我無啦啦同隻芝娃娃交換咗身體，跟住無啦啦又遇上喪屍大爆發: （2）

當天旋地轉嘅感覺消失，我回過神後，發現眼前嘅嘢唔同咗。

第一視力變得模糊，感覺好似多咗層保鮮紙擋住咁。

第二視野突然好貼近地面。

第三係我望到前面有一隻受傷嘅腳腕，而隻腳所著緊嘅鞋好熟口面。

之後我越望越上，唔單止係對鞋，就連條褲同件衫都好熟口面，最後望埋個人個樣，我竟然…...





我竟然見到「自己」…

雖然對眼矇咗，但我好肯定無睇錯！

無論衣著上、外貌上，就連手上拎住盒嗰figure，都同我嘅一模一樣！

唔係！唔係一模一樣，呢個根本就係我嚟！

驚訝之際，我耷低頭再望一望自己雙手…





仆街！點解會咁架？我兩隻手點解會變咗狗爪？

雙手雙腳仲要一齊掂住地下，好似狗咁用緊四肢行路？

我感覺到…喺我身上...有啲唔好嘅事發生咗…

「BB你無嘢呀嘛？有無嚇親呀？」

芝娃娃嘅主人，亦即係嗰位師奶，突然行埋嚟從後抱起我。





我嚇咗一跳：「八婆你唔好掂我！」

「BB你竟然識得講嘢？」

「我叫你快啲放開我呀！」我扭身扭勢，極力嘗試掙脫。

「Oh my God！原來我真係無聽錯！BB你幾學識講嘢架！」

個師奶一手抱住我，另一隻手就拎咗部電話出嚟自拍：「BB你再講多句嘢呀，等我影低send俾啲friend睇。」

「屌你老母！」

我衝口而出講咗句粗口，同時間望到部電話嘅自拍畫面，我當堂呆撚咗？！

鏡頭影到隻芝娃娃不但識得講嘢，兼且仲同我講緊同一句說話：屌你老母。





會出現咁既情況，睇怕只得一種可能性…

「汪汪！汪汪汪！」

而面前真正嘅「自己」，忽然雙膝跪地，兩手撐住地下，向住我同個師奶發出狗吠聲。

「撞鬼你咩，好人好姐喺度扮狗叫！」

個師奶仲未知發生咩事，但我諗我已經搞清楚呢刻嘅狀況。

無估錯嘅話，呢刻嘅我同隻芝娃娃交換咗身體！

即係我嘅靈魂上咗隻狗嘅身，而隻狗嘅靈魂就上咗我嘅身！





我對住自拍鏡頭再講一次：「屌你老母！」

睇見隻芝娃娃激動爆粗嘅畫面，我好肯定自己無眼花！

我真係變咗一隻芝娃娃！