真人真事改篇﹕師生戀﹕《最接近的陌生距離》: 第三十三章之五
我同Miss傾完心事，其實都解決唔到啲咩。我內心嘅失落感，亦都隨住我瞓著覺而埋藏咗喺心靈嘅某一處。
星期日早上，Miss話佢仲有好多簿要改，而且仲要出考試卷，所以一大朝早就準備走。
走之前，Miss不忘咁同我講：「低B仔，加油。對自己要有信心呀！」
「嗯！」Miss仲係好擔心我會好sad。
但其實呢一刻見到佢笑，我個心都定咗啲。Miss話信任好重要，所以無論點我都要信佢。
我上前比咗個Goodbye Kiss Miss。然後佢話：「低B仔，聽日我唔可以同你一齊返學啦。」
「啊？點解嘅？」我有啲失望。
「代替周Sir嘅新老師聽日返工呀。我想幫佢熟習下新環境，所以要再早啲啲返學。」Miss一邊著鞋一邊講。
「學校要求你咁做嘅？」
Miss笑一笑，話：「唔係呀！新老師其實係我姊妹兼同學嚟嘅，咁啱佢入嚟做老師。我想幫一幫手唧。」
「姊妹?Ada?」我諗起Ada就周身唔舒服。
「我姊妹唔剩係得Ada架嘛。正如你啲腸粉朋友都唔係得一條啦！」Miss：「我同呢位新老師由細玩到大架。」
「唔係Ada就得啦！咁⋯⋯唔知係咪靚女Miss呢？」
「作死你呀！」Miss鏗咗我個頭一下後又故弄玄虛又講：「聽日你未知囉！走先啦，你今日要好好溫書呀！一陣傍晚六點Email份小測卷比我！」
「吓？」
「吓咩呀！係咪想聽日留堂呀？」
「好⋯⋯好⋯⋯知道Miss！」
「嘻！乖仔！錫晒你！」
嘖——！
Goodbye Kiss之後，Miss就離開。
= = = =
星期一，blue Monday, 艱辛嘅一星期又開始。
今日冇同Miss返學有少少唔慣。不過經過過去一星期嘅鍛鍊，我已經能夠自動自覺六點幾起咗身，仲煮咗個早餐比自己食。我呢一刻先發現，原來Miss已經慢慢改變咗我生活習慣。我成個人感覺好似正常晒，有返規律。Miss嘅魔力真係唔簡單。佢唔只係一位好老師，仲要係一位好伴侶。
諗到呢一點，Ada嘅影響好似消失咗。或者我真係要好好聽Miss話，要對自己有信心一啲，唔好再同人比較。覺得自己不足就好好去學習⋯⋯咦？我好似明白咗點解Miss流晒眼淚勸我唔可以放棄讀書呀！
我心情一下子好返咗啲。我嗱嗱聲去返學，想快啲見下Miss！好快我去到兩間學校嘅分叉路上面，筆直嘅電燈柱下面有個女仔企咗喺度。
「阿匡，早晨呀。」
蟲蟲，佢上好朝氣勃勃咁同我打咗個招呼。難道佢⋯⋯特登等我嘅？我細心啲睇蟲蟲面色，發現比之前更紅潤。佢好似⋯咦？蟲蟲化咗妝喎！
「蟲蟲！咁早嘅？」我笑住同佢講，內心有一點點愉快嘅感覺。我再打趣咁講：「咦？你化咗妝呀？唔怕比人捉咩？」
「咩呀？」蟲蟲被我發現佢化咗妝就一面難為情，急忙轉開話題：「邊有化呀！你⋯⋯你傻架？我唔係同你講化妝架！我其實想⋯⋯我⋯⋯我想⋯⋯」蟲蟲一面欲言又止。
「你想做咩呀？」
「我想搵日去探下陳婆婆。你一唔一齊去呀？」蟲蟲好似鼓起咗勇氣，一口氣咁問。
我聽完之後，覺得呢個提議都唔錯，於是話：「都好喎！我都想知佢狀況點。不過就嚟考試⋯⋯我地再夾下時間啦。」
蟲蟲聽到我願意同佢去探陳婆婆後好開懷咁微笑，好似少咗個煩惱咁。佢話：「咁我夾埋安仔呀。係呢，前日你係咪打過電話比我呀？」
「嗯，係啊！」
「嗯！就咁樣啦。我地Whatapps再傾啦。我⋯⋯我返學先啦。bye bye！」
「bye。」
真係好，蟲蟲當咗我係朋友，同佢相處都唔錯呀。同我之估計嘅一樣，其實佢本身唔係一個咁惡同反叛嘅人。我見住佢向自己校門行咗幾步後，又回頭望返我羞澀咁笑咗一下，然後踏入校門。
咦⋯⋯我同佢仲未約實喺邊度交收條手鏈喎！算啦，放學再Whatapps佢啦。
呢個時候我剛好返到校門，我就聽到一陣騷動，喺我四圍全都係啲同學議論紛紛嘅聲音。
「睇唔睇到呀？堅型喎！」
「我未見過有老師係騎鐵馬返工囉！」
「哎呀睇唔到佢除頭盔嗰下添，唔知佢係咩樣嘅呢！」
聽佢地講，應該係指頂替周Sir嘅新老師。嘩！騎鐵馬嘅女教師？我真係未見過喎！如果佢同Miss都係一位大美人，又靚又型，咁未好煞食？
剛剛好今日有週會，校長一定會介紹呢位新老師！此時禮堂已經一早坐滿晒人，所有人都細聲談論呢位新老師，搞到我都好奇心大盛。
週會開始，喺奏完國歌、唱完校歌之後，校長就一輪訓話。之後終於到全校男仔最期待嘅時刻。
「⋯⋯相信今朝已經有好多同學留意到有一位好出眾嘅人嚟咗學校。仲引起咗大家嘅討論。」校長故作幽默咁講：「相信各位同學都好想知道佢係邊個，我地而家用熱烈嘅掌聲歡迎呢位新老師！」
掌聲如潮水由後方湧嚟。
然後後台有一個人影輕快咁去到台中間。
呢個時候我呆咗一下。因為台上嗰個人——
有一個可以迷倒男女嘅笑容。
有一身健康嘅古銅色皮膚。
有一身結實嘅肌肉。
有一個令所有男仔羨慕嘅身高。
更有一張不論男女都相當妒忌嘅外貌。
佢嘅出現，好似活生生咗話比人聽佢就係——
.
「男神」嘅代名詞。
.
「李Sir，交比你介紹自己。」
「各同學早晨！我係李Sir ，李兆朗。我鍾意大家叫我做Alex， 我係你地嘅新體育老師。歡迎放學後約我打波呀！」
談吐唔止好似紳士咁得體，把聲仲要好好聽添！
唔係阿嘛？Miss話嘅姊妹竟然係男人嚟？姊咩妹呀！根本係青梅竹馬囉！
Miss今日提早返工就係因為⋯⋯佢？
我望返去台上，見到李Sir好似指拍廣告咁揚起陽光嘅笑容。頂⋯⋯連男仔都招架唔住嘅自信同魅力！
有一瞬間，我捕捉到重要嘅一瞬間！李Sir望咗落嚟，眼神落喺我地班呢邊。
佢微笑，揮一揮手。
我直覺望去坐喺阿波旁邊嘅Miss——Miss對住李Sir微微一笑，再揮一揮手。
剎那間我心底有一股不安感——
.
.
呢個世界有一種人，
有一種男人最鍾意扮人地姊妹去媾女架！
= = = =
ar_hong_91
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師