殘酷暗戀物語【最終部曲】: 相信一切是最好的安排（上集）
｛相信一切是最好的安排—陳蕾｝
原來曾經有科學家預料過，仙女座星系終有一日會同銀河系相撞，亦都有人話，到時抬頭望上天空，會係一幅好靚嘅景象，但與此同時，亦都可能係一場星際災難。不過根本就冇人可以預知到，兩個星系相遇，究竟會係一場機緣，定係一場災難，但可以肯定嘅係，無論將來發生咩事，日子都係要咁過。
時間又再繼續一日接一日咁流逝，只要我嗰日要返圖書館，郭家朗都會過嚟靜靜地咁搵個位坐底，到我差唔多放工嗰陣，佢就會出去買外賣，然後企喺圖書館門口等我，一齊食完之後又再返番圖書館溫書，起初我每晚都會為佢精心準備溫書用嘅筆記，後來因為我嘅懶惰基因喺度作崇，有時候準備唔切筆記，就唯有帶啲試題俾佢做。
唯一不變嘅係，每晚去到咁上下嘅時候，佢就會伸隻手過嚟拖住我，直到圖書館休館為止。
佢仲話，佢左手寫字越嚟越靚。
不過，我梗係覺得佢同以前有啲唔同，平時嘅佢總係好瀟灑，但係呢排就好似個小朋友咁痴住我，又成日話要把握每一分鐘見我，有時候眼神又會閃過一絲絲憂愁，我諗返起好似自從Last Day嗰日佢就開始係咁，但係種種線索零碎散亂咁散佈喺我腦海入面，單憑我自己又組織唔到一個實在啲嘅因由，所以我直接問佢。
「喂，郭家朗你最近做咩咁痴身吖？」我伸拳揼咗落佢手臂度，另外我發現自己最近都好鐘意打佢。
「冇啊。有咩？」不過佢從來冇表露過痛苦嘅表情，雖然我知道有時我都幾大力。
「明明就有。」其實自己男朋友痴身都冇咩唔好吖，只係總覺得佢同以前有啲唔同，有啲奇怪。
我心入面嘅疑團始終都係冇解開到，但係可以同我傾心事嘅人又唔多，除咗曾皓賢之外。我趁住有日郭家朗同我講佢有啲急事要處理，唔得閒接我放工之際，於是我就問曾皓賢夜晚得唔得閒喺老地方見，點知佢好爽快咁就答應咗我，如是者，我哋兩個又返到嚟呢間熟悉嘅茶餐廳食晚飯，老闆娘依然仲係咁好中氣。
「我都唔知吖，總之就覺得佢好似有啲怪。」食到一半我就開始入正題。
「咁你有冇發現啲咩蛛絲馬跡？」佢問道。
「冇吖，啊唔係呀，我記返起Last Day嗰日我哋成班打邊爐嗰陣，我哋輪流講咗自己畢業之後有咩打算，唯獨是係佢冇講到。」當然我直接省略咗，嗰晚我飲醉酒後講嘅低能嘢。
「跟住呢？」佢遞咗包砂糖俾我，又繼續問道。
「跟住我估陳柏希同佢咁Friend應該知咩事，於是我走去問佢，但係佢唔肯講，叫我問返郭家朗。」我拆開包砂糖，倒咗少少糖落杯熱檸水再攪勻，再將包糖遞返俾佢，但唔覺意掂到佢隻手。
「咁你有冇問佢啊？」佢接過我包糖，再將入面剩餘嘅糖，倒落佢自己杯熱奶茶度。雖然我同佢冇以前約得咁頻密，但係呢啲默契依然未曾減退。
「有啊，我記得嗰晚我有問佢，佢話陳柏希只係純粹想嚇吓我啫。」雖然諗返起我依稀記得嗰陣時郭家朗係有遲疑到一下先答我。
「嚇吓你？唔明喎。」佢突然停低攪拌緊嘅動作，終於俾佢發現咗呢段故事有咩唔妥之處。
「啊，我唔記得講，陳柏希平時把聲咪好似鄰家男孩咁好溫柔嘅，但嗰晚佢係用好認真好嚴肅嘅語氣，叫我問返郭家朗點解冇講到佢畢業後有咩打算。」我慢慢再回憶返當時啲片段。
「吓，你唔覺得好怪㗎咩，咁點解郭家朗會咁斬釘截鐵話陳柏希係純粹想嚇吓你？」曾皓賢捉住了當晚嘅疑點。其實俾佢咁講，我都覺得自己頭先講完出嚟都好似冇咩說服力，明明嗰陣郭家朗都去咗廁所，咁佢點會知道陳柏希當時嘅語氣係點，又點會咁肯定佢只係想嚇吓我。
我亦都開始慢慢聯想到，明明當時個個都講咗自己畢業後嘅打算，唯獨是郭家朗冇講到，但係佢哋又冇追問落去，咁係咪即係等於大家其實都知道個真相，所以就冇必要追問落去，只不過可能係唔知邊個飲多咗，衝口而出諗咗呢個話題出嚟，但最後大家都有默契，一致喺最後關頭轉另一個話題。
「你咁講又好似真係有啲奇怪。」我回應道。
曾皓賢IQ有131果然係聰明過人，經佢提點之下我就醒返起咁多疑點，咁而家即係郭家朗心裡面應該有個秘密唔想俾我知，但係我又冇線索再推斷落去。
「咁你知唔知係咩事吖，你消息咁靈通。」我記得佢連區嘉桐暗戀郭家朗呢個秘密都知，話唔定可能佢都會知道咩事。
「我都唔知啊。」聽到佢咁講，雖然係有啲失望，不過我又唔會懷疑佢會好似陳柏希咁隱瞞住我。
「不過王樂兒我同你分享一樣野，考完試之後我諗住去參加義遊。」雖然個疑團拆開咗第一層，但係謎底依然埋藏緊喺深處，感覺上只係響度原地踏步咁，呢個時候曾皓賢又轉咗話題。
「義遊？」我之前好似有聽過，但係實際係啲咩又唔係好清楚。
「係啊，義遊即係去當地做義工，譬如有啲係去東南亞教小朋友讀書識字喇，亦都有啲係去日本農村體驗田園生活啦，仲有個去南非沙灘拯救小海龜，有啲係去做環保工作，譬如係幫手響條河度執垃圾，佢雖然名義上係去做義工，但其實都有旅行嘅性質，都要俾錢去嘅。」曾皓賢講咗咁大段說話，我就剩係俾小海龜嗰部份吸引住。
「吓好似好好玩咁吖，俾你講到我都好想去，係咪可以去救小海龜？」細細個睇國家地理頻道見到啲小海龜好可憐，一出世就要出盡氣力由沙灘深處，跌跌撞撞咁爬去大海，中途又有好多獵食者等住佢哋開餐，只要成功撲入大海，就可以得到自由，不過往後嘅命運係點，又有邊個可以決定到。
「不過今次我呢個係去歐洲㗎，去參與當地嘅保育工作。同埋，你過到你男朋友嗰關先喇。」曾皓賢將我從南非沙灘拉返番嚟茶餐廳裡面，唔知郭家朗會唔會想去一齊救小海龜呢，不過歐洲團又冇小海龜。
「唔係喎，你可以試吓叫埋佢陪你一齊去。」俾曾皓賢咁講，好似又真係有得諗吓。
「而且係就要快嘅報名喇，因為呢啲團好搶手㗎，到時名額滿咗就想去都冇得去。」佢再補充道。
每當我思緒亂七八糟嘅時候，曾皓賢佢永遠都可以幫我好好咁梳理完之後，仲可以俾到新方向我。呢一晚我同佢食完晚餐之後，就係茶餐廳門口道別各自回家。
返到屋企沖涼嗰陣，我滿腦子都係關於曾皓賢頭先所講嘅義遊團，我心裡面嘅念頭越諗越堅決。既然考完試咁辛苦，去做義工同時又當去個旅行散吓心，聽落都幾寫意吖，就算郭家朗唔陪我去，得我自己一個人去都OK㗎，只不過唔知郭家朗佢又想唔想去呢？
梳洗好之後，我閂好房門，坐底喺書枱面前慢慢吹乾啲頭髮，正當呢個時候，手機忽然響起，有一條新嘅未讀訊息彈咗出嚟。
「王樂兒，你好啊～」
發送者係陳柏希。