我嘅職業係專溝人地個女朋友: 4.20

「…. 你其實係咪一早知所以上次先問我果堆問題?」Louis冷靜左陣後問。
 
「當時我仲係懷疑，不過衣家已經証實左係真，只係佢咁做都真係有佢嘅原因。」我無隱暪。
 
「我真係諗唔到除左佢淫同賤外仲可以有咩原因?」Louis冷笑問道。
 
「其實你有幾了解佢嘅過去? 知唔知佢以前經歷過d咩? 」我反問。
 
「佢無點講過，淨係話拍過兩次拖但好快就散左… 」Louis答。
 




「咁你知知點解咁快散? 不過你唔知其實都唔可以怪你，因為佢係專登唔想同你講…」
 
於是我就將Maggie嘅故事同苦衷講左比Louis聽。
 
「所以… 你覺得佢值得被原諒?」聽完後Louis沉默左段時間，然後稍為冷靜咁問。
 
「原唔原諒決定權係你度，我只係想比你知佢曾經受過嘅傷害同背後嘅諗法。至少唔係你一開始所諗咁專登玩你…」我解釋。
 
「我明白，不過我都係接受唔到…  我接受到佢點解唔肯同我上床，但接受唔到佢一方面呃我要留返第一次比未來老公，但原來同時間自己為左解決需要就不斷咁搵第二個…」隔左陣Louis講道。
 




「咁我明好多人都唔會接受到，不過你都可以諗下你同Cindy第一次後其實你自己都忍唔住同佢有第二三四次，到衣家你仲直頭沉左鍾意左佢要為佢放棄Maggie添。
 
有d野如果淨係從道德上講係點講都一定唔岩，只係衣個世界上其實可以完全抵抗到誘惑唔做錯事嘅聖人又有幾多個?」我盡最後努力勸解Louis。
 
「如果佢一開始可以坦白，咁可能一切都唔同呢…」Louis有點無奈咁講。
 
「或者就係因為佢太重視你驚失去你，所以佢驚唔敢同你坦白，結果反而造成左今日嘅局面。世界本身就係充滿住矛盾同諷刺…」面對衣個世界古怪嘅運行法則，我都只可以表示無奈。
 
「我… 會嘗試心平氣和咁同佢講分手…」似乎Louis已經完全冷靜左落黎。
 




「咁你會唔會同佢坦白你做過嘅野?」我問。
 
「會，我要佢後悔…」Louis堅定有力咁講。
 
「你果然都只係口硬心軟…」但我就稍為釋懷咁講。
 
「雖然你最後未完成到工作，不過我會照比一半酬勞你。」知被我睇穿，Louis 無再講d咩轉開左話題，不過我幻想到電話另一邊嘅佢應該正係度苦笑緊。
 
「咁好?」
 
「始終唔係因為你，我未必會知埋故事嘅另一半然後好似衣家咁冷靜。」Louis解釋。
 
「咁我就卻之不恭喇…」我無謝絕佢嘅好意。
 
之所以話Louis口硬心軟，係因為如果Louis淨係同Maggie講知道左佢一直都呃自己仲成日去ONS所以要分手，咁Maggie一定會陷入極度內疚同後悔之中。




 
但如果Louis講埋自己都出左軌，係因為係有左第二個所以要同Maggie分手，咁Maggie雖然都一樣會自責同後悔，但同時間佢心理上會相對上易平衡一d。
 
一來因為原來Louis自己都受唔住誘惑出軌唔係得自己一個做錯左，咁Maggie相對上會無咁內疚同懊悔。
 
二來就係知對方出軌或多少自己都會嬲或者生Louis氣，從而分薄左自己嘅內疚值同傷心值。
 
三來係佢希望可以透過咁話去比Maggie知佢衣個做法並唔正確，如果佢繼續咁諗咁做，好可能之後遇上第二個都會繼續重蹈今次嘅覆轍。
 
因為已經鐵定自己唔會繼續同Maggie一齊，所以Louis寧願Maggie嬲佢憎佢但可以放低佢，都好過成世活係懊悔同內疚之中。佢亦希望可以透過咁去改變令佢唔會再因為以前嘅經歷而諗得太過偏激。
 
事情發展到衣步已經唔係我可以控制同改變到d咩。不過如果我無估錯，Maggie應該好快就會主動搵我。
 
果然，第二晚佢send左個message比我，只係得個酒店地址同房號。