我嘅職業係專溝人地個女朋友: 8.16

「本身係嘅，但最弊因為有返聯絡突然間好似可以有返寄託，Winnie開始搵Jason搵得越黎越密。而Jason又可能因為一直覺得愧疚所以亦唔忍心拒絕Winnie，不時會嘗開解安慰下佢，希望佢可以早日搵到另一半等自己唔駛再咁內疚，結果反而令Winnie越黎越沉同依賴Jason，甚至get左d 錯嘅signal，最後仲問Jason可唔可以暗地裏同返佢一齊，就算佢只係做小三都唔介意。
 
去到衣度Jason知唔可以再咁落去，佢醒悟到Winnie如果繼續一直等緊一個好似你咁嘅人出現又或者自己繼續同佢咁做朋友咁其實反而會耽誤左佢自己嘅幸福同選擇。
 
所以有晚佢終於將真相講左比Winnie聽，就係你其實都係一個假人，一個佢用錢請返黎嘅假人。而佢對Winnie一開始亦已經係不安好心只係當佢係幫自己升level嘅NPC。
 
佢希望咁可以令Winnie對佢同幻想中嘅你都徹底死心，同時佢亦應該要借鏡自己升lv溝仔衣個道理，唔好咁有要求。
 
或者Jason嘅出發點係為Winnie好，但佢就低估左衣個真相對Winnie嘅殘忍程度有幾高...
 




知道真相後Winnie大受打擊，佢發現原來自己一直信任同期待嘅全部野都係假，Jason對自己係假，你對佢都係假，衣個世界由頭到尾根本就無人會真係鍾意自己欣賞自己。而可笑嘅係佢竟然一直好傻好天真咁相信衣d假嘅野仲繼續一直咁等待，希望衣d以為唔係奇蹟嘅奇蹟有日會再次出現。結果一直支撐住佢嘅信念同希望一瞬間全部倒塌… 」善潼繼續講。
 
「佢...無事嘛?」
 
知道Winnie一直以黎成長嘅心路歷程，我知衣個真相對佢打擊有幾大，因為佢好不容易得到左一直渴望左20年嘅野，以為終於有人會唔介意自己外表識欣賞自己，點知原來全部通通都係假，全部都係呃佢，衣個世界一直以黎原來都無人會真心鍾意佢...
 
「之後佢患上左抑鬱症衣家睇緊精神科要靠藥物控制病情... 佢衣家重新封閉自己，斷絕同所有男性嘅往來，成為左一個憤世嫉俗極度憎恨男性嘅宅女。」善潼帶點憂鬱咁講。
 
聽到衣度我真係無諗過最後結果會係咁出唔到聲。
 




「如果當日無你嘅出現，雖然Jason同佢分手佢都會傷心，但唔知真相下我估佢嘅打擊應該會無咁大，信念唔會完全崩潰，亦唔會盲目咁追求要好似你果陣咁欣賞佢嘅人出現，咁之後佢可能都仲會遇到第二個男朋友。
 
但衣家… 我估佢唔想全天下男人死晒都偷笑喇，仲要佢可以再相信男人應該好難… 」見我無出聲，無耐善潼又講。
 
「至於Tracy，當日你突然消失後佢亦係好唔開心，然後過左排佢就開始後悔想搵返阿輝。初初阿輝都信守佢應承過你嘅野，無同返Tracy一齊。但大半年後當佢同佢新女朋友分左手後，因為無聊，佢就接受返Tracy同佢復合左。
 
事實上因為當年分手得太容易，阿輝既無傷心又無後悔，對Tracy其實都係”有個人陪下都好”嘅心態咁同返Tracy一齊，甚至只係當佢係一個床伴同玩物，對佢根本唔疼錫亦唔認真。
 
但調返轉因為Tracy一直覺得自己之前對唔住阿輝，所以佢特別珍惜衣次復合嘅機會，對阿輝千依百順，甚至之後佢發現阿輝偷偷地出面有第二個，佢都覺得自己無資格嬲係自己應得嘅報應然後繼續啞忍，希望有日可以感動到個阿輝回頭專一對自己，但結果就只係更加縱容阿輝嘅行為。
 




聽聞阿輝對衣個比自己出軌嘅女朋友十分滿意，仲好似計劃緊同Tracy結婚咁佢就可以玩足一世。但你諗下如果Tracy真係答應，等緊佢嘅其實就只係悲慘嘅下半生…」