我無啦啦同隻芝娃娃交換咗身體,跟住無啦啦又遇上喪屍大爆發: (50)
「滴噠滴噠—」
到咗天黑,外面嘅雨仲未停。
我地三個擔櫈仔,圍埋喺乒乓波檯前食晚餐。
之前喺超市拎咗三袋嘢食走,慳慳地嘅話,應該夠我地三個食一個禮拜。
至於嗰箱喺雜物房搵到嘅礦泉水,照計都夠我地頂到一段時間。
而三袋嘢食入面,絕大部分都係乾爭爭嘅餅乾,唔好食之餘又鞋口。
阿明摷吓摷吓,居然喺一堆餅乾中,摷到一條魚肉腸。
佢立即獻殷勤,搣條腸俾Irene食:「啲餅乾太乾嘅話,不如食條腸呀?」
Irene攞咗條腸,跟住轉過手就遞俾我:「你食呀!」
「吓?唔使咁客氣喎,你自己食啦。」
「係囉!條腸係我特登搣俾Irene你食架嘛!」阿明就話。
「你俾咗我咁即係我架啦,咁我鍾意俾邊個食咪俾邊個食!」Irene將條魚肉腸塞到我手中。
下一秒,阿明立即搶返,再遞俾Irene:「都話條腸係俾你食架囉!」
「咁我唔想食,想分俾其他人食,係咪唔得先!」Irene再將條腸塞到我手中。
「唔得!」阿明又搶返條腸返嚟。
如是者,條魚肉腸就喺我地三個人手上換嚟換去。
換換吓,阿明唔耐煩,直接將條腸放入自己個口。
之後佢一邊咬條腸,一邊啤住我講:「條腸係屬於我嘅,我絕對唔會俾你食!」
唔知由幾時開始,我地三個人之間嘅氣氛變得有啲奇怪。
另外亦feel到Irene對我嘅態度唔同咗。
佢坐喺我隔籬,我睄到佢成日借啲意偷望我。
當我一擰轉面望向佢,佢又立即擰返轉面扮無嘢。
總之佢啲行為舉止俾人一種含羞答答嘅感覺。
假如係女仔對住自己含羞答答咁款,可能都仲會暗爽。
但Irene係一個肌肉健碩嘅大隻佬,佢對我做咗出啲咁嘅動靜,只會令我毛管棟。
諗諗吓,佢唔會係鍾意咗我吓話?
講起嚟真係似,自從我喺超市救咗佢之後,佢對我嘅態度就變咗,就連望我嘅眼神都唔同咗。
莫非係因為我「英雄救美」,所以令佢愛上咗我?
唔會嘅唔會嘅!一定係我自己諗多咗!
食飽之後,我地喺雜物房搵到幾張瑜伽墊。
將佢地鋪喺地下,我地就當係床訓上去休息。
連續幾日無訓過好覺,我一合埋眼就訓著咗。
訓到半夜,我突然feel到有人攞毛巾冚住我個身,好似驚我凍幫我冚被咁。
我半睜開眼,朦朦朧朧見到對方一個大隻佬,手臂仲有紋身。
呢個人咪...咪係Irene?!
我詐唔知繼續訓,點知條友竟然嘟起個嘴,哄埋嚟好似想偷吻我。
我拿拿臨轉睡姿,面向下咁趴喺度訓。
咁嘅情況想唔承認都唔得,睇怕Irene真係鍾意咗我。