我嘅職業係專溝人地個女朋友: 11.20

「你講到佢咁重要，你有無理過佢嘅感受呀! 唔係你，佢唔會自殺架!」我將李立仁連人帶衫咁成個扚起質問返佢。
 
李立仁擰側左面唔敢面對我，然後我就一拳回敬返落佢塊面度。
 
「都係因為你呀! 青梅竹馬? 你配咩? 你都係想拆散我地先咁做啫! 你唔好以為我唔知根本你就一直都鍾意佢，一直都妒忌我地，千方百計想拆散我地! 係你嘅自私害死佢架! 仆街! 」
 
衣一拳一下就將佢打到訓左落地下，然後佢就就咁擹左喺地下，完全唔還口還手淨係望住側邊無左反應咁。
 
從李立仁嘅表情加上無還手，我知佢自己都陷入左深深嘅自責之中，我亦意識到其實佢嘅傷心同內疚唔會比我少。 如果我喺火源，咁佢就係引爆善柔嘅導火線。
 




不過衣刻嘅我實在太需要一個渲泄口，所以雖然心入面明明知道主謀點都係自己，但我都仍然係控制唔到自己將自盤嘅怒氣同負面情緒發泄晒喺佢身上。
 
我知咁其實都係如佢所願，大概佢都覺得自己應該要受到懲罰，所以希望透過被傷害去減低自己嘅內疚感...
 
結果衣日我地兩個都比人打到口腫面腫，然後我就再無見過李立仁。.
 
而冷靜過後，我亦當然無再嬲佢恨佢而只係恨我自己...
 
如果唔係自己做錯，任李立仁點煽風點火善柔對自己都唔會動搖，因為佢一直都係無條件咁信任自己。
 




 
諗返起表白果陣善柔問我有無信心大家可以一生一世果陣自己嘅答案
 
「坦白講我唔敢講我地係咪真係可以一生一世永遠唔會分開，因為我自問自己咁普通根本就高攀唔起你，所以雖然我深信自己對你係永遠都唔會變，但我就無信心自己可以留住你吸引到你令你一直都鍾意我… 」
 
 
估唔到一直以為係自己高攀唔起對方，變心嘅都只會係對方而唔會係自己。
 
但最後除左係自己出軌外，原來對方仲係咁愛自己甚至會因為自己背叛而選擇輕生... 你話何其諷刺?
 




 
當時嘅我真係好幼稚，但就好幸福...
 
曾經嘅我係咁幸福，有個咁美好嘅女朋友...
 
明明得到左自己由中學開始就已經憧憬已久嘅人，得到左自己夢寐以求嘅幸福
 
但我就親手將佢催毀，仲要害對方失去左寶貴嘅生命…
 
善柔，一個咁完美璀璨嘅存在，但就比自己催毀害死左...
 
我點對得住衣個世界?
 
 
每一日，內疚、懊悔、自責，都不斷咁蠶食我嘅心靈。




 
因為我當日愚蠢嘅行為，我犯左個無可挽救嘅錯誤，從此”幸福”兩個字亦再同我無緣。
 
之後我陷入左極度頹廢嘅生活，日日行屍走肉，生活無晒希望同目標。
 
Kelly都有嘗試搵我，但我就再無理過佢，或者衣樣係我覺得我仲唯一可以為善柔而做嘅事...
 
 
直至有日，我喺街漫無目的咁拎住支酒飲果陣，竟然見到一個好熟悉嘅女仔迎面擦身而過。
 
「善...柔?」