真人真事改篇﹕師生戀﹕《最接近的陌生距離》: 第四十四章之二
當我去到我嗰班嗰層時，就發現高年級訓導老師喺晒度。黎Sir貴為訓輔主任，佢當然喺現場協調人手。
當我返課室時，就見到成班企晒喺度，書包放晒上書枱上面。班房入面除咗有Miss外，亦都有高年級訓導老師羅Sir。
我門外敲一敲門，成個黑面神嘅羅Sir即刻兇我：「你頭先成堂去咗邊！」
Miss應該知我成堂去咗見社工，於是上前好細聲同羅Sir講點解我成堂唔見咗。
Miss同羅Sir傾完嘢之前，眼神同我對接，但好快避開咗。眼睛係靈魂之窗，Miss呢一下眼神令我意會到佢想拉開我同佢嘅距離。我彷彿搵唔到佢嘅溫柔同親切。
同Miss關係搞到好僵，無啦啦被人屌，心情堅唔多好。呢個時候羅Sir行去黑板前，講返生咩事：「今日有同學公然喺學校食煙。經訓導盤問之後，原來係你地呢級有人喺學校賣散裝煙⋯⋯」
潮！呢件事咋話？等到我金盤洗手咗好耐先嚟捉人？「人渣添」都退咗學十世啦！唉，總之就無啦啦比人當犯咁罰隊，仲要比人搜書包！
Miss跟住羅Sir逐個搜同學嘅物品。羅Sir好似驗屍官咁，搜得非常仔細，連筆袋嘅內格都要打開比佢睇，又問長問短咁。佢呢種一口咬定我地係犯事嘅態度真係好討厭！
最後，羅Sir終於搜到嚟我度。佢埋到嚟已經好唔友善就話：「全班搜過都冇。係得返你咋喎，謝子匡。拎出嚟啦。」羅Sir向我攤出手板：「你願意誠實嘅話，我從輕發落。」
呢下真係搞著咗我，我即刻話：「係咪搜唔到嘢搞到你好冇面呀？你搵我做落台階？食錯藥呀你？」
羅Sir瞪大眼指住我，又轉頭同佢身後嘅Miss講：「Miss Wong! 你啲學生態度好差喎！」
呢句更令我火起，我即刻話：「咩叫『Miss Wong 你啲學生呀？』！我都係呢間學校架！都係你嘅學生嚟架！好學生就係你嘅！壞學生就賴落Miss度！你有冇搞錯呀？！」
「班長！」Miss呢一下聲音好冰冷，佢好似一下子返去初初開學咁，做返嗰一位嚴肅嘅黃梓盈老師。
「唔准駁老師嘴。」Miss冷漠到成個機械人咁。我同佢嘅距離感愈來愈大。
我不解咁望住佢，明明個幾鐘頭前，佢都仲會叫我做「低B仔」，只係短短嘅時間就變成咁？我好想即刻同佢講：「喂！我幫緊你講說話架！」
但Miss微微抬高下巴，睥睨咁望住我，彷彿同我講：「我唔洗你幫。」見到佢咁，令我⋯⋯失落到不自覺咁垂低頭。
羅Sir呢個時候笑騎騎走嚟，揶揄幾句：「咁未乖囉。肯合作我唔會為難你嘅！」然後佢就想伸手抄我書包。
頂你！撞正我心情唔好，加上公然串Miss！呢啖氣我點都要幫Miss出！我就同你玩嘢！
「阿Sir你有冇搜查令呀？」我一手捉住羅Sir嘅手，態度變返開學嗰個壞學生謝子匡。
羅Sir被我激到成塊面紅晒，大喝一聲：「你咪哂時間！你係咪身有屎呀？！」
「係成班人先會陪你癲！書包係我私人財物，你要搜我書包先經我同意！你咁做係侵犯我人權！」我指撚住佢嚟講。
「你係咪想一個小過？不聽從師長指示係一個小過架！」
「你夾硬搜的話，我就去教育局投訴你！羅迪朗！」
我將一切嘅不快發洩晒落羅Sir度，我心中有一下快感。
「Miss Wong！ 唔該話下你嘅學生！」羅Sir用好差啲語氣同Miss講嘢。
Miss上前：「班長，係咪想記過？」然而Miss嘅說話冇晒尾音，徹底變成另一個人咁！
「投訴我咁惡呀？」羅Sir一面囂張，心生一計就話：「咁我唔搜你書包。我要你自己攤出嚟比我睇！」
咁樣做，羅Sir就唔算夾硬搜我書包。嘿⋯⋯咁又點，我都冇撈賣散煙好耐啦。真係驚佢有牙咩。
「好呀！」我微微一笑，好合作咁自己攤開書包同雜物比佢睇。本來我睇住羅Sir個失望樣，我就暗爽。直至我自己拎咗個細小啲木盒出嚟時，我就開始笑唔出。
「打開佢。」羅Sir指住個木盒仔講。
個木盒仔其實係普普通通喺DT堂整嘅手工。但係，裝喺木盒仔入面嘅嘢唔簡單呀！係——
.
蟲蟲條手鏈！
.
「開啦！仲唔開？」羅Sir見我猶豫起嚟，就好似終於提到我痛腳咁雀躍。
呢次真係肉隨砧板上，唔開唔得！於是我將個木盒打開咗——
羅Sir一面失望。
Miss一面疑惑。
我就一面奶晒嘢咁嘅樣。
一條人手穿嘅珠仔手鏈，啲玻璃重新擦返光亮，正閃閃生光。旁人一睇，呢一份係親手整出嚟嘅禮物。點睇都似送比女朋友。
但係我同Miss都唔係咁諗。
我望住Miss詫異嘅神情，佢一定知道呢條手鏈唔係用嚟送比佢。要送，就一定喺同居嗰期送咗。
好可能呢一刻，Miss已經知道手鏈嘅主人係邊個？
氣氛再一次跌落冰點，我將注意力擺喺羅Sir度，揶揄佢話：「阿Sir，我同你講。得閒就搜下男廁水箱。會搵到你想要嘅嘢！邊有人咁蠢會帶貨喺身呀！」
我除咗想拎返個尾彩之外，亦都想令氣氛唔好咁僵。但係冇用，我感覺到當蟲蟲嘅手鏈出現喺Miss面前時，我同Miss之間嘅矛盾又加深咗⋯⋯
= = =
ar_hong_91
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師