我嘅職業係專溝人地個女朋友: 6.16

果晚因為開始擔心佢而坐立不安嘅我send左好多msg比善柔佢都無回應，直至第二朝起身我先收到佢一個回覆
 
「對唔住，我怪錯左你…」
 
「唔緊要! 以後帶眼識人同信我就可以了。」我秒覆返佢。
 
但雙剔一直都維持係灰色狀態，之後我亦再無收過佢任何回覆。
 
 
到到晏晝，我突然收到善潼嘅電話。




 
「立仁哥哥… 你係邊呀…」電話另一邊係情緒接近崩潰嘅善潼邊喊邊問我。
 
「我喺學校呀，潼潼你做咩喊得咁犀利呀?」果刻我心入面有強烈嘅不安。
 
「家家…家家佢….」善潼繼續邊喊邊講，但就講極都講唔出最重要嘅信息。
 
「家家? 你家家佢做咩呀?」我萬分焦急同擔心咁問。
 
「家家佢自殺死左…嗚….」好唔容易善潼終於稍為收一收喊聲然後一口氣講出衣個殘酷嘅消息。




 
 
果刻嘅我唔敢相信自己聽左d咩，大腦好似完全停止左運作咁。
 
善柔自殺死左? 明明琴日佢都仲好地地…
 
果個聰明睿智，成日滿口道理又滿臉笑容嘅善柔竟然會自殺?
 
我真係唔可以將”善柔”同”自殺”兩個字聯埋喺一齊…
 




然後我先明白自己做錯左一件咩事…
 
我低估左善柔對黎浩明嘅感情，低估左情傷嘅威力。
 
如果我無追查黎浩明出軌
如果我唔係要急住要同善柔講証明比佢睇
如果我無帶佢親自去捉姦
如果我注意到佢琴日知道左事實後嘅情緒
如果我琴晚無走到堅持要陪佢
 
又或者如果我早d可以知道自己嘅心意
比多d勇氣自己同善柔表白唔比機會佢同黎浩明一齊
 
結果就唔會攪成咁
 




係我害死左善柔
只但係，後悔已經太遲…
 
果種錐心之痛
好似一下子將我個心臟擊至粉碎
 
雖然我唔可以叫失戀，但突然間我好似都明白失戀係咩感覺
原來人個心真係可以穿左個窿
原來真係好痛好痛…
 
點解…我唔可以早d明白衣種感覺?
如果可以早d明白，我就唔會低估左種傷害，忽略左善柔嘅感受…
 
 
---回到現實---




 
「你係因為咁所以之後做衣份職業？」聽完我嘅自白後Queenie問。

「係，好聽d係因為我唔希望再有人會為情自殺，但事實係我希望透過咁自己可以得到救贖…」原來我嘅淚水已經不自覺咁緩緩流下。
 
「其實… 你都唔好太自責啦，真係無人會諗過結果最後會係咁… 」Queenie嘗試安慰我。
 
「好多人都咁講，但我接受唔到… 明明我應該係最了解善柔果個，我應該要意識到件事會發展成咁，如果唔係就代表我唔夠了解佢。作為佢最親嘅青梅竹馬，我真係接受唔到…」我不斷搖頭否定。
 
「但你做衣個職業應該都唔易喎… 始終男人同女人唔同，好多時要令女人變心都可以好難，而聽落你以前都唔會點了解女仔諗咩…」Queenie無再糾纏而係轉移問題。
 
「衣個世界有d野或者真係整定… 其實善柔死左後，我發覺自己個心少左d野嘅同時，又好似多左d唔屬於自己嘅野…」我終於拎起隻手抺一抺臉上嘅淚水講。
 
「多左d咩?」Queenie好奇問道。
 




「一種能力…」