我想喺夜場搵真愛，你陪唔陪我癲？: 四十一.

返到去都已經四點幾，佢都已經瞓咗。

我攤喺梳化上面，瞬間就瞓着咗。

然後唔知過咗幾耐，我醒咗，因為…

我跌咗落地下。

我拎起電話睇咗睇，點知已經到咗差唔多要出門口嘅時間，而Clover都Whatsapp咗我話差唔多返到學校。





我搭車返到學校門口，離遠就見到葉師傅喺垃圾桶隔離食緊煙。

「琴日點？收到風Clover去咗你嗰邊。」佢問我。

「我真係好想一直癡住佢，最好化身做一隻狗吊佢尾。」我點煙。

「你唔好搞啦。」葉師傅褪後咗步：「你咁搞好快分手。」

「吓，熱戀期日日見唔係好合理嘅咩？」





「幾多歲人啊？」

「有咩關係？」

「咁大個人拍拖就要比啲空間對方，唔好同啲小朋友一樣。」佢撳熄枝煙：「你有嘢做，佢都有嘢做，而且佢要做嘅嘢多你好多。」

的確，佢作為大學生，無論邊方面都好忙。

「嗯…」





「有咩想講啊你？」

「冇，上去啦。」

其實有，但係呢個問題應該唔大…我估。

搵佢？唔好啦。

搵佢？唔好啦。

搵佢？都係…好啦。

我掙扎咗好耐，終於喺放飯兼放學之前決定咗問佢要唔要食Lunch。

「一間食Lunch？」我喺Whatsapp問佢。





「我唔得閒。」佢覆我。

「Okay。」

其實預咗，但少少失落總會有。

「禮拜四可以。」

睇到呢到，我開心到連電話都跌埋，仲差啲鳩叫咗出聲。

我深呼吸咗幾下，平伏返個心情先拎返起部電話。

「咁禮拜四見喇！」