「細佬咪郁!」

粉衫大隻佬伸手捉住老鼠條尾,一嘢將佢從我個口扯出嚟。

隨即佢再黎手一掉,成隻老鼠撼咗埋墻,最後跌落地下無咗反應,唔知係暈咗定瓜咗。

而我個口同牙嚹殘留咗一啲血跡,於是拿拿臨衝入廚房用水𠺘口。

點知水龍喉無水出,唯有出返去拆開排汽水,用雪碧、可樂嚟沖走嗰浸血腥味同老鼠身上嘅臭味。





「你又會咁黑仔,咁大隻老鼠跌落個口度都有嘅。」粉衫大隻佬對我講。

「係囉,又會咁都有嘅,呵呵。」我詐詐諦笑一笑。

下一秒,對方面色一沉,好認真咁問我:「嗯?細佬你把聲做乜怪怪地咁嘅?」

「Er…可能…咳咳…可能頭先嗌得太多…嗌到把聲沙咗…」我盡量壓低把聲講。

「哦~原來係咁~咁你個傷口仲痛唔痛?」





「仲有少少,不過感覺好返好多。」

我把口係咁講,但其實感覺點只好返好多,直頭係爽到爆添啦!

除咗手臂個傷口有啲痛之外,我徹底咁感受到全身力量澎湃。

二頭肌、三頭肌、腹肌、背肌、胸肌,總之每一舊肌肉都結實有力,摸落去硬掘掘,手感超正。

我覺得依家呢副偈完全唔輸蝕俾「美國隊長」,假如女神見我變到咁大隻,話唔定會向我投懷送抱。





「細佬,你發姣呀?做乜喺度自摸?」

「唔係呀...係個身有啲痕...𢯎痕啫...𢯎痕啫」

為免令粉衫大隻佬生疑,我諗我都係盡量少啲出聲、少做啲無謂嘢。

「咁好啦!係時候就做返我地頭先未做完嘅嘢!Hehehehehe!」

粉衫大隻佬笑淫淫咁行去「的」起嗰一男一女。

佢一手推個大波妹到我面前,而自己就捉個恤衫男埋一角。

「你個死基佬放我呀!」恤衫男破口大罵。

粉衫大隻佬一掌啪落個屎忽度話:「你話我基佬,咁我就『基』俾你睇!Hehehehe!」