我無啦啦同隻芝娃娃交換咗身體，跟住無啦啦又遇上喪屍大爆發: （52）

「1比0！」Irene興奮咁報出賽果。

「再嚟！」阿明執返個波再開過。

我本身係完全唔識打乒乓波，呢刻純粹係靠身體嘅條件反射，令我識得接波、開波。

睇嚟個南亞仔以前有打開乒乓波，因此身體有肌肉記憶。

最後我仲一個唔覺意，直落兩盤贏咗阿明。





「可惡！我竟然…我竟然輸咗！」阿明個樣好唔忿氣。

「乜你原來打乒乓波咁勁架？好犀利呀！」Irene挨埋嚟想抽我水。

我拿拿臨縮開個身，跟住阿明又對我話：「唔得！我地再比過！」

「吓？仲嚟？」

「係！不過唔係比乒乓波！」





「咁比咩呀？」Irene問。

「我暫時未諗到！諗到再話你聽！」

「我對你有信心！無論比啲咩，你都一定有本事贏到阿明！」

Irene又想借啲意挨我膊頭，逼我又要退一步避開。

頂！今鋪真係煩q死人，無端白事陷入一段三角戀入面，仲要大家屈埋喺同一個地方，我想避都無得避。





之後接住嗰幾日，我每一日訓醒擘大眼，阿明就行過嚟話要同我決鬥。

條友乒乓波輸俾我就轉鬥拗手瓜，拗手瓜輸俾我就鬥長時間唔眨眼，連眨眼都輸埋俾我就鬥邊個多腳毛，總之就係想搵一樣嘢鬥贏我。

至於Irene一樣都係成日纏住我，一得閒就借啲意挨身挨勢抽我水。

我日日就係俾呢兩條友輪流煩住。

其餘嘅時間我就企喺窗邊望住個天，等緊幾時有直升機經過營救。

結果等吓一日，等吓又一日。

等等吓一個星期就咁過去，依然都係等唔到人嚟救我地。

而且每日望出窗，更會發現喪屍嘅數目一日比一日多。





頭兩日都好地地，之後五日嗰啲喪屍嘅咆哮聲，晚晚嘈到我地訓唔到覺。

今日已經係第七日，過埋今晚就係第八日，我地啲食物同水已經耗盡，如果聽日中午前都係無人嚟救我地，咁我地就必須要出去搵嘢食。

「Raughhh！！！」

外面不斷有喪屍喺度咆哮，又嘈又大聲，搞到我地三個都訓得唔太好。

眼見就快天光，呢個時候我地部電話突然喺度震。

「滋滋—滋滋—」

隔咗成個禮拜，電話終於再次收到緊急警示。





打開一睇，今次嘅內容竟然比上次更加短，只有幾行字：

「病毒傳播速度比我們預期中的快，喪屍數目每天以幾何級數上升，導致拯救行動十分困難。現粗略估計全港已有八成市民變成喪屍，情況十分嚴峻。」

我地三個睇完都呆咗，心諗係咁架渣？

之前又話有間本地藥廠研發咗特效藥嘅？點解無曬下文？

本來仲以為有一線生機，但依家睇嚟似乎比之前更加絕望。

「砰！」

突然間，樓下傳出猛烈嘅撞擊聲。

我地拿拿臨落去睇吓，發現外面成堆喪屍想撞開道門衝入嚟。





從狹窄嘅門嚹望出去，外面喪屍嘅數量比之前多咗好多。

而呢樣嘢其實我地早就發現咗，所以呢一排我地搬得就搬，幾乎已經將福利會所有搬得到嘅嘢，包括乒乓波檯、locker都搬落嚟塞住門口。

只但係，依家睇嚟門口呢大堆嘢都就嚟頂唔住。

「出面n咁多隻喪屍，再咁落去，佢地遲早撞開道門入嚟，點算好呀？」阿明慌慌張張。

「上去再搵吓仲有無嘢可以用嚟頂住道門？」Irene提議。

「應該無架啦，搬得到嘅我地都已經搬曬落嚟。」我話。

「砰！！！」





就喺呢個時候，福利會道大門被撞爛。一大班喪屍伸手入嚟，想推開塞住門口嘅檯櫃、locker、波檯等雜物。

我同阿明、Irene立即衝到門前，合力出手頂返過去，同班喪屍鬥力。

而做過喪屍嘅我知道，喪屍係唔會攰，相反人嘅體力就有限。

所以估計我地唔會頂到好耐，班喪屍遲早會闖入嚟。