我想喺夜場搵真愛，你陪唔陪我癲？: 三十三.

幾日後。

呢幾日我哋都冇咩幾句，不過聽葉師傅話佢咁忙好正常，咁我都冇點介意。

今日放學返到屋企，我照舊開電腦寫嘢。

寫咗一行，睇電話，冇搵我。

好似有聽過佢話今日係出去玩，應該冇咩要忙架？





應該臨時有嘢要忙，我都忙下先啦。

寫多幾行之後，個腦開始有少少卡卡地，都係唞下先。

不如打機？

我開Discord睇咗睇…

半個人都冇。





咁不如…搵佢？

我拎起電話，然後…

「食飯喇撚樣！」我老母推開我房門。

我摸下個肚，又真係有少少餓。

我揼低電話衝出廳，有咩事食完飯再講。





「愛我別走。」

電話響，我即刻衝入房。

「喂，食條菜啦，你冇屎屙喇。」

「得喇，傾完單大生意先啦。」我閂房門。

係Clover打嚟，我聽咗電話之後清咗清喉嚨：「做咩呀？」

「我喺學校啊，一間食完飯嚟搵你？」佢嗰到好嘈，但無阻我聽佢講嘢。

「好啊。」我抑制住內心嘅興奮。

「咁我一間再Whatsapp搵你啦。」





「好啊。」

講完佢就收咗線，而我就即刻衝入廁所剃鬚。

剃完鬚行出嚟，我老母好驚訝咁望住我：「你搞咩呀？癡咗線。」

我冇理佢，直接返房換衫。​​​​​​​