真人真事改篇﹕師生戀﹕《最接近的陌生距離》: 第四十章之一
「上司啱啱先批咗份卷！我打算print hard copy出嚟，等校長開完會返嚟交比佢⋯⋯我⋯⋯我⋯⋯嗚⋯⋯⋯嗚⋯⋯！」
Miss喊到失晒聲，佢唔係怕遲交考試卷比校長。而係怕試題外洩！呢個真係死罪嚟！
「盈盈，你冷靜啲諗下先。係咪真係print咗出嚟？」
「我有呀！我入埋落公文袋架！」Miss拎起一個空嘅公文袋講：「我入落呢款架，上面寫住classified呢款呀！本身我有三份呢啲袋，而家得兩份！即係我真係有print出嚟啦！」
「會唔會擺咗喺第二度呀？」
「我唔知呀！唔好再問我！我function唔到呀！」Miss激動對我大叫。
死啦！可以點幫佢呢？
「你make sure你print完放咗喺枱度？」
「嗯！」
即係理論上由我同Miss入教員室前，份試卷一定喺Miss位度。
今日學校得返佢同李Sir兩位老師⋯⋯忽然間我好似知道件事究竟係點！
「盈盈，頭先你離開教員室去校務處時有冇拎埋份卷出嚟？」
「好⋯⋯好似⋯⋯」Miss苦思一輪後，再話：「冇。我冇拎嘢。」
「咁得啦⋯⋯」我心底嘅怒火開始燃燒！因為Miss去緊校務處嗰時，李Sir又喺球場上面，得一個人入過教員室——杰少條仆街仔！
「我幫你搵返份卷返嚟。」我拍一拍Miss肩，好冷靜咁講。
但呢份冷靜帶嚟危險啲氣息，我再忍受唔到杰少三番四次對Miss嘅冒犯！
呢條仆街仔⋯⋯唔教訓唔得！
= = = =
雨天操場，體育室前，李Sir同杰少執緊嘢！
「張禮杰！！」我大聲喝叫，佢地兩個都比我嚇一大跳！
杰少應聲回頭嗰下，我就一拳中咗落去！
碰——！！「哇——！」杰少失衡跌低！
「喂！」李Sir喝止我！仲擋住咗我
「行開！」喺盛怒之下，即使健碩嘅李Sir都阻止唔到我，被我一手推開！
呢個時候杰少已經起返身，一拳打出，鬧咗聲粗口：「痴線架？做咩打我呀？！」
我彎身避開一刻，右拳已蓄勢待發！碰——！擊中佢 腹 部！「哇——！」
「交返出嚟！」我揪住佢衣領chok咗幾下，再喝佢：「你自己做過啲咩！你心知肚明！」
「妖！交啲咩出嚟呀！」杰少掙開咗我。我地扭埋一團，一陣拳來腳往！
「你夠膽偷試卷？！」
「你講咩呀！哇——！」
佢被我一招撻低佢，將佢塊面撳喺地下，我喝佢：「我唔幫你問盈盈！你竟然索性去偷試卷？！做人做到你咁撚仆街？！」
杰少兩手掙扎，連忙叫喊：「我冇呀！我點會偷試卷呀！」佢慌張之時，爪 .傷咗我手臂！
我將佢塊面撳喺粗糙嘅地上面狂捽，佢想為自己辯護都唔得！我繼續喝罵：「頭先得你一個入咗教員室咋！仲唔係你？你賤成咁？有冇當我係朋友呀？有冇當我係兄弟呀？」
「妖！」杰少一腳 伸開我！
我喺地上面翻滾幾下，好快我企返起身。但被杰少乘機請咗食「兜鎚窩面」！
「我冇偷試卷呀！」杰少被我喺地上面捽咗幾嘢後，佢半邊面花晒，流緊血。
「盈盈唔幫你！你想害死佢？！」我食咗佢招「兜鎚窩面」之後，權骨發燙！
我同杰少互相辱罵時，又扭打一團。打打下已經忘記咗大家曾經係一對好深感情嘅兄弟！
「搵著數就兄弟！唔順你意就搞人！你老豆斷腳係報應呀！冚家 拎老綜，乞兒仔！」我嬲到用上最惡毒嘅說話去攻擊杰少。佢聽到我咁講之後怒火燒到上心，已經毫無保留咁對我還擊。
我同佢周身傷晒，但身上嘅痛都及唔上個心碎開嘅痛！杰少被我打被我鬧到氣急敗壞，兩隻眼都紅晒，又嬲又哽咽咁講：「我冇呀！我冇偷試卷呀！我冇做過呀！」
任佢點向我吶喊，我都係唔會聽。佢琴日點對盈盈，我要佢百倍奉還！
突然間，一把女人聲好似天上劈落嚟咁——「你兩個停手呀！」
話音剛落，我眼前有一個快影攝咗入嚟，好用力將我撳住咗！呢個人就係李Sir！
「停手呀！唔准打交！」李Sir撳實我雙肩：「阿匡！冷靜啲呀！」
「冷咩靜呀！條仆街仔偷試卷呀！」我奮力掙扎，要掙開李Sir個制肘！明顯係我同杰少打到最激烈嘅時候，李Sir走咗去搵Miss幫手。
「要我講幾多次你先信我呀！我真係冇偷試卷呀！」杰少崩潰咁大叫，終於喊咗出嚟。
Miss埋去安撫杰少。而我就不斷掙扎不斷大叫：「交返份卷出嚟呀！」
杰少被我刺激之下再惡言相向，Miss即刻喝止佢：「杰少收聲！」然後Miss向我望嚟，一雙喊到腫晒嘅眼睛好惡咁瞪住我！
「你冷靜啲呀！」Miss氣急敗壞，眼泛淚光！
「係佢偷你份卷架！」我掙開咗李Sir雙手，但好快又被佢捉住咗！
「低B仔！你聽我講先呀！」Miss大叫。
「杰少好過份！佢蝦你呀！」我奮力掙扎！極力掙脫！
「你怪錯咗杰少啦！」Miss上前同李Sir一齊撳住我。
「係佢！一定係佢！」
「哎——！」Miss一聲痛叫，混亂之中我唔小心爪傷佢手背。
盛怒之下嘅無情力最終喺佢地兩個制肘之下掙脫而出。諗起呢兩日嘅一切壞事都係因杰少而起，我心中嘅怒火燒得好旺盛，直頭想打到佢入醫院為止！
但我甫一上前，Miss擋起我前面，手一起——
.
啪——！
.
我面頰立即發痛，一股熱力由皮膚深處滲出嚟。
我成個人呆晒。
.
啪——！
.
我塊面嘅痛再痛多一下，但唔及上心入面嘅痛！
「離晒譜架！！」Miss眼角流淚，狠狠地鬧。
Miss摑咗我兩巴掌。
呢兩巴掌打落嚟，個心痛到我難以形容，仲令我對杰少嘅盛怒於一瞬間消失！
我撳住發痛發燙嘅面龐，呆住咁望Miss。Miss好努力咁忍住唔想喊，但淚水都係唔受控制。
「你成日都唔聽我講！」
「⋯⋯」
「係咪想打死杰少先收手呀？」
「⋯⋯」
「明明你為咗我進步緊架！仲係咁衝動！點解要返轉頭呀？」
「⋯⋯」
「講咗唔准打交！唔准打交呀！係都唔聽我講嘅！又變返以前咁！」
「⋯⋯」
望住失望到掩面痛哭嘅Miss，我冇嘢好講。我一嬲起上嚟，我真係咩都忘記晒！Miss勸我、教我嘅一切一切，統統都忘記晒！
而家氣溫好似急劇下降緊，大家都唔敢出聲。片刻之後，Miss哽咽講：「對唔住。」
佢呢句道歉係同杰少講。
「份試卷冇唔見到。」
吓⋯⋯？！
「係我大頭蝦，我忘記咗份試卷係我一早托李Sir交咗去校務處。」
我怪錯咗杰少？
「哈⋯⋯」杰少笑出聲，帶住諷刺同痛苦嘅意味。
李Sir上前埋去杰少度安慰，杰少撥開佢隻手，執返自己背囊，哽咽咁講：「兄弟喎⋯⋯哈哈⋯⋯」
杰少慢慢咁離開，我同佢嘅兄弟情到此為止。
Miss既嬲又傷心咁飲泣，佢一直望住我唔出聲。我知佢有好多嘢想同我講。但我見佢嘆咗一口長氣，我感受到佢嘅疲累同失望。
李Sir雙手拍住Miss雙肩，柔聲咁喺佢耳邊安慰。Miss輕拍李Sir隻手，佢地兩人就轉身離開。
Miss咩都冇同我講就走咗。
佢任由我一個人留喺呢個冰冷同寂靜嘅雨天操場上。
= = = =
ar_hong_91
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師