我無啦啦同隻芝娃娃交換咗身體，跟住無啦啦又遇上喪屍大爆發: （39）

「你地三個困住我想做咩呀？」我左望右望，想話擸啲嘢旁吓身。

但係鋪頭入面得啲毛巾、面膜、香薰，都無乜嘢派得上用場。

「嘻嘻嘻嘻嘻嘻！」三條友一味喺度笑淫淫。

隨即，佢地合力將我抬去美容鋪一張床上。

我唔夠三個人大力，只能無可奈何咁任人擺佈。





抬完我上床之後，佢地就亂咁摷搜我身。

「喂喂喂！你地摷咩呀喂！」

我出手隔擋，可惜雙拳難敵四手，最後佢地喺我身上摷咗銀包同電話出嚟。

綠毛仔打開個銀包，見到裡面有成沓「金牛」：「嘩！身上有現金，你實係好有錢！」

「哦！原來你想要錢啫，你鍾意咪攞曬去囉！」我同條友講。





綠毛仔將沓錢交俾佢左手邊滿面鬚根嘅南亞仔，並叫對方數吓有幾多錢，之後佢再攞埋張身份證出嚟望。

「金『每』英？」

佢好似唔識讀身份證上面個名，於是問右手邊個頭生得好大嘅南亞仔：「呢個字係咪讀『每』？」

「好似係讀『母』？」大頭仔唔太肯定咁回答。

綠毛仔隊張身份證到我面前問：「靚女，你個名點讀？」





實情呢張其實係Irene嘅身份證，上面嗰個亦都係Irene嘅中文名。

「金敏英。」我照讀出身份證上印住嘅人名。

感覺Irene個真名有啲韓國人嘅名。

「哦~原來係讀『敏』，不過上面張相真係你本人？你以前啲頭髮咁短嘅？」綠毛仔問我。

條友形容得無錯，張身份證相入面嘅Irene，嗰把頭髮係的確短到好似男人咁。

我記得Irene話過，自己十八歲嗰陣想變性做男人，睇怕都係講真。

「Er…嗰陣天氣熱，所以咪剪到咁短囉！」我求其講啲嘢當答咗。

之後我再問：「家陣錢你地已經收咗，個銀包同電話係鍾意嘅咪攞埋去，就當係報答你地嘅禮物，咁我走得未？」





佢地無答我，繼續係笑口噬噬咁款。