真人真事改篇﹕師生戀﹕《最接近的陌生距離》: 第四十六章之一
列車駛出駛入，兩邊月台嘅廣播聲唔知響咗幾多次，身邊嘅人群喺我同蟲蟲身邊經過。
我同蟲蟲緊緊擁抱住，只知道已經走咗好多班車，蟲蟲嘅膊頭都比我喊濕咗。直至我嘅喊聲慢慢收細，我地先慢慢放開彼此。
就喺呢個時候，我同蟲蟲又一次對望。
內心忽然有一股感覺作動，就同⋯⋯星期六嗰晚好似。當時我被蟲蟲嘅成長故事所觸動，一份由憐生愛嘅感覺突然出現喺心入面，搞到我差啲⋯⋯差啲⋯⋯想錫蟲蟲一啖。
而家呢刻嘅感覺同星期六好似！上一次係佢喊，我地算係一齊流過眼淚，彷彿搵到一份共鳴。亦因為咁，今次我好似感受到蟲蟲嘅內心同樣有呢份感動！
呢份感動好sweet, sweet到令一直盤踞喺心間嘅酸、苦都蓋過！如果我地之間冇共鳴的話，係冇可能有呢份感動！
難道蟲蟲對我都⋯⋯
再僵持落去，恐怕我地會⋯⋯？！
.
「往上環列車即將到達。」
.
「啊！你架車到站啦！」蟲蟲回神過嚟，似乎扮作冷靜。佢眼神刻意地從我雙眼避開。然後蟲蟲率先行咗去往上環方向嘅月台度，向我招手。明顯，蟲蟲知我同佢都唔對路，借埋站嘅列車打破尷尬嘅時刻。
我自己都好慶幸呢架列車救咗我。如果唔係⋯⋯一切都返唔到轉頭。
列車已經埋站，車門亦都打開，落車嘅人群將我同蟲蟲隔開咗。等到啲人落晒車，我正當想上車時，蟲蟲好似夾硬搵啲嘢講下，有少少尷尬咁話：「你⋯⋯哈哈⋯⋯你喊到隻眼腫晒啦！好醜怪呀。哈哈⋯⋯」
「嗯⋯⋯」我點一點頭，喺門邊回頭望返佢。我發現望住佢時內心激動得令我無法說話。我唔知自己想講咩⋯⋯但其實內心有句說話想講！就係⋯⋯
「蟲蟲，我⋯⋯」
蟲蟲默默低頭，表現有啲羞澀又不知所措，似乎想避開我嘅目光。
.
「請小心車門⋯⋯」
.
當列車響起關門廣播時，蟲蟲先懂得抬起頭望返我，微笑：「我地⋯⋯再見啦！」咬一咬唇，揮手，一面羞澀。
蟲蟲面上嘅微笑心入晒落我個心，撫平咗我本來傷晒嘅心。
嗶嗶嗶⋯⋯車門關上，將我同蟲蟲隔開。我同佢隔住車門互相揮手道別。總覺得⋯⋯我喺佢眼內搵到不捨。即使列車緩緩駛開，我地仍然望住大家，直至列車沒入漆黑嘅隧道中⋯⋯
「我⋯⋯我搞緊咩呀？」我依喺門邊輕嘆。
= = = =
終於返到屋企。望下時間，都差唔多十點。
家姐開門比我，仲叫我嗱嗱聲沖涼，趁老豆老母未收工返嚟就好快啲瞓。因為老豆老母知我放學去咗玩，已經嬲到仆街。
喺我準備沖涼前，家姐問咗我一句：「你同盈盈點呀？」
「唉⋯⋯」我擰晒頭就話：「佢話要冷靜一下。」
家姐難過咁「噢！」咗聲，然後佢指住我，以責備嘅口吻講：「你真係同盈盈鬥氣呀？」
我諗起今日同佢講嘢嘅語氣，的確真係好差，完全係想發佢脾氣。我只好無奈咁點頭。家姐即刻板起口面話：「哎吔⋯⋯你做咩唔聽家姐講呀？我提咗你架啦！」
「嗯⋯⋯」
「我同你講呀。你醒定啲呀。女仔一話想冷靜一下就好大件事架啦！」
「我知⋯⋯隨時散架嘛。」
「係呀。而且呢個時候唔止想追佢嘅人會埋身。盈盈可能會認真考慮下啲追求者，甚至將你同追求者比較一下添！咁你就大鑊喇！」
我腦出閃出李Sir嘅樣貌。
「得啦。我知架啦。」我不安咁講。
「你求神拜佛盈盈個Ex唔好呢個時候返嚟搵佢添！」
「唔會啦！聽盈盈講，佢Ex出咗去外國做嘢啦！」
「唉！你小心啲啦。有啲嘢講唔埋架。佢同Ex啲嘢你知幾多呀？」
家姐呢句好似喺我頭上敲咗下，令我頭腦有一絲嘅清醒。的確，我從Miss口中了解到Vick嘅嘢係非常之少。
憎？即係有幾憎？Miss會唔會趁呢個時候先記起Vick嘅好？ Vick亦有冇再搵Miss呢？唔計Vick，咁李Sir呢？諗到呢兩點，我就驚到唔敢出聲。
「我都好鍾意盈盈架。你唔好蠢到搞到盈盈真係同你分手呀。始終人地真係值得擁有更好嘅對象架！」家姐拍一拍我膊頭，就返執埋啲日用品。
我見到家姐執晒嘢，好似想出門咁，於是我問：「咁夜你去邊呀？返hall呀？」
「嘻⋯⋯」家姐笑得好sweet就話：「我返去男朋友度啦！」
「吓？！你地唔係散咗架咩？」
「咁真係要多謝你同盈盈啦！我同男朋友喺返埋一齊啦！我睇住你地呢件事，我好似學識咗啲嘢。」
屌，我都唔知好唔好替家姐開心添。呢啲算唔算得上叫「將自己嘅快樂建築喺細佬嘅痛苦上？」
「咁都有嘢學？」
「嗯！起碼我知道，雙方如果剩係講自己需要，但唔聽人地嘅需要。其實即係打咗個死結。總之⋯⋯多謝你啦！好細佬！」
我皺晒眉頭，都唔知佢噏乜鳩，剩係覺得佢喺度串鳩我咋。當家姐準備出門前，佢煞有介事咁回頭望我一眼。佢個樣變得勁古怪咁講：「你頭先同女仔出去呀？」
我大吃一驚，就話：「吓？你咁都知？！」
家姐冷冷一笑：「女人嘅直覺！男人係咁架啦，感情出問題一定會搵其他女人嚟做水泡嘅！渣男！！」
「痴線！咩渣男呀？」我被家姐咁講，都咪話唔心虛。
其實我知自己咩事。我好感激蟲蟲喺我最失落時比咗好大嘅安慰我，但應該談唔上鍾意⋯⋯掛？
= = = =
ar_hong_91
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師