我嘅職業係專溝人地個女朋友: 4.11

 
---回到現實---
 
對於要點認識Maggie，我本身其實無咩頭緒。好彩Louis話Maggie基本上每星期有兩日都會有恆常節目，就係一日去學瑜珈，一日去學烹飪。
 
為左可以了解佢多少少，我就問Louis拎左Maggie個地址諗住偷偷地跟蹤下佢。因為從我上次見到嘅野，我覺得事情並唔係完全係Louis所講咁，Maggie應該有d秘密係Louis唔知道。
 
然後跟跟下我就見到佢走左入間酒吧而唔係去Louis所講嘅烹飪班。對此我其實並唔算太意外，然後就跟住佢入左去，再揀左個望到佢嘅角落位置坐低左。
 
佢只係自己坐左係張bar枱前面叫左杯cocktail，然後就不斷係度碌手機。憑我嘅經驗，衣d如果唔係約左人等緊佢出現，就係等緊運睇下今晚有無人會走過黎撩自己傾偈。




 
果然兩三個字後就見有條西裝男行近同佢打左聲招呼然後就坐低左。之後佢地開始傾偈，飲多幾啖酒後就有意無意間開始有d身體接觸，繼而越黎越親密。
 
大概過左一個鐘佢地就離開左間bar，然後去左酒店。
 
正如Louis個朋友之前都有講過，上網間中都有聽過下d故仔講，個男仔話佢女朋友唔肯比自己掂話想要結婚後先或者大家一齊耐d先，但之後就發現事實原來對方只係唔比自己一個掂，早就唔知比幾多個其他男人掂過。
 
衣家衣個故事似乎就發生喺我個客人Louis身上。
 
不過通常衣d故事都係個女仔本身自己貪玩蒲開，但就想係個男仔身上搵著數而唔係真係鍾意佢先會發生。但根據我果日所見，我又唔覺得Maggie對Louis係無感情，Louis自己亦講過Maggie對佢其實幾好，咁成件事似乎又有d奇怪。




 
不過點都好，佢都係背住男朋友出左軌，如果之前覺得Louis係可恨，咁衣家心理上又係咪偏向覺得Louis先係受害者，好似都情有可原?
 
喺未查清事實之前，我唔打算將衣件事講比Louis聽。但要查清背後係咪有咩隱藏秘密，最直接嘅方法可能係要我犧性自己色相。
 
所以行動前，我要再搵Louis確定一d資訊。
 
「有少少問題想問下你。」我打左個電話比Louis。
 
「請問。」




 
「你覺得Maggie對你係點?」我問。
 
「其實撇除唔比我掂衣樣野，真心講佢對我係幾好...」
 
「即係你唔會覺得佢有任何搵你笨或者拎著數嘅成份?」我續問。
 
「唔會呀，平時我地拍拖佢成日都好堅持要AA制出返份，送比我d生日禮物一係就貴野一係就係d超有心思嘅野，又唔會要求我比d咩佢。」Louis答。
 
「咁如果，我指如果啫，佢衣家肯比你掂肯同你上床，你會唔會改變主意?」我再問。
 
「... 我估已經太遲喇... 衣家再揀返同佢一齊，我好可能會揹住一世嘅內疚同不安，因為我曾經背叛過佢，又break左我地嘅promise。咁倒不如喺佢唔知情嘅情況下，無痛咁分手將對佢嘅傷害減到最低仲好啦...
 
所以希望你真係可以令佢變心，唔好再鍾意我...」Louis諗左陣後講。
 




「ok，咁我明白喇...」
 
雖然Louis係喺唔知真相嘅情況下講衣堆說話，但知佢去意已決加上最後一句都表示緊佢已經唔點再鍾意Maggie，所以我亦決定唔再care道德上嘅問題而專心向我地要嘅結果進發。
 
 
不過我發現Maggie並唔係次次上堂都變左偷偷地去搵男人，之後幾次跟蹤佢佢都係如實咁去上瑜伽堂同埋烹飪班，我估佢都明只有真真假假夾雜先唔易比Louis發現。
 
所以到我有機會真正咁接近佢，都要等到我第四次跟蹤佢先見佢再一次選擇去酒吧而唔係上堂。
 
今次我亦唔再係瑟縮一角觀察佢嘅痴漢，而係主動撩佢嘅型男。
 
「小姐，可唔可以請你飲杯酒?」我好似一個紳士咁向佢發出左邀請。
 
「好呀~」而佢則向我報以甜甜一笑答道。