真人真事改篇﹕師生戀﹕《最接近的陌生距離》: 第六十八章之三

 
「呃⋯⋯呃⋯⋯Hi⋯⋯」Miss手都震埋向我地全家揮手。Miss望咗我一眼，表情好似講緊「作死你呀！」「我被你玩死呀！」「你搞咩呀低B仔！」⋯⋯冇錯，一個表情就講咗咁多嘢。
 
我今次嘅突擊唔只嚇死Miss，仲嚇到我屋企人呆撚晒。
 
Miss又係著住我大碼件衫，搞到跌膊！下身著短褲，露出白滑出長腿。Miss應該沖咗涼，望落去好乾淨，露出嘅鎖骨令佢更添性感！老豆阿媽未見過佢呢個Look，佢地都嚇到個腦空白一片！
 
Miss 被我突擊後，隔咗一陣先識反應，想除低個眼鏡扮返學校時嘅專業樣，但佢又醒起自己近視好深，一除眼鏡就要矇起眼，到時一定更傻更唔專業。於是Miss只好坐返好，挺直個人，望落去端莊啲，就嚴肅咁講：「謝子匡，Miss Wong嘅電話唔係咁樣被你用架喎！」
 
當Miss以為自己有返啲優勢時，家姐就用氣聲講：「盈盈⋯⋯」然後做咗整理衣服嘅動作。




 
Miss一怔，醒起自己跌咗膊，拿拿聲整返好。但個樣已經老尷到不得了，面都紅晒⋯⋯啊～～好可愛呀！
 
「Miss Wong ! 上次家長日你屈阿偉教我戴condom之後，我老豆到今日都仲誤會我搞基呀！我好慘呀！嗱⋯⋯你睇下⋯⋯」我舉起杯酒，話：「老豆迫我學飲酒呀！佢話驚我被人灌醉咗時被人搞後門喎！嗝～～～～～～！」打完個長嗝，我叫家姐幫我斟酒。
 
一見我飲咗酒，Miss眼神厲起上嚟，佢應該老師mode on咗，鬧鬼我：「謝子匡⋯⋯你咁大膽⋯⋯未成年就飲酒？」
 
「雕你老味！」老豆發功啦！佢連珠炮發咁講：「黃老師呀！我阿哥同細佬生嘅都係女！我地謝家真係得佢一粒仔咋！佢搞基，我地謝家絕後架啦！」
 
「衰佬呀！唔好咁失禮啦！」阿媽望返去電話度同Miss講：「黃老師，對唔住，失禮晒！啊⋯⋯哈哈⋯⋯你食咗飯未呀？」




 
「嗱！Miss Wong，你話點算啦。」我個樣好無辜，但好開心飲緊酒。
 
Miss Wong我飲酒後就好惡咁啤我一眼，無聲咁講：「你仲飲？！」深吸一口氣，再講：「咁你想我點呀？」
 
「話畀我阿爸阿媽知！我唔係基囉！」我笑到好似狐狸咁。
 
Miss Wong保持專業形象，微笑同老豆阿媽講：「子匡爸爸，子匡媽媽，放心啦，你地個仔唔係基嘅。」講完，Miss向我望嚟，啤到好惡，似講緊「咁你滿意未呀？」
 
滿意？梗係未啦？不過唔使我出手，我老豆已經自己嚟料。




 
「唔係基？你點閪證明個閪仔唔係基呀？」
 
我扮無奈咁對Miss攤手，兩眼望住佢，心諗：「你知我想點架可？」
 
Miss瞪大對眼啤實我，然後立即變面，好得體地同老豆阿媽講：「阿匡⋯⋯真係拍緊拖嘅。你地放心啦，佢女朋友真係女仔呢架！」
 
我望去老豆嗰邊講：「係呀！仲大過我架！」
 
Miss一聽就知我踩緊鋼線，佢好想叫我全名喝停我，但佢一出聲肯定會令老豆阿媽起疑！
 
我望返佢，打趣咁講：「仲大過我好多架⋯⋯阿婆嚟嘅！」
 
「你⋯⋯？！」Miss瞪到隻眼要跌出嚟！
 




我呢招除咗係花式自殺外，亦想令Miss作出兩難選擇——「怕穿煲默認自己係阿婆 vs 抵唔住頸嬲得滯自爆」！
 
不過Miss Wong 始終係 Miss Wong，佢深呼吸一下，就冷靜返話：「 睇嚟阿匡你真係仲唔識收下把口喎。係咪要家長上嚟學校傾？」
 
想分散注意力？正當我想出招時，點估到發緊酒癲嘅人真係唔按章出牌——
 
「咦！黃老師！」
 
嗰個亂出牌嘅人，係我老豆！
 
「你做咩著咗我個閪仔件衫架？」
 
「啊⋯⋯⋯」家姐驚到輕聲嗌出聲。
 
醉咗嘅阿媽視力麻麻，行近部手機睇真啲。




 
我忍唔住就「噗哧！」一聲笑咗出嚟！
 
Miss嚇到唔識比反應！
 
「咦？Miss Wong 幾時老笠咗我件衫嚟著架？」我扮傻詐驚。
 
而家Miss又驚又想鬧我但又唔敢出聲咁，最慘係由我打畀佢一刻係絕對唔可以收線！一收線就穿煲！所以佢一係繼續同我玩膠，含糊過去。一係就——
 
 
.
 
大大方方同我家人承認佢就係我女朋友！