真人真事改篇﹕師生戀﹕《最接近的陌生距離》: 第三十五章之一

趁午息仲未完，又剛剛好Miss出咗去食lunch，我去咗「空中花園」行一趟，想望下蟲蟲係咪度。

「哎呀？唔喺度嘅？」我望去對面女校，有少少失落咁講。

唉⋯⋯今日諸事不順，呢刻好想搵蟲蟲。除咗想約交收手鏈嘅地點外，其實想呻下今日發生嘅事。可惜對面女校嘅空中花園得幾個我唔識嘅女仔喺度。等咗陣蟲蟲都係冇出現。唉，咁惟有等放學啦！

喺我想走之時，午息都就完。我遠眺校門上，見到Miss同李Sir都剛剛好行返嚟學校。我再望真啲⋯⋯咦？Miss Lau呢？ 唔係三人行咩？仲有⋯⋯佢地手上揸任杯嘢飲？

我頂！佢兩個都買咗奶蓋紅茶飲喎！呢⋯⋯呢畫面⋯⋯！？





啊——！可惡呀！

= = = =

冷靜冷靜冷靜！

撞你個鬼，咁啱之後嗰堂就係中文堂！我根本冇時間去冷靜自己！之前見識過Miss喺課堂時用女朋友身份發脾氣係好恐怖！累埋全班添呀！。如果呢刻我黑晒塊面對住佢，實奶嘢。惟有做好本份先。

不過唔知係咪我個錯覺，總覺得今日Miss個狀態同平時一樣，冇以前咁嚴。而且好似有啲風騷。





風⋯⋯風騷？頂呀，佢同李Sir食Lunch 食到個人好風騷？嘩？佢地食咩呀？我愈諗就愈唔對路！但⋯⋯可以點呀？即場發Miss老脾咩？！

惟有死頂啦！

「班長？」Miss向我望嚟。

「嗯？要派嘢？」

「幫我讀埋落去。」Miss指住課文。





我⋯⋯唉！分咗心！又比Miss罰企！

= = = =

好不容易放學！再見啦垃圾嘅一日！

我同Miss簡單道別後，先搵蟲蟲再去買餸煮飯。

我同蟲蟲冇約時間亦都冇約喺邊度等，但睇返之前好幾似次都喺分差路上嘅電燈柱撞到蟲蟲，如果喺嗰到等應該會見到佢。

可惜我喺條電燈柱下面等咗二十分鐘左右，良久，我聽到把女仔聲喺人流中傳嚟。

「啊哈！係佢呀！」

然後有三個女仔行咗埋嚟，一肥、一高、一個扎孖辮。我認得出佢地係蟲蟲啲朋友，apple、樂樂同冬冬。





「你好似係叫⋯⋯」apple手指指都幾冇禮貌。

「小姓謝，叫細佬做匡仔就得。波嫂。」

「哎呀你真係識講嘢！」Apple面紅紅咁講，佢呢排同阿波打得火熱，被我叫波嫂就姣到出汁。佢用一個扯高八度嘅聲講：「做咩喺度嘅？你等人？」

我正想問蟲蟲喺邊時，隻豬形蘋果就截住咁講：「我知啦！你！等！蟲！蟲！哈哈⋯⋯！」然後佢同另外兩位姊妹細聲講大聲笑。佢懶係細聲咁講，實際勁大聲咁講：「哎呀！我一早知佢地兩個有啲嘢架啦！蟲蟲好冇眼光囉！」

佢真係⋯⋯好！撚！八！婆！相反另外兩位姊妹啲反應係正常好多。但點講都好都係自己兄弟嘅女朋友，點都要保持風度嘅！

「係呀。我等緊蟲蟲呀。」我苦笑以表不滿。

「哈哈⋯⋯你地約咗去街呀？一齊咗未唧？」Apple連珠炮發問：「拖咗手未呀？kiss咗未呀？」





我見佢愈來愈失控，我索性問另外兩位姊妹：「蟲蟲咁耐未出嚟嘅？佢冇事呀嘛？」

「喂呀！答我問題先啦！」apple不斷搶鏡頭，我就嚟忍唔住要爆。

「蟲蟲佢⋯⋯」樂樂，疑似阿偉嘅女朋友，佢把聲好細聲，apple嘈住晒搞到我聽唔到佢講緊咩。

「樂樂！唔好講比佢知唧！」Apple一面得戚咁講。佢仲踩多一腳：「未經我批准，你咪洗旨意媾我地嘅蟲蟲呀！」

呢一刻我明啦！呢件八婆一定係嗰啲妒忌自己姊妹有拖拍、多人追，千方百計要攬炒自己姊妹嘅人啊！屌！真係鬧都廢事。我為阿波個幸福默哀算。

我直接冇無視Apple，問：「蟲蟲係咪留堂呀？定係有其他嘢？」

Apple想擋住我，但今次佢啲姊妹都頂佢唔順。孖辮妹冬冬攝埋嚟，對我講：「蟲蟲下午早退咗呀！」

「吓！佢咩事呀？」





「係都唔關你事啦！」Apple。

「Apple呀！」冬冬抱怨Apple，之後又對我講：「佢今日唔知咩事突然喊晒落咗去見社工。社工就幫佢搞早退。」

「突然喊晒？你地知唔知佢因咩事喊？」

樂樂同冬冬搖晒頭。

「咁緊張人就打比佢啦！」

我繼續無視Apple 。

「阿匡，你唔洗擔心嘅。佢周不時都會咁。」樂樂。





「嗯。」我點頭。打算將手鏈叫佢地幫我交比蟲蟲。但嗰條Apple絕對信唔過，所以打消念頭。

我同佢地say咗個bye後佢地就離開。嗰個Apple仲嘈生晒，唉⋯⋯阿波！飛咗佢啦！

見佢地走晒之後，我即刻撥咗個電話比蟲蟲。點知電話唔通。唉⋯⋯無端端喊？早退？今朝仲冇事架喎！真係擔心死人！

= = = = =

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師