真人真事改篇﹕師生戀﹕《最接近的陌生距離》: 第三十八章之三

七點鐘，屋企，廚房。

我望住滾緊嘅水，個心去咗第二度。只係記起，杰少嘅說話：「幫手睇下佢點出題啦。咁唔會麻煩到佢啦掛？」

我嗰時只係好不滿咁望住佢就算，冇直接拒絕佢。我始終喺友情同愛情上掙扎緊。一個係我兄弟，一個係我女朋友，我兩邊都唔想得失。惟有搵個平衡。但Miss講過，洩露試題係大罪，佢係會即刻被人炒。唉⋯⋯一陣可以點同Miss講呀？

「喂！細佬！就嚟煲乾水啦！！」家姐嘅叫聲令我回神過嚟。

「噢！仆街！」掛住諗Miss啲嘢，諗到唔記得睇火。





我嗱嗱聲熄火後就嘆咗口氣。家姐就埋嚟幫我手煮嘢，佢問我：「你好愁喎。同盈盈嗌咗交呀？」

我搖一搖頭，就話：「唉，慘過嗌交呀。」

叮噹——！剛好門鈴響起。Miss返嚟啦。我盡力做一個開心樣嚟歡迎佢，點知我一開門，Miss個樣係令我想扮開心都扮唔到。

「我⋯⋯我想⋯⋯借你部電腦用。」

Miss一見到我就已經開始喊。除咗喊，我更感受到佢有嬲嘅感覺，好似一個就爆嘅氣球。





我點咗下頭就比佢入屋。Miss除咗鞋就入咗我房用電腦。家姐喺旁邊睇住件事，佢都忍唔住出聲問：「佢咩事呀？」家姐係用一把氣聲咁講。

我冇答家姐，九成都係啲委屈嘢。我去廚房煮埋個晚飯先。

「你去氹下盈盈啦！佢唔妥喎！呢度我等幫你搞啦。」我同家姐雖然自細嘈交多過食飯，但關鍵時刻佢係好撐我。

「佢返嚟咁急用電腦。睇怕都係因為出試卷嘅事。」我都冇咩心機去煮呢餐飯。我繼續話：「佢上司唔知做咩事！份卷前後改咗好多次，係都要為難佢！」

工作嘅嘢，我自問真係幫唔到手。惟有整餐好味嘅屋企飯比Miss食。喺我煮飯嘅同時，其實聽到Miss同學校嘅人傾緊計。我先知道佢唔止煩緊出試卷問題，仲有被人追緊Sen會嘅會議紀錄、中文朗誦⋯⋯排山倒海嘅工作。到我煮完飯，擺好晒枱，Miss都仲未喺房出嚟。





我唔敢嘈佢，搞到我同家姐戇居居咁坐喺度等運到。
家姐拍一拍我肩，佢話佢幫手叫Miss出嚟食飯。良久，家姐邊請邊笑咁出嚟。

「食完飯先有力架嘛。係咪？」

Miss尾隨出嚟，一面強顏歡笑，話：「Sorry呀，要你地等咁耐。」

「我地食飯呀！」家姐嘗試營造氣氛。

「盈盈，食飯啦。」我

「嗯。」

我幫Miss夾餸，然後就話：「盈盈，呢碟叫啤酒骨。好難得先食到架。你知唔知點解？」





「點解嘅？」Miss細細咁食一口，面無表情。

「因為要用啤酒醃骨。我未夠秤唔買得酒呀。」

「所以呢味餸我都有份幫手架。」家姐腼腼一笑。

「扮嘢啦謝子瑜！你幫手買啤酒之嘛！」我串返家姐。

「嗯⋯⋯好食。」然後Miss爬咗幾啖飯後就話：「我飽啦。我想返入去做嘢。」

「不如飲埋碗湯先啦。」我。

「等我去畢呀！」家姐衝入廚房，然後拎咗碗熱辣辣嘅湯出嚟。

Miss望住咁熱嘅湯無端端嘆咗口氣，就話：「我好多嘢做。今日有家長投訴我，我今晚要交份report比副校長解釋發生咩事。」





「飲咗湯先啦。」

「你可唔可以聽埋我講晒先架！！」Miss突然發嬲，嚇到我同家姐都比唔到反應：「係咪連比我呻下都嫌煩呀？！」

「我冇呢個意思，我只係想你休息下啫。」我溫柔咁講，但突然被佢噴咗下，話冇嬲就假嘅。但Miss嘅處境係要體諒多啲，所以我點都忍住。

我望去家姐度，家姐都只係示意我由得Miss就算。

Miss靜咗幾秒就對家姐：「Sorry。」佢有啲內疚咁望咗我一眼，就拎起碗湯飲。

呢個時候——

嗶嗶——此時我手機響咗下，係杰少msg我。





「幫幫手！匡哥！細佬我會好感激你！記得幫我問Miss呀！」呢條仆街仔，厚面皮到一個點⋯⋯好死唔死，我將部手機放咗喺枱上面。呢個Msg一出，就比Miss見到晒！

啪——Miss放低湯碗，平靜咁講：「杰少又想點呀？」

簡簡單單一句，我已經感受到Miss嘅情緒已經就到臨界！

= = = = 

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師