我嘅職業係專溝人地個女朋友: 6.10

作為一個知道所有真相嘅旁觀者，坦白講佢地d戲同對話其實都幾多破綻同唔合情理嘅地方。只要再諗一次佢地頭先嘅對話，就會發覺佢地d對答有時其實都幾唔自然同唔合正常情理，因為佢地只係側重左係自己想知道或者想表達比對方知道嘅地方。
 
不過對於當時佢地兩個只係專注做緊戲嘅人黎講又邊會仲有心情去留意衣d細微地方呀… 當自己要專注造假果陣，亦好難留意到對方係真定係假，更何況兩個人當時嘅心境根本就完全唔平靜。
 
Queenie因為唔知我係Wayne請返黎，所以佢好努力咁令Wayne相信自己真係移情別戀鍾意左第二個，同埋令Wanye覺得我係一個好對象佢地之後會好幸福快樂，咁Wayne就可以了無牽掛放心咁離開衣個世界。
 
至於Wayne因為唔知我其實並無成功奪得Queenie芳心而只係佢搵我幫手扮佢男朋友去呃自己，所以佢係真心希望Queenie變心鍾意左我好分薄Queenie對佢嘅感情。只係為左乎合正常人嘅反應，佢唔可以顯露衣點出黎而只可以扮成好傷心同失望。
 
不過關於衣點，其實我相信唔駛點扮佢本身都實會有難受嘅感覺。始終自己愛嘅人真係移情別戀左，就算係自己蓄意而為，但只要仲係鍾意對方，又點可能會無感受?
 




只係最後佢為左想減低Queenie嘅內疚感講自己其實都一樣淡左所以唔會太難受，同埋因為擔心之後到我離開Queenie果陣如果Queenie真係鍾意得我太深會傷心所以專登提佢唔好沉得咁快，其實都令件事變得odd上加odd。
 
不過見住佢地為左對方感受想對方以後開心而違背自己個心係咁交戲又做咁多野，坦白講我個心都真係既痛又感動…
 
特別係當見到Queenie心入面明明好痛好傷心，但係喺Wayne面前又要扮無事扮同我一齊好開心好幸福去安對方心；
 
見到阿Wayne聽到Queenie同佢講鍾意左我要同佢分手果陣，明明內心一定都會好難受好唔捨得，但我又真係感受到果陣佢發自內心果種如釋重負，放下重擔，好似交待好身後事嘅果種釋懷，
 
我就好確確實實咁感受到佢地之間對大家嘅愛到底係有幾深。
 




原來愛真係可以令一個人著緊對方遠遠超出於著緊自己咁多…
 
 
--------------
 
「估唔到你最後真係做得到，真係好犀利...」同Queenie做完戲後第二日Wayne再約左我出黎見面。
 
「咁我收得你錢就要完成任務啦。」我帶有少少心虛同唔好意思咁講。
 
「咁我就安心晒喇... 嗱，衣度係你嘅酬勞。」佢講完比左張支票我。




 
「唔岩數喎，多左成倍...」我見到個數字後個心更加唔安樂。
 
「收左佢啦，我真係好感激你...咁我就唔駛再擔心之後個傻女會傷心同做傻事。不過你之後離開佢果陣都要顧及佢感受呀...」Wayne後面又有d唔放心咁講。
 
同善柔一樣，一個咁好嘅人點解要咁短命? 老天爺到底係以咩心態去管理衣個世界? 我心入面不禁大大力咁鬧左個天一句。
 
 不過其實衣幾年我都唔知已經鬧左佢幾多句，或者好快我都會受到天讉架喇…
 
 
只係Wayne嘅說話再次提醒左我，雖然我幫Queenie呃左佢，但其實嚴格黎講我並無完成到Wayne嘅任務，Queenie仍然係深愛住佢。咁到到果一日來臨，Queenie會唔會仍然大受打擊然後走去做傻事？
 
如果係咁，我真係好對唔住阿Wayne亦愧收佢衣筆錢...
 
所以衣個任務並未真係完結，如果之後Queenie發生左咩事，Wayne肯定做鬼都唔會放過我…