我嘅職業係專溝人地個女朋友: 9.15

「攪掂晒喇?」善潼見我喺房度走出黎後就好開心咁問。
 
「嗯，今日工作完成喇...」始終岩岩講完善柔嘅故事，我心情都仲係有d傷感。
 
「頭先個case好難攪?」善潼亦察覺到我情緒嘅低落。
 
「幾啦，有d問題都係要靠佢地自己先解決到…」我無提起善柔嘅事以免影響埋善潼情緒。
 
不過講開善潼，都難為佢幫佢家姐保守左衣個秘密咁多年。
 




佢無同父母講，係因為擔心佢地會大受打擊同內疚，想善柔可以喺父母心目中保持完美嘅形象。
 
佢無同我講，除左因為同樣嘅原因，佢話同時佢亦擔心如果當時嘅我知道左善柔最後有因為當日嘅決擇而後悔，我會更加傷心更放唔低佢。
 
至於點解衣家可以比我知，係因為時間都始終過左咁耐，而且都希望我係喺知道事實嘅全部下作決定同佢一齊，唔係驚我將來會後悔。
 
當然，既然已經決定接受善潼，雖然吃驚但我都無因為咁而改變自己心意。
 
 
「盡左力就得啦，結局始終唔到我地控制… 放工就唔好再諗喇，快d同我去食野啦， 之後我地仲要去媽咪到接返柔柔呀~」善潼見我好似有d唔開心就想安慰我道。




 
「放心啦，做左咁耐，仲唔睇化咩…  不過黎緊真係要開始接少d case先得，衣家日日都咁忙，好彩有你幫手咋，唔係得我一個實攪唔掂… 同埋可以嘅我都想比返多d時間柔柔，我突然間好掛住佢呀...」諗起柔柔我心情都好返d塊面有返笑容。
 
「咁忙d代表幫到更多人都好嘅… 不過接少d case都好，你個能力最唔好就係要食煙先用到，日日咁食法好傷身體架嘛! 又攪到自己成身煙味…」善潼聞到我身上陣煙味就抱怨。
 
「無法啦… 或者我以後著返件雨褸擋擋陣味等入面d衫少d味?」可以嘅其實我都唔想食煙。
 
「都好~ 同埋…黎緊你可能真係要接少d case 陪我多d喇…」善潼突然語氣一輚有少少怕醜咁講。
 
「點解咁講?」我好奇問。




 
「因為…黎緊可能好快又有另一個小壞人要你照顧喇~」善潼摸住自己個肚然後一臉幸福咁笑住講。
 
 
當日善潼去完旅行返黎後，我地好快就一齊左。而因為壓抑多年嘅感情同心結終於解開，我地情到濃時好快好自然咁就滾上左床單發生左關係。而唔知係好彩定唔好彩，我竟然都部左郭非凡後塵，只係一次後就唔小心攪大左善潼個肚…
 
不過經歷左咁多，大家其實都已經一早認定左對方，所以經過短暫嘅震驚，好快我地都欣然接受左衣個事實然後就排期結婚。
 
當然係順利結婚前，我都用左唔少時間跪左唔知幾多玻璃去平息知道自己個女比人攪大左個肚後怒火中燒嘅鄺生嘅怨氣...
 
 
就係咁，我同善潼之後順利結婚然後生左個女，取名李思柔。
 
就係咁，我嘅職業由專溝人地個女朋友變成左專幫人留住佢個女朋友。







-全故事完-