我無啦啦同隻芝娃娃交換咗身體，跟住無啦啦又遇上喪屍大爆發: （31）

然而走咗出嚟出面都唔代表安全，因為外面仲多喪屍。

佢地聞到我地人類身上嗰陣香味，好快就發現咗我地。

「Raughhh！！！」

三、四十隻喪屍向住我地衝埋嚟。

除咗逃跑之外，我地都別無選擇。





變成紋身佬嘅大波妹跑得最快，其次係恤衫男，而跑得最慢嗰個係我。

我頂佢個肺！心口對波好鬼死重，感覺好似孭住兩個水袋喺度跑咁。

平時喺街見到啲大波妹行路「鄧下鄧下」，覺得好養眼，輪到自己變成大波妹，就覺得對波好q阻埞。

我「he he her her」跑到索曬氣，轉個彎連嗰兩個條友都唔見埋，得返自己一個。

假如又俾喪屍咬到，咁我必定會再次同喪屍交換身體。





問題係我唔想再變喪屍，因此無論幾攰幾辛苦都好，我都唔可以停低，只能繼續跑。

結果跑到嚟一個路口，前面出現一班喪屍攔路，後面嗰班喪屍又就嚟追上。

喺我周圍無地方好匿，身後就得一架小巴。

家陣我上圍咁突出，根本就攝唔到個人入車底。

所謂「前無去路，後有追兵」，睇怕今次我都走唔甩，一係變成喪屍，一係俾喪屍咬死。





既然係咁，喺臨死或變喪屍之前，我一定要做一樣嘢！

我雙手放上心口，大大力揸自己對波。

嘩嘩嘩！對波軟綿綿，手感正到痺！

眼見前後兩班喪屍差唔多殺到埋身，本來我都放棄反抗，盡情咁揸波。

但估唔到呢個時候，我身後嗰架小巴，突然間有人拉開道門，並且有兩條友夾手夾腳拉我上車。

呢兩個人正正就係大波妹同恤衫男。

原來佢兩個匿埋咗喺呢度。

佢地救咗我，同時都俾喪屍發現咗。





「砰！砰！砰！」

好快成班喪屍包圍住架車，一邊咆哮一邊拍打車身。