真人真事改篇﹕師生戀﹕《最接近的陌生距離》: 第四十二章之三
「我返嚟啦。」我拖住疲累嘅身體返嚟。
打開門第一眼就見到家姐殊我，輕聲咁話：「咪咁大聲啦！老豆阿媽瞓緊呀！」
「佢地幾時返架？」
「琴晚囉。佢地知你又出街，好嬲呀！你過嚟先。」家姐帶咗我入廚房度傾：「琴日唔見咗成日！又唔返屋企！電話又唔通！」
「電話冇電呀！」
家姐打量我全身，就嘆咗口氣，搖頭咁講：「呢鋪你真係大鑊啦。」
「你知道晒？」
「一啲啲啦。盈盈講咗比我聽，你同好朋友打交。」
「就咁咋？」唔知點解，一提Miss我心底有啲嬲，發晦氣咁講：「唔係為咗佢，我會同杰少冇兄弟做？」
「你⋯⋯成熟少少啦。」
「哈⋯⋯連你都咁講。」我指住自己塊面話：「佢打我兩巴嗰時都係咁講。覺得我比麻煩佢！」
家姐自知同我冇得傾，搖晒頭，就話：「佢琴晚成晚都搵緊你，今日好覆返人呀。」
「嗯。」
「唔好鬥氣呀。我知你都有苦衷，你都想有人氹。但愛情就係咁，不嬲都冇絕對公平。千祈唔好好似家姐咁，鬥氣鬥到連男朋友都冇埋。」
家姐呢句好有道理，佢拍一拍我膊頭當支持我。我做咗佢十六年細佬，最窩心都係呢次。
然後我去沖涼，洗面，換衫，再補返個靚眠。
我攤喺床度，差返部手機。然後連串提示聲，我發現有20個未接來電，Whatapp有一大串訊息，全部都係來自Miss。
「低B仔，你喺邊呀？」（20:00）
「我想同你傾返今日嘅事。有冇時間？我地而家出嚟見呀？」（20:05）
「低B仔，我知你嬲緊我。對唔住⋯⋯我今日唔應該打你。」（20:20）
「你而家喺邊呀？家姐話你未返屋企。」（21:00）
「我搵唔到你。可唔可以聽電話？」（21:30）
「你去咗邊呀？擔心死人啦。你家姐都搵緊你呀。」（23:00）
最後一個whatapps msg係凌晨兩點。
睇住呢串msg, 我心情好複雜。我一方面好難過要佢擔心一晚，但同一時間我嬲佢點解出咗事隔咗六個鐘先問我有冇事？
我好嬲好嬲好嬲佢粒聲唔掉低我喺學校，然後佢返去做佢自己嘢。佢都識講，佢有事係希望我第一時間用男朋友身份關心佢。但佢呢？我嘅感受邊個去理呀？
愈諗愈嬲。最後我將電話掉埋一邊，倦喺被窩入面補眠就算！
= = = =
嗶⋯⋯嗶⋯⋯！
手機響起，嘈醒咗我，時間係中午12點。
我望一望來電，係Miss打比我。我猶豫緊聽唔聽好，直至我感覺到鈴聲將要停落嚟時，我先接電話。
「盈盈⋯⋯？」
「低B仔⋯⋯」
聽把聲都知Miss好唔開心。
「你擔心死我啦。」我聽得出Miss把聲好擔心我，但總係有怪責嘅意味。佢繼續講：「我搵咗你成晚，又唔聽電話又唔睇Whatapps。」
佢愈講，怪責嘅意味愈重。 總覺得佢好似拿捏唔到老師同女朋友兩個角色嘅平衡。
「Sorry，我手機冇電。我今朝先見到Whatapps。要你擔心，Sorry。」
「點解今朝見到Whatapps都唔即時覆返我？要我而家打比你？係咪我唔搵你，你就打算成日都唔搵我？要我繼續擔心落去呀？！」
Miss愈講愈激動，令原本窩心嘅關心都變質起嚟。
明嘅，佢係我班主任嘛。
但我個心痛得好緊要，好緊要。
「我喺海濱公園坐，吹風吹咗成晚。今朝返嚟我攰到瞓咗。Sorry。」
「噫⋯⋯」Miss有哽咽咗一下，責備意味更重：「你傻咗咩？琴晚好凍架！點解你⋯⋯點解咁⋯⋯」
我知佢想教訓我啲咩，我索性幫佢講埋：「幼稚呀嘛！」
「唔係呀⋯⋯！點解你要咁對自己呀！」
「因為幼稚囉！解釋晒架啦！」
「我唔係想鬧你呀。我琴晚其實想即刻陪你架！」
「我做咩都係幼稚。我想搵個地方靜下都係幼稚。老師，對唔住，我錯。我錯晒！我係抵比你打架！」
「低B仔！」Miss語氣大咗，叫停咗我。佢飲泣咁講：「你又唔聽我講啦⋯⋯嗚⋯⋯」
「⋯⋯」
「嗚⋯⋯噫⋯⋯我同你發生緊咩事呀？嗚⋯⋯」
呢個時候我忍唔住默默咁喊緊。
係，我同Miss發生咗咩事？
「Sorry，盈盈。對唔住。」我吸咗啖氣，我知道再僵持落去，我同佢嘅矛盾只會愈嚟愈深。我好驚愈傾會愈出事，於是盡管我對Miss有好多情緒，我只能搵一個較好嘅說法：「我成晚冇咩點瞓。我好似有少少冷親，精神唔多好。所以⋯⋯對唔住⋯⋯。」
Miss冇回應，我只聽到佢嘅喊聲。
「盈盈，我想瞓一陣。有咩今晚或者聽日再傾？」
「嗯⋯⋯咁你好好休息。」
「嗯⋯⋯bye。」
我同Miss平時通電話，即使講再見，都總會講多一兩句情話。但呢刻，我同佢好默契咁唔多講啲咩。一聲bye之後就收咗線。
收線後，我思緒沉澱起嚟。
內心有一股不安油然而生。
.
.
我同Miss出咗咩問題呀？
= = =
ar_hong_91
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師