真人真事改篇﹕師生戀﹕《最接近的陌生距離》: 第三十五章之四
嗯，可能我真係敏感咗嘅，又或者因為琴日Miss陪咗我之後，我個心結被佢解開咗。第二日，Miss同李Sir如常咁相處，我竟然冇第一日咁大反應⋯⋯呃，咁點都有少少比較同唔開心嘅！
可能因為Miss驚我好似琴日咁，佢今日盡量喺學校抽啲時間嚟陪我。小息佢會同我同埋阿偉佢地坐喺小賣部嗰度飲嘢吹水。午息就話逢星期一、三、五先留低溫考試，今日我地就帶Miss去band房玩，睇我地練band。Miss仲即場點歌，點咗首……好似叫咩……《今生今世》？總之唔係我地年代既歌啦﹗
不過今日杰少唔知咩事冇返，我地隊Band冇咗個結他手之下，搞到夾嘢夾到好差。不過Miss又好enjoy睇我地夾band，佢話自己好似返咗去中學咁。
今日好順利到放學。Miss同樣要忙出卷，唉，佢話佢上司好似特登難為佢咁，份卷起碼改咗三四次。Miss話最遲一定要今個星期出到，過埋比校長。如果唔係佢就大鑊。原本我叫佢專心做嘢唔洗嚟，但佢真係好想食屋企飯，所以我一放學就即刻去買餸。
至於蟲蟲呢？ 唉，我喺上次條燈柱下等佢。唔洗一陣就遇到佢啲姊妹。佢地話蟲蟲會拎幾日病假。個傻妹電話又唔通，Msg又唔覆，都唔知咩事。一諗起佢，我個心就⋯⋯⋯
囉囉攣？
係掛？個痴線妹快啲報個平安啦！
= = = = =
晚上七點。我屋企，廚房。
「我唔理佢啦！」Miss將啲雞扒當做佢上司係咁劈：「痴線架！係咁彈份卷！又要我再出過！我唔理呀！我要食屋企飯呀！」
「嗯⋯⋯你終於感受到被人狂彈功課嘅感覺啦！」
「你講多次？！」Miss瞪住我。大鑊，女人揸刀好危險！
「對唔住！我滾湯先！」我拎起煲蓋，放啲蕃茄入去。
「滾緊咩呀？」
「蕃茄薯仔湯。」
「哦⋯⋯」Miss好不爽咁講：「原來係蕃茄匡仔湯。」
「吓？薯仔喎！」
「薯仔即係傻仔！亦即係你！」Miss用把刀指住我：「所以係蕃茄匡仔湯！」
唉，跳晒線咁！佢一定嬲我頭先講錯嘢啦！諗計氹下佢啦。女人不外乎都係鍾意比人讚靚唧！
「盈盈。你扎馬尾都幾好睇呀！有冇考慮轉髮型？」Miss初識佢時，啲頭髮長咗唔少。呢刻將啲頭髮扎咗個馬尾，真心覺得靚。
但Miss冇我預期中嘅反應，只見佢停咗手，慢慢望過嚟：「蟲蟲扎馬尾都好好睇架！」
呢次我⋯⋯仆！街！啦！
哎屌⋯⋯太大意添。死啦，點氹都唔得！佢而家唔只嬲添呀！仲變到好恐怖添！
「切咗你⋯⋯切咗你⋯⋯切咗你⋯⋯」佢一邊切雞扒，一邊咁講。最後仲啤我一眼添！
= = = =
不過都好彩，阿媽教啲廚房魔法太勁，我學咗三成咋，已經成功令Miss開心返晒！
洗埋啲碗，Miss又同我單對單補習。然後佢話頂唔順我間房好亂，話要幫我執一執。我溫到好悶，見佢執緊房，我⋯⋯梗係「執」埋（佢）一份啦。
「執」完之後都差唔多一點，Miss就索性留低過夜。
如是者，咁就開咗個頭，我地開始咗同居生活。日頭Miss就繼續做好老師嘅工作。夜晚我就煮好飯等佢收工，佢就做我嘅幸福小女人⋯⋯哈哈，而家喺屋企我索性叫佢做老婆添呀！
即使佢每日點樣比上司恰到嬲，委屈到想喊都好！經過我嘅廚房魔法之後，Miss一定會開心返晒！呢一刻我覺得我係呢個世界最幸福嘅人！
我地真係好似結咗婚咁！唔知道，我同佢有冇機會行到呢一步呢？
同居第四日嘅晚上，晚飯後我被Miss捉咗去溫習。
「Miss！」我溫書溫到一半，忽然叫佢。即使喺屋企溫書，當佢一進入「老師mode」我都會叫返佢做Miss。
啪—！Miss見我又分心所以一本書拍咗落嚟：「你又唔專心啦！」
Miss嬲爆爆咁，但下一秒佢好快熱淚盈眶，因為——
「我會讀到大學架！」
「嗯？」
「Miss ! 大學畢業之後我一定要娶你！」
「嗯⋯⋯聽住先啦！」Miss低頭微笑，但幸福淚水輕輕滑過佢面龐。然後佢行離飯桌前，背對住我，抬頭叫道：「操past paper。 操唔晒今晚唔准瞓覺！」
「知道！Miss Wong！」
= = = =
一星期後。
「我份卷執到冇得再執！」一身屋企Look嘅Miss食緊我整嘅梅子骨，講：「聽日要拎比上司，再拎埋去比校長睇。其實我估唔會彈嘅，不過太遲出。我要親自同校長解釋！唉⋯⋯」
「嗯⋯⋯食飯先啦。工作嘢唔好再提。」我幫Miss夾餸。
「好呀。」Miss食咗幾啖之後又講:「不過⋯⋯杰少做咩事呀？成個星期冇返學啦喎！唉⋯⋯上頭催我要叫杰少交家長信呀！你知唔知杰少咩事呀？」
「我冇問喎。盈盈呀，食咗飯先啦。」
「嗯。知道。」Miss又只係食咗啖飯後繼續：「其實而家最易留級嗰個係杰少。如果佢聽日有返，我一定要同佢傾一傾先。」
「盈盈，乖，食飯啦。」呢個傻女就嚟被工作壓到傻咗。
我盡量拉開話題，但Miss總係會兜返落工作。我覺得佢壓力好似爆爆地煲。但偏偏呢個時候，門外竟然發出令我同MISS嚇到魂飛魄散嘅聲音！
卡——！卡——！老舊嘅鎖匙，插入匙孔嘅聲音！
卡⋯⋯卡⋯⋯門外嘅人好吃力開緊呢個老舊鐵閘鎖！
鏘——！鐵閘拉開！
我同Miss嚇到瞪大隻眼！
「老公，你唔係話爸爸媽媽呢個星期六先返嚟香港咩？」Miss好驚咁講。
「死啦！佢地可能早返呀！」
Miss有一秒時間匿埋！⋯⋯唔係！係得返半秒都冇！
因為屋企大門正緩緩打開！Miss點避都避唔到呀！
死啦！阿媽見過Miss架！ 如果見到Miss成身屋企Look出現喺我地屋企，咁點算呀！？可以點⋯⋯盲嘅都知我同Miss有嘢啦！
生銹嘅門胶發出令人刺耳嘅聲音。更令我同Miss心寒起嚟！
.
.
啪——！
門開了，門外嘅人嚇到我同Miss手都軟晒，跌咗對筷子落嚟。
「Hi! 哈⋯⋯你⋯⋯你好呀⋯⋯哈⋯⋯」Miss尷尬揮手微笑。
= = = =
ar_hong_91
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師