「即係話我包咗你啦！係咪呀！好呀，我收返部機！」
「啊⋯⋯啊⋯⋯唔好！盈盈⋯⋯對唔住！對唔住呀！」我雙手合十咁道歉。
「你試下再亂講嘢。」Miss舉起枝叉，再吉落條腸仔度：「你試下激嬲我呀嗱！」
「唔敢！唔敢！」我苦笑。
Miss好快又親切咁笑，話：「趁食完飯，我地set好部機先啦。」
女人係古惑嘅⋯⋯佢⋯⋯佢趁機幫我set手機，實際係搶佔先機，幫我set開機密碼。咁佢隨時隨地都可以check我手機⋯⋯
「低B仔，笑呀。」Miss喺佢個位度舉起手機想同我自拍。影完之後，佢就玩下啲執相app。
而我就試下手機啲功能，然後突然醒起要入返蟲蟲嘅電話。於是我攤開掌心set蟲蟲嘅電話入去，不過⋯⋯頂呀！最尾嘅數字到底係「9」定「0」呀？
唔理，入晒兩個number入去再打出去先算啦！
「你喺度入緊咩？」Miss見到我對住個掌心入電話，好奇咁問：「咦？邊個嘅電話？」
唉⋯⋯仆街！！比Miss知道咗我入蟲蟲電話會死架喎！之前偷偷咁同蟲蟲喺花園傾計，Miss已經嬲咗我一次。我知對Miss愈坦白就愈好！但今次如果誠實咁答佢都一樣會死架。咁⋯⋯咁⋯⋯咁惟有⋯⋯
「個電話號碼係今日送入院嘅婆婆嘅親人嚟嘅。婆婆個情況我好擔心，我想跟埋落去，所以拎咗佢孫仔嘅電話方便聯絡囉。」我一邊set嘢一邊講，盡量做得自然啲。
但⋯⋯唔知點解，我講完之後我有種好古怪嘅感覺！
我⋯⋯我⋯⋯因為蟲蟲而對Miss講⋯⋯講咗個大話？！
痴線架！我點解要咁做呀？！
而且呢個大話仲——
「嘻！真係咁乖仔？」Miss好安慰咁笑。
呢個大話仲呃到Miss添！
「唉⋯⋯好慘架。婆婆個狀況聽到都令人心酸。」我好似埋咗條屍仲唔夠，仲要封埋水泥！講咗一個大話，再蓋一層真話喺上面想瞞天過海！
我⋯⋯我⋯⋯我竟然咁識講大話！唉！我好差勁呀！
「低B仔，你真係好咗好多呀。」Miss以老師身份笑嗰時有一份滿足同安慰，同時用女朋友身份笑時，有一種甜蜜：「你諗下你初初開學時幾難搞呀！又缺席，又唔做功課！但而家你唔同晒。而且係⋯⋯因為你愛我所以變好咗！你真係好上進呀！」
Miss好欣賞我，我見到佢眼泛淚光，佢被我嘅成長感動到。但⋯⋯但佢愈感動我就愈內疚！
「呢個叫做『愛』的教育嘛！」我搞下笑，掩蓋住我講大話後嘅不安。我⋯⋯可惡！我為咗個大話做埋好多無謂嘢！我唔可以同Miss分享佢嘅感動！
「你又亂講嘢啦！」
Miss肯定將注意力放咗喺「做愛」呢兩字度，我話：「我意思係『愛』的教育！冇個『做』字架！哼⋯⋯似係你心邪先咋喎！」
我好似控制唔再自己⋯⋯唔係！係有另一個我控制緊我個嘴！唔止好識講大話！仲哄得Miss好開心！
Miss冇晒戒心⋯⋯應該話佢根本唔知我講咗個大話呃佢！佢好鬼馬咁對我做咗個鬼面，然後就同我打情罵俏起嚟。我講大話後嘅不安感慢慢消失。只有一種怪異嘅感覺留喺心中——我第一次講大話呃Miss，個感覺好難受！我唔可以再有下一次！
絕對唔可以！
正當呢份難受嘅感覺折磨緊我時。我部新手機亮起——
震動⋯⋯震動⋯⋯震動⋯⋯
鈴聲同震動聲交織成一種令我瞬暗石化嘅催命旋律。
.
.
Miss望住電話上嘅號碼。
我又望住電話上嘅號碼。
個號碼絕對唔係Miss所想嘅陳婆婆個孫嘅電話號碼。
.
.
來電人正正就係——
蟲蟲！！
= = = =
ar_hong_91
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學
#女教師