真人真事改篇﹕師生戀﹕《最接近的陌生距離》: 第四十五章之三
然後我同蟲蟲一路食，一路傾計，氣氛變得好愉快。佢又笑我今日喺港鐵同大媽嘈嗰時好鬼衝動冇腦。冇耐之後，我地真係清晒埋積如山嘅小食。好撚飽。但蟲蟲竟然話——
「我地去食刨冰囉！」
「吓？！你未飽咩？」
「好好食架！嚟啦！」
蟲蟲好雀躍咁又帶我返去太安樓嘅甜品店，叫咗一碗刨冰食。
「你真係唔食？好好食喎！」
「你個肚係黑洞嚟架？」
「錯！係有兩個胃！」
「唉！你真係女仔嚟！不過⋯⋯真係咁好食？」
「你試下。」佢𢳂咗啖冰遞比我。
我有少少猶豫，畢竟⋯⋯呢個係佢食過嘅匙羹。我先唔理佢點諗，但我食咗落去，就代表我同佢嘅關係再唔係單純嘅友情。
我嘅思考只係短短一秒，但我大腦彷似過咗成分鐘咁耐，諗起今日嘅事。
諗起Miss嗰個漸漸變得陌生嘅面貌同身影——
.
「嗯！係好好食喎！」
我最後食咗佢𢳂比我嘅刨冰。
.
「係咪呀！我幫你嗌多碗呀！」蟲蟲舉手嗌：「唔該⋯⋯」
點知店員話所有刨冰都賣晒。
「哎吔⋯⋯」蟲蟲有啲失望。
「算啦！下次先！」我笑住講。
蟲蟲笑一笑，同店員要多一隻匙羹，再遞比我：「一齊食呀！」
蟲蟲變到好似幾歲嘅妹妹仔，好樂於分享自己嘅喜悅。
「好呀！」我都比佢呢份純真、可愛同爽直所打動。同蟲蟲你一啖，我一啖咁清晒碗刨冰。
= = = =
食完刨冰之後時候都唔早。
「哎吔！就遲到！要趕返去家舍啦！」蟲蟲望一望錶就好焦急。
「我送你呀？」
「唔洗啦。一陣比姑娘誤會我去拍拖就麻煩。我去坐鐵呀。」
「我都係呀！咁一齊行！」
「嗯！」
於是我同蟲蟲返去西灣河站。我同會企咗喺月台中間嘅行人路，佢坐柴灣方向線，我就坐去上環嘅線。我同佢各自都企開約一個身位距離。剛好，我地嘅車都走咗。
於是我地冇講啲咩，只係默默咁對望微笑。
「往柴灣方向列車將於三分鐘後到達。」
「往上環方向列車將於三分鐘後到達。」
蟲蟲聽到廣播，就指一指月台就話：「我架車就到啦。」
「嗯。我都係。」我內心蘊釀緊一種奇怪嘅感覺。
「咁⋯⋯bye。」
「嗯⋯⋯bye⋯！」睇住蟲蟲轉身想走嗰時，我內心有一下難忍嘅衝動，令我叫咗聲：「蟲蟲！」
「嗯？」蟲蟲回一回頭，不解咁望住我。
「其實我⋯⋯」我內心忽然有一股陣痛，我Feel到淚線好似被一啲嘢刺激緊，搞到把聲有少少哽咽：「其實我今日好唔開心。」
「嗯。」蟲蟲好似好明白我咁點一點頭。佢冇即刻安慰我，只係默默咁聽。佢轉返個身，正正咁對住我。
「我今日同女朋友嗌大交。佢話⋯⋯佢話⋯⋯」我好用力咁咬一下唇，忍住喊嘅衝動，繼續講：「佢話想同我冷靜一下。我唔知係咩意思。我同佢經歷咗好多嘢，好多好多美好嘅事情。我好驚佢唔再當我係一回事⋯⋯我好驚對佢嚟講只係no body! 我更驚嘅係，佢其實想同我分手。」
我吸一口氣，再吸一口。
「往上環方向列車即將到達！」
「往柴灣方向列車即將到達！」
兩邊月台廣播同時響起。
「多謝你！頭先同你一齊⋯⋯我有兩個鐘係完全忘記咗呢件事。蟲蟲！多謝你，我今晚同你一齊⋯⋯好開心。」
月台一陣嘈吵，兩邊列車已經到咗。兩邊月台列車同一時間開門比乘客落車。成個月台即時人潮如湧，我同蟲蟲就好似置身於洪流之中。
「不過而家要走⋯⋯我又記返起女朋友。我個心就好驚、好擔心。原來我真冇辦法面對到我同佢嘅問題。」
眼下係人來人往，蟲蟲忽然好似定咗格咁，依然保持住可愛嘅微笑。
.
「阿匡。」蟲蟲溫柔對我微笑。
佢喺我最焦慮時嗌咗我一聲。
.
呢一刻嘅蟲蟲變得同以往唔一樣。佢嘅笑令我安心起嚟，蟲蟲向我踏前一步，又一步，企咗喺我身前。佢向我舉起手，露出雪白嘅前臂。
我唔明白佢呢動作嘅意思。直至蟲蟲開聲講——
.
「咬一啖呀。」
.
吓？即係⋯⋯
我一面不解，蟲蟲再遞前一啲：「大大力，咬落去呀。」
我仍然唔明白，只好跟佢說話做張口大力咬落佢手腕度。
「哎呀——！」蟲蟲痛到縮返開隻手，然後望住發紅嘅牙印，就對我微笑咗一下——
.
「你唔洗驚架！我都係真實架！」
蟲蟲向我展示出我留比佢嘅牙印。
.
言下之意，佢⋯⋯
我抵受唔住當刻嘅感動，上前好大力抱住蟲蟲！
「喂！⋯⋯想⋯⋯想搏懵呀？」
「噫——！」內心嘅澎湃嘅感動一下子衝突淚線！我兩眼嘅淚水就即刻湧晒出嚟！喺蟲蟲耳朵盡情咁喊。
蟲蟲掃住我背，輕撫我頭髮，從未感受過佢原來都可以咁溫柔。佢喺我耳邊輕輕聲咁講——
.
「唔⋯⋯唔好喊啦！唔會有事嘅！」
.
我好感激佢安慰我。我成個人崩潰晒，盡情發洩連日嚟嘅傷痛。
我唔知喊咗幾耐。
只見，兩邊月台嘅車走咗一班又一班。
= = = =
ar_hong_91
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師