真人真事改篇﹕師生戀﹕《最接近的陌生距離》: 第四十一章之一

有冇咁啱呀？咁都撞到蟲蟲？我同佢對望一陣，先係好驚訝，再笑咗幾聲。

「點解你會喺度架？」我同佢同一時間咁講，我地兩個又嚇咗一跳。

「關你鬼事呀？」又同一時間咁講，又驚咗一下。然後我同就忍唔住大笑起嚟。

傻架咩？有冇咁合拍呀？撞到都算，講嘢都連續撞機咗兩次？

「我地⋯⋯好似好耐冇見喎。」蟲蟲兩手放喺腰背，有啲腼腆。





「啊⋯⋯係呀。」我搔一搔後腦：「我知你好多日冇返學。」

「嗯！」蟲蟲點頭，又講：「一匹布咁長⋯⋯」

遠處嘅人大聲叫蟲蟲：「得未呀蟲蟲，等你開波呀！」

「啊—！sorry呀！嚟緊啦！」蟲蟲向佢啲朋友大叫。

我比返粒波蟲蟲，話：「你返去陪朋友先啦。我地Whatapps再傾。」





「不如你都跟埋嚟一齊玩呀。」蟲蟲接過粒波，笑住同我講。

「吓？我唔熟你啲朋友喎！」

「怕咩呀，其實⋯⋯」蟲蟲暗暗偷笑：「其實我同佢地唔熟架。」

「吓？！」

「嚟啦！你當陪下我啦！對住佢地好老尷架！」蟲蟲拉住我行去佢啲朋友度。





佢嘅朋友年紀似係大學生，個樣好正經，見到我嗰時異常熱情，咁⋯⋯梗係啦！原來佢地係附近教會啲大哥哥大姐姐嚟架！

「你好嘢⋯⋯你想踢我入會⋯⋯」我喺蟲蟲耳邊講。

「冇啊⋯⋯係佢地想踢我入會咋⋯⋯」蟲蟲好似玩腹語咁依然對眾人微笑。

突然間一位好靚嘅大姐姐兩手大力一拍合什咗，勁誇張好興奮咁講：「啊！好感恩呀！感謝主呀！蟲蟲搵到新朋友加入我地呀！」

「嗯！感謝主呀！呢度真係一片大禾場呀！我地要努力啲呀！」

「蟲蟲未決志都可以搵到新朋友，主真係好愛蟲蟲呀！」

「係恩賜呀！好大嘅恩賜呀！」

「我地要為主而活！」





「我地要搵多啲羊仔羊女返嚟！」

「開拓神嘅國度！」

「Amen !」成班大哥哥大姐姐一齊叫。

我同蟲蟲嚇到呆晒。

「係咪好老尷呢？」蟲蟲繼續用腹語技講嘢。

「你確定唔係邪教？」我側埋一面講。

唉⋯⋯大佬呀！今日咩事呀？我想靜下啫，咁都撞到班耶撚。不過，雖然鳩係鳩咗少少，但呢班哥哥姐姐又真係好nice 好好人。我地玩咗幾局數字球之後就熟晒。然後就兩人一組，用排球玩下攻守。我同蟲蟲就一隊，贏咗就留低接受其他隊挑戰。





「你咪拖我後腿呀。」我

「呢句說話係我講架！」蟲蟲

之前我同蟲蟲水溝油咁，點估到我同佢都幾夾，一直冧莊，挑贏啲哥哥姐姐。

「Yeah！」

喺最後一局後，我同蟲蟲互相擊掌！

打完波，班哥哥姐姐唔知邊度潛把結他出嚟，一齊唱聖詩⋯⋯係，就係點唱都唱到好似講粗口嗰首「主能夠」。

「好啦，都已經十二點啦！我地今日到此為止啦！」一位四眼哥哥講。

「蟲蟲，希望你聽日可以嚟主日崇拜啦！」大波姐姐抱住蟲蟲。





「阿匡！我地約定你地聽日主日崇拜見！」肥仔哥哥抱住我⋯⋯屌！我要大波姐姐抱抱呀！

最後，佢地做埋個祈禱就散晒。

望住佢地遠去嘅身影，我嘆咗一口氣，終於應酬完佢地啦！我望住蟲蟲，佢表情同我一樣都係無奈苦笑。

「你肚唔肚餓呀？」我同佢又撞機！

然後佢笑一笑，話：「我未食晚飯呀。」

「唉⋯⋯我成日冇食嘢添啦。」

「咁我地去搵嘢食啦！」





「Let Go!」

= = = = 

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師