我嘅職業係專溝人地個女朋友: 8.19

因為同善潼嘅事太煩心，所以我決定搵兩個知我底世嘅老死出黎飲酒。
 
一個係當年因為失戀而曾經被我訓斥過嘅郭非凡。事實上經過果次傷心嘅經歷佢好返後就變左做個player，咁多年都唔知玩弄過幾多女人嘅感情同過幾多女人發生關係。
 
另一個就係被譽為完美男人嘅軒爺。佢同郭非凡可以話係完全相反，雖然軒爺有著完美嘅外表同內籠，但佢對感情卻係絕對認真唔會玩玩下。咁耐以黎佢都只係拍過一次拖，散左後就一直單身到衣家。
 
或者因為佢要求太高，所以都無咩女仔睇得上眼。而無對象嘅佢寧願唔要都唔會選擇濫情。
 
當年善柔出事後，我都過過一段意志消沉嘅日子。有次軒爺陪我同我飲緊酒果陣咁岩郭非凡又搵我擔心我，所以我就索性叫埋佢黎一齊飲，亦因而令兩人認識。
 




本身一個中學同學同一個大學同學二人應該大纜都扯唔埋，不過因為果段時間我地經常一齊飲酒就令佢地兩個都熟左然後成為左好朋友。有一次我地更加飲到三個人都醉左訓左係條街嘅後巷，到朝早有途人見到仲差d報警添。
 
不過衣次後，我地三個就好似真係成為左老死咁。雖然佢地兩個性格同價值觀差異都幾大，互相不滿又成日嘈交，但大家心底入面都係friend底。
 
軒爺覺得非凡做player對感情唔認情玩弄其他人好唔岩，但非凡又覺得軒爺好煩而且太理想化，浪費晒自己嘅天賦同本錢。佢曾經講過如果自己有軒爺嘅外表，一定會食盡天下嘅女人先對得住自己。當然衣家嘅佢外表其實都完全唔差，唔係都唔會做到player成日食女。
 
而衣兩個老死聽完我講我同善潼嘅事後，一個就用超理性角度，一個就用超感性嘅角度去同我分析。